କଟକ ସଦର,୭।୧(ଡି.ଏନ୍.ଏ.): କଟକ ସଦର ବ୍ଲକ ଅଞ୍ଚଳର ଧାନମଣ୍ଡି ଜାନୁୟାରୀରୁ ଖୋଲିଯାଇଛି। ତେବେ ସବୁ ମଣ୍ଡି ଏକ ଘରେ ରହିବା ବଦଳରେ ଖୋଲା ଆକାଶ ତଳେ ପଡ଼ିରହିଛି। ଫଳରେ ଅଦିନିଆ ବର୍ଷାକୁ ନେଇ ଚାଷୀ ଚିନ୍ତାରେ ଅଛନ୍ତି। ମଣ୍ଡିର ଭିତ୍ତିଭୂମି ବିକାଶ ପାଇଁ ଯୋଗାଣ ବିଭାଗ କୁଇଣ୍ଟାଲ ପିଛା ୮ଟଙ୍କା ୬୭ ପଇସା ଦେଉଛନ୍ତି। ହେଲେ ସେହି ଅନୁସାରେ କାର୍ଯ୍ୟ କରାଯାଉ ନାହିଁ ବୋଲି ବିଭିନ୍ନ ଚାଷୀ ସଙ୍ଗଠନ ପକ୍ଷରୁ ବୁଧବାର କଟକ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି।
ବ୍ଲକର ଦଧିବାମନପୁର, କୁଳସରିଚୁଅଁା, ଗତିରାଉତପାଟଣା, କନ୍ଦରପୁର, ଅରିଲୋ, କିଶୋରନଗର ଓ ପ୍ରହରାଜପୁର ସମବାୟ ସମିତି ଜରିଆରେ ଧାନସଂଗ୍ରହ କରାଯିବ ବୋଲି କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ଘୋଷଣା କରିଛି। କିନ୍ତୁ ମଣ୍ଡି ସବୁ ଖୋଲା ଆକାଶ ତଳେ ରହୁଥିବାରୁ ପ୍ରତିବର୍ଷ ଚାଷୀମାନେ ଧାନ ଦେଇ ହୀନସ୍ତା ହେଉଛନ୍ତି। ଏପରିକି ସେଠାରେ ବସିବା କି ପିଇବା ପାଣି ଦିଆଯାଉ ନ ଥିବା ୪୨ ମୌଜାର ସମବାୟବିତ ବିଜୟ ରାଉତରାୟ କହିଛନ୍ତି। ଯୋଗାଣ ବିଭାଗ ସୂଚନା ଅନୁଯାୟୀ, ନିୟନ୍ତ୍ରିତ ବଜାର କମିଟି ଓ ସମବାୟ ସମିତି ଧାନ ବିକ୍ରି ଲବ୍ଧଅର୍ଥରୁ ୨ ଓ ୨.୫ ପ୍ରତିଶତ ଲାଭ ପାଆନ୍ତି। ଏହି ଧାନ କ୍ରୟ ପ୍ରକ୍ରିୟାରେ ଲାଭାଂଶକୁ ଦୃଷ୍ଟିରେ ରଖି ସରକାରୀ ସଂସ୍ଥାମାନେ ମଣ୍ଡିର ସୁବ୍ୟବସ୍ଥା କରିବା ଦରକାର ବୋଲି ଆୟତପୁରର ଗୋକୁଳଚନ୍ଦ୍ର ପ୍ରଧାନ କହିଛନ୍ତି। ଅନ୍ୟପଟେ କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ଜିଲା ପାଇଁ ଅଧିକୃତ ହୋଇଥିବାରୁ ଏହାର ବିକାଶ ପାଇଁ ବ୍ୟବସ୍ଥା କରିବା ଦରକାର ବୋଲି ସେ କହିଛନ୍ତି। ଏ ନେଇ ନିୟନ୍ତ୍ରିତ ବଜାର କମିଟି ଅଧ୍ୟକ୍ଷ ତଥା ଉପଜିଲାପାଳ ପ୍ରତାପ ଚନ୍ଦ୍ର ବେଉରା, ସମ୍ପାଦକ ତଥା ସାଲେପୁର ଅତିରିକ୍ତ ତହସିଲଦାର ସମୀର ରଞ୍ଜନ ଦାସଙ୍କୁ ଯୋଗାଯୋଗ କରାଯାଇଥିଲେ ସୁଦ୍ଧା ପ୍ରତିକ୍ରିୟା ମିଳିପାରି ନାହିଁ। ଅପରପକ୍ଷେ କଟକ ଜିଲା ଧାନ ସଂଗ୍ରହ ଅଧିକାରୀ ଜ୍ଞାନେନ୍ଦ୍ରିୟ ମିଶ୍ରଙ୍କୁ ପଚାରିବାରୁ ନିୟନ୍ତ୍ରିତ ବଜାର କମିଟିର କର୍ମକର୍ତ୍ତାଙ୍କ ସହ ଖୁବଶୀଘ୍ର ଅଭିଯୋଗ ସମ୍ପର୍କରେ ଆଲୋଚନା କରିବେ ବୋଲି କହିଥିଲେ।
