ନୂଆପଡ଼ା ଅଫିସ,୨୯।୫: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ବୃଦ୍ଧିକୋମନା ପଞ୍ଚାୟତ ଅଧୀନସ୍ଥ ଲଙ୍କେଶ୍ୱରୀ ପାହାଡ ତଳି ଧୁମାଭଟା, ପଣ୍ଡରାପଥର, ମୁଷାପାଲି ଗାଁର ଶହ ଶହ ଚାଷୀଙ୍କ ଏକର ଏକର ଧାନ ଫସଲ ଉଜାଡି ଦେଉଛି ବାର୍ହା। ସୁନ୍ଦର ଜଳସେଚନ ପ୍ରକଳ୍ପ ପାଣିରେ ଉକ୍ତ ଗ୍ରାମର ଚାଷୀମାନେ ଧାନ ସହ ଚିନାବାଦାମ, ମୁଗ, ବିରି ଓ ପନିପରିବା ଚାଷ କରିଥାନ୍ତି। ପାଖରେ ଲଙ୍କେଶ୍ୱରୀ ପାହାଡ ଜଙ୍ଗଲ ରହିଥିବାରୁ ବାର୍ହା ଆସି ଧାନ, ଚିନାବାଦାମ, ମୁଗ, ବିରି ଖାଇବା ସହ ଚାଷ ସବୁ ଉଜାଡି ଦେଉଛି। ଫଳରେ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ଚଳିତ ରବି ଋତୁରେ ଶିବସାଏ ଧରୁଆ ୫ ଏକର ଜମିରେ ଧାନ ଚାଷ କରିଥିବା ବେଳେ ଜ୍ଞାନେଶ୍ୱର ବାଗ ୫ ଏକର, ରୋହିତ ଦାସ ୩ ଏକର, ଗିରିଧାରି ବାଗ ୨ ଏକର ୨୦ ଡେସିମିଲ, ଜୟନ୍ତି ନିଆଲ ୧ ଏକର, ଭାଗୀରଥି ହଂସ ୧ ଏକର, ମୋହନ ଦାସ ଦେଢ ଏକର, ଶୁକଲାଲ ବାଗ ଦେଢ ଏକର, ରଘୁନାଥ ବେମାଲ ୧ ଏକର, ସନ୍ତରାମ ଅହିର ଅଢେଇ ଏକର ଏପରି ଶହ ଶହ ଚାଷୀ ଧାନ ଓ ଚିନାବାଦାମ ଚାଷ କରିଥିଲେ। ଲଙ୍କେଶ୍ୱରୀ ପାହାଡ ଜଙ୍ଗଜକୁ ଲାଗି ଚାଷ ଜମି ରହିଥିବାରୁ ରାତିରେ ବାର୍ହା ଆସି ଧାନ ଫସଲ ସବୁ ଖାଇବା ସହ ନଷ୍ଟ କରି ଦେଉଛି। ଏହା ପ୍ରଥମ ନୁହେଁ ପ୍ରତି ବର୍ଷ ବାରାହା ଚାଷ ନଷ୍ଟ କରିଥାଏ। ବନ ବିଭାଗକୁ ଚାଷୀ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ। ଶହେ ପ୍ରତିଶତ ଚାଷ ନଷ୍ଟ ହୋଇଥିଲେ ୨୫ ପ୍ରତିଶତ ସହାୟତା ମିଳିଥାଏ ବୋଲି ଚାଷୀମାନେ ଅଭିଯୋଗ କରିଛନ୍ତି। ଚାଷୀ ପ୍ରାଥମିକ କୃଷି ସମବାୟ ସମିତି କିମ୍ବା ମହାଜନି ଋଣ ଆଣି ଚାଷ କରନ୍ତି। ଧାନ ଅମଳ ହେଲେ ବିକ୍ରି କରି ଋଣ ପରିଶୋଧ କରି ପୁଣି ଋଣ ଆଣି ଖରିଫ ଋତୁରେ ଚାଷ କରିଥାନ୍ତି। ପ୍ରତିବର୍ଷ ବାର୍ହା ଚାଷ ନଷ୍ଟ କରୁଥିବାରୁ ଚାଷୀମାନେ ଋଣ ପରିଶୋଧ କରି ପାରୁନାହାନ୍ତି। ଏ ସଂକ୍ରାନ୍ତରେ କୋମନା ବନ ବିଭାଗ ରେଞ୍ଜର ଦେବଦତ ସୁତାରଙ୍କୁ ପଚାରିବାରୁ ଆମ ପାଖକୁ ସେମିତି ରିପୋର୍ଟ ଆସି ନାହିଁ। ଆପଣମାନେ କହିବା ପରେ ମଁୁ ଜାଣୁଛି। ସୋମବାର ମୁଁ ନିଜେ ଯାଇ କ୍ଷୟକ୍ଷତିର ଆକଳନ କରି ଉପରିସ୍ଥ ଅଧିକାରୀଙ୍କୁ ରିପୋର୍ଟ ଦେଇ ସହାୟତା ରାଶି ଯୋଗାଇବା ବ୍ୟବସ୍ଥା କରିବି ବୋଲି ପ୍ରକାଶ କରିଥିଲେ।
