କଟକ,୧୪ା୭(ସୁପ୍ରିୟା ପ୍ରିୟଦର୍ଶିନୀ):ଭାରତ ସରକାରଙ୍କ ନ୍ୟାଶନାଲ ଆକ୍ରିଡିଏଶନ ବୋର୍ଡ ଫର୍ ଟେଷ୍ଟିଂ ଆଣ୍ଡ୍ କାଲିବ୍ରେଶନ ଲାବୋରୋଟୋରିଜ୍ (ଏନ୍ଏବିଏଲ୍)ରୁ ରେଭେନ୍ଶା ବିଶ୍ୱବିଦ୍ୟାଳୟକୁ ମାନ୍ୟତା ମିଳିଛି। ରାଜ୍ୟର ପ୍ରଥମ ବିଶ୍ୱବିଦ୍ୟାଳୟ ଭାବେ ରେଭେନ୍ଶା ଏହି ମାନ୍ୟତା ପାଇଛି। ଏଥିସହ ରେଭେନ୍ଶା ବିଶ୍ୱବିଦ୍ୟାଳୟର ଇତିହାସରେ ଆଉ ଏକ ନୂତନ ଫର୍ଦ୍ଦ ଯୋଡ଼ି ହୋଇଛି। ଏଣିକି ରେଭେନ୍ଶାରେ ଅକ୍ସିଜେନର ଶୁଦ୍ଧତା ପରୀକ୍ଷା କରାଯାଇପାରିବ। ରସାୟନ ବିଜ୍ଞାନ ବିଭାଗରେ ଏହାର ଲାବୋରେଟୋରି କାର୍ଯ୍ୟ ଆରମ୍ଭ ହୋଇଛି। ବିଭିନ୍ନ ସରକାରୀ ଓ ଘରୋଇ ମେଡିକାଲରେ ରୋଗୀସେବା କ୍ଷେତ୍ରରେ ବ୍ୟବହାର ହେଉଥିବା ଅକ୍ସିଜେନର ଶୁଦ୍ଧତା ଓ ମାନକୁ ଏହି ଲାବୋରେଟୋରିଜ୍ରେ ପରୀକ୍ଷା କରାଯାଇ ସାର୍ଟିଫିକେଟ ହାସଲ କରିପାରିବେ। ଭାରତ ସରକାରଙ୍କ ବିଜ୍ଞାନ ଓ ପ୍ରଯୁକ୍ତିବିଦ୍ୟା ବିଭାଗ ପକ୍ଷରୁ ପ୍ରଦତ୍ତ ୫୫ ଲକ୍ଷ ଟଙ୍କା ବ୍ୟୟରେ ଏହା ରେଭେନ୍ଶା ବିଶ୍ୱବିଦ୍ୟାଳୟରେ ସ୍ଥାପନ କରାଯାଇଛି।
ଏହି ପଦ୍ଧତି ଅନୁଯାୟୀ ଏକ ଅମ୍ଳଜାନ ସିଲିଣ୍ଡରରେ କେତେ ପ୍ରତିଶତ ଅମ୍ଳଜାନ, କାର୍ବନ ଡାଇଅକ୍ସାଇଡ, ନାଇଟ୍ରୋଜେନ ଓ କାର୍ବନ ମନୋଅକ୍ସାଇଡ୍ ରହିଛି ତାହାକୁ ଯାଞ୍ଚ କରାଯିବ। ସାଧାରଣତଃ ରୋଗୀସେବା କ୍ଷେତ୍ରରେ ବ୍ୟବହୃତ ଅକ୍ସିଜେନ ସିଲିଣ୍ଡରରେ ୯୩ ପ୍ରତିଶତ ଅମ୍ଳଜାନ, ୫ ପିପିଏମ୍ କାର୍ବନ ମନୋଅକ୍ସାଇଡ, ୩୦୦ ପିପିଏମ୍ କାର୍ବନ ଡାଇଅକ୍ସାଇଡ ଏବଂ ନାଇଟ୍ରୋଜେନ ୫ରୁ ୬ ପ୍ରତିଶତ ରହିବା ଆବଶ୍ୟକ। ଏହାଠାରୁ ଅଧିକ ଥିଲେ, ଲୋକଙ୍କ ଜୀବନ ପ୍ରତି ବିପଦ ରହିଛି ବୋଲି ସୂଚନା ମିଳିପାରିବ।
ଏଭଳି ପଦ୍ଧତି ଦ୍ୱାରା କଟକ ସମେତ ରାଜ୍ୟର ବିଭିନ୍ନ ମେଡିକାଲରେ ବ୍ୟବହୃତ ହେଉଥିବା ଅକ୍ସିଜେନ ସିଲିଣ୍ଡରଗୁଡ଼ିକର ମାନ ଓ ଶୁଦ୍ଧତା ପରୀକ୍ଷା କରାଯାଇ ପାରିବ। ୨୦୧୬ ମସିହାରେ ରେଭେନ୍ଶା ବିଶ୍ୱବିଦ୍ୟାଳୟର ରସାୟନ ବିଜ୍ଞାନ ବିଭାଗରେ ଗ୍ୟାସ୍ କ୍ରୋମାଟୋଗ୍ରାଫି-ମାସ୍ ସ୍ପେକ୍ଟ୍ରୋମେଟ୍ରି (ଜିସି-ଏମ୍ଏସ୍) ଲ୍ୟାବ୍ ପ୍ରତିଷ୍ଠା କରାଯାଇଥିଲା। ଏହା ଛାତ୍ରୀଛାତ୍ରଙ୍କ ଗବେଷଣା ଅଧ୍ୟୟନ ନିମନ୍ତେ ବ୍ୟବହାର ହେଉଥିଲା। ତେବେ କରୋନା ସମୟରେ ରାଜ୍ୟରେ ଅମ୍ଳଜାନର ଅଭାବ ଦେଖାଦେଇଥିଲା। ଏହି ସମୟରେ କେତେଜଣ ପ୍ରଫେସର ଏବଂ ବହୁ ଘରୋଇ ସଂସ୍ଥା ରେଭେନ୍ଶାରେ ଅମ୍ଳଜାନ ଶୁଦ୍ଧତା ପରୀକ୍ଷା ସୁବିଧା କରିବାକୁ ପ୍ରସ୍ତାବ ଦେଇଥିଲେ। ପରେ ବିଭାଗ ଦ୍ୱାରା ପ୍ରୟାସ ଆରମ୍ଭ ହୋଇଥିଲା। ତତ୍କାଳୀନ ବିଭାଗୀୟ ମୁଖ୍ୟ ପ୍ରଫେସର ଡ. ସିଦ୍ଧାର୍ଥ ଭରଦ୍ୱାଜ, ଆସୋସିଏଟ୍ ପ୍ରଫେସର ଡ. ପୂର୍ଣ୍ଣେନ୍ଦୁ ପାଢ଼ୀ ଏବଂ ଡ. ଜୟ ପ୍ରକାଶ ଦାସ ମିଳିତ ଭାବେ ଏ ଦିଗରେ ଗବେଷଣା କରି ଏକ ପଦ୍ଧତି ପ୍ରସ୍ତୁତ କରିଥିଲେ। ଏଥିପାଇଁ ସେମାନଙ୍କୁ ପ୍ରାୟ ୧୨ ମାସ ସମୟ ଲାଗିଥିଲା। ଏହାପରେ ଏନ୍ଏବିଏଲ୍ର ଦୁଇଜଣିଆ ଟିମ୍ ରେଭେନ୍ଶାକୁ ସର୍ଭେ କରିବାକୁ ଆସିଥିଲେ। ଅମ୍ଳଜାନ ପରୀକ୍ଷାର ସୁବିଧା ଏବଂ ପରୀକ୍ଷା ପଦ୍ଧତିକୁ ଯାଞ୍ଚ କରିବା ପରେ ଗତ ଜୁନରେ ଏହି ମାନ୍ୟତା ପ୍ରଦାନ କରାଯାଇଛି ବୋଲି ବରିଷ୍ଠ ଆସୋସିଏଟ୍ ପ୍ରଫେସର ଡ. ଦାସ ସୂଚନା ଦେଇଛନ୍ତି। ତେବେ ଏହାଦ୍ୱାରା ଓଡିଶାକୁ ଅକ୍ସିଜେନ ଶୁଦ୍ଧତା ପରୀକ୍ଷା ନିମନ୍ତେ ଆଉ ବାହାର ରାଜ୍ୟ ଉପରେ ନିର୍ଭର କରିବାକୁ ପଡ଼ିିବ ନାହିଁ। ଓଡ଼ିଶା ନିଜେ ଆତ୍ମନିର୍ଭରଶୀଳ ହୋଇପାରିବ ବୋଲି ଡ. ଦାସ କହିଛନ୍ତି।
