ଲୋଇସିଂହା,୪।୧: ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡା ପ୍ୟାକ୍ସରେ ଧାନକିଣାରେ ଅଚଳାବସ୍ଥା ଦେଖାଦେଇଛି। ମିଲର୍ସଙ୍କ ଅସହଯୋଗ ଯୋଗୁ ଚାଷୀଙ୍କ ଧାନ ଉଠିବାରେ ସମସ୍ୟା ହେଉଛି। ମଣ୍ଡିରେ ୨୦ରୁ ଅଧିକ ଚାଷୀଙ୍କ ୩ ହଜାରରୁ ଅଧିକ ପ୍ୟାକେଟ ଧାନ ଦୀର୍ଘ ଦିନ ହେଲା ପଡି ରହିଛି। ଏ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି।
ଲୋଇସିଂହା ବ୍ଲକ ଯୋଗୀସର୍ଡା ଓ ବାଦିବାହାଲ ପଞ୍ଚାୟତକୁ ନେଇ ଯୋଗୀସର୍ଡା ପ୍ୟାକ୍ସ ଗଠିତ। ଚଳିତ ଖରିଫ ଧାନ ବିକ୍ରିପାଇଁ ୭୯୪ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ସେଥିରୁ ୧୯୫ ନୂତନ ଓ ୫୯୯ ଚାଷୀ କାର୍ଡକୁ ନବୀକରଣ କରିଛନ୍ତି। ମଣ୍ଡିରୁ ପ୍ରଥମ ପର୍ଯ୍ୟାୟରେ ୧୯ହଜାର ୪ଶହ କୁଇଣ୍ଟାଲ ଧାନ ଉଠାଣ ଧାର୍ଯ୍ୟ ହୋଇଛି। ସିଦ୍ଧି ବିନାୟକ, ଅର୍ଣ୍ଣପୂର୍ଣ୍ଣା, ସମଲେଶ୍ୱରୀ, ସରସ୍ବତୀ ଓ ଗଜାଜନ ମିଲର୍ସ ଉକ୍ତ ପ୍ୟାକ୍ସରୁ ଚାଷୀଙ୍କ ଧାନ ଉଠାଣ କରୁଛନ୍ତି। ଏଯାଏ ୧୨ ହଜାର ୧୭୩ କୁଇଣ୍ଟାଲ ଧାନକିଣା ସରିଛି। ପ୍ୟାକ୍ସରେ ଡିସେମ୍ବର ୧ତାରିଖରେ ଧାନକିଣା ଶୁଭାରମ୍ଭ ହୋଇଥିଲା। ଡିସେମ୍ବର ଦ୍ୱିତୀୟ ସପ୍ତାହ ସୁଦ୍ଧା ଠିକ୍ ଭାବରେ ମିଲର୍ସ ଆସି ଚାଷୀଙ୍କ ଧାନ କିଣିଥିଲେ । ହେଲେ ୧୬ତାରିଖ ପରଠାରୁ ମିଲର୍ସ ଧାନ ଉଠାଣରେ ଅସହଯୋଗ କରୁଥିବା ଚାଷୀମାନେ ଅଭିଯୋଗ କରିଛନ୍ତି। ଗଜାନନ ମିଲର୍ସ ପକ୍ଷରୁ ୧୫ଶହ କୁଇଣ୍ଟାଲ ଧାନ କିଣିବାକୁ ବାକି ଥିବାବେଳେ ସିଦ୍ଧି ବିନାୟକ ୪ ହଜାର କୁଇଣ୍ଟାଲ ଟାର୍ଗେଟ ମଧ୍ୟରୁ କିଛି ବି କିଣି ନ ଥିବା ପ୍ୟାକ୍ସ ପକ୍ଷରୁ ସୂଚନା ଦିଆଯାଇଛି। ଟୋକନ ଆସିଲା ମାତ୍ରେ ସେହିଦିନ ଚାଷୀଙ୍କ ଧାନ ଉଠିବ ବୋଲି ସରକାର କହୁଥିବା ବେଳେ ଏଠାରେ ତାହାର ବ୍ୟତିକ୍ରମ ଦେଖାଦେଇଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ଧାନ ଉଠାଇବାରେ ଅବହେଳା ପ୍ରଦର୍ଶନ କରୁଥିବା ମିଲର୍ସଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚାଷୀମାନେ ଦାବି କରିଛନ୍ତି। ସେହିପରି ବୁର୍ଡା ପ୍ୟାକ୍ସରେ ମଧ୍ୟ ବହୁ ଚାଷୀଙ୍କ ଶତାଧିକ ପ୍ୟାକେଟ ଧାନ ପଡି ରହିଛି। ୩ ଦିନ ପରେ ସୋମବାର ସନ୍ଧ୍ୟାରେ ଗୋଟିଏ ଗାଡି ଆସି ଧାନ ଉଠାଇଥିବା ପ୍ୟାକ୍ସ ସୂତ୍ରରୁ ପ୍ରକାଶ।
