ଟୋକିଓ, ୨ା୮(ଏପି)-କୋଭିଡ୍ କଟକଣା ସତ୍ତ୍ୱେ ଅଲିମ୍ପିକ ଆଥଲେଟ୍ସ ଭିଲେଜରେ ଏକ ଆଉଟଡୋର୍ ଡ୍ରିଙ୍କିଙ୍ଗ ପାର୍ଟି ହୋଇଥିବା ଖବର ଏବେ ଚର୍ଚ୍ଚାର ବିଷୟ ହୋଇଛି। ଘଟଣାର ତଦନ୍ତ ଆରମ୍ଭ ହୋଇଥିବା ଟୋକିଓ ଅଲିମ୍ପିକ ଅଫିସିଆଲମାନେ କହିଛନ୍ତି। ଆୟୋଜକ କମିଟି ସିଇଓ ତୋଶିରୋ ମୁଟୋ କହିଛନ୍ତି, ଶୁକ୍ରବାର ଭିଲେଜସ୍ଥିତ ଏକ ପାର୍କରେ ବିଳମ୍ବିତ ରାତିରେ କେତେଜଣ ଆଥଲେଟ ଏବଂ ଟିମ୍ ଅଫିସିଆଲ ମଦ୍ୟପାନ କରିଥିଲେ। ଘଟଣା ପରେ ପୋଲିସ ପହଞ୍ଚତ୍ଥିଲା। ମୁଟୋ କିନ୍ତୁ ଏଥିରେ ଅଂଶଗ୍ରହଣ କରିଥିବା ଆଥଲେଟ ଅବା କୌଣସି ଟିମ୍ର ସମ୍ପୃକ୍ତି କିମ୍ବା କ’ଣ ଘଟିଥିଲା, ସେ ସମ୍ପର୍କରେ କୌଣସି ବିବରଣୀ ଦେଇ ନ ଥିଲେ। କୋଭିଡ୍ ନିୟମ ଅନୁସାରେ ଏକତ୍ର ହୋଇ ମଦ୍ୟପାନକୁ ବାରଣ କରାଯାଇଥିବା ଟୋକିଓ ଅଲିମ୍ପିକ୍ସରେ ଭାଗ ନେଉଥିବା ୧୧,୦୦୦ ଆଥଲେଟଙ୍କୁ ଗେମ୍ସ ଆରମ୍ଭ ପୂର୍ବରୁ ଚେତାଇ ଦିଆଯାଇଥିଲା। ଆଥଲେଟମାନେ କିନ୍ତୁ ଚାହିଁଲେ ସେମାନଙ୍କ ରୁମ୍ରେ ଏକାକୀ ମଦ୍ୟପାନ କରିପାରିବେ ବୋଲି ସେମାନଙ୍କୁ କୁହାଯାଇଥିଲା। କୌଣସି ଆଥଲେଟ ନିୟମ ଉଲ୍ଲଂଘନ କଲେ ତାଙ୍କୁ ଭିଲେଜରୁ ହଟାଇ ଦିଆଯିବ। ସେମାନଙ୍କ ନିକଟରୁ ଅଲିମ୍ପିକ ପ୍ରମାଣପତ୍ର ପ୍ରତ୍ୟାହାର କରିନିଆଯିବ। ମୁଟୋ କହିଛନ୍ତି, ଘଟଣାର ତଦନ୍ତ ଚାଲିଛି। ରିପୋର୍ଟ ମିଳିବା ପରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ନିକଟରେ ଦୁଇଜଣ ପଦକ ବିଜୟୀ ଆଥଲେଟ ବିନା ଅନୁମତିରେ ଭିଲେଜ ବାହାରକୁ ପର୍ଯ୍ୟଟନରେ ଚାଲିଯାଇଥିବା ଜଣାପଡ଼ିବା ପରେ ସେମାନଙ୍କଠାରୁ ଅଲିମ୍ପିକ ସ୍ବୀକୃତିପତ୍ର ପ୍ରତ୍ୟାହାର କରି ନିଆଯାଇଥିଲା। ଏହି ଆଥଲେଟ୍ ଦ୍ୱୟ ହେଲେ ଭାଝା ମାର୍ଗଭେଲାସଭିଲି ଓ ଲାଶା ଶବଦଭାସଭିଲି। ଦୁହେଁ ଜୁଡୋରେ ଜର୍ଜିଆ ପାଇଁ ରୌପ୍ୟ ଜିତିଥିଲେ। ସେମାନଙ୍କ ଇଭେଣ୍ଟ ଶେଷ ହେବାପରେ ଉଭୟଙ୍କୁ ମଙ୍ଗଳବାର ଟୋକିଓ ଟାଓ୍ବାର ନିକଟରେ ଦେଖିବାକୁ ମିଳିଥିଲା। ଏହି ଘଟଣା ପାଇଁ ଜର୍ଜିଆ ଦୂତାବାସ ତରଫରୁ କ୍ଷମାପ୍ରାର୍ଥନା କରାଯାଇଥିଲା। କରୋନା ସଂକ୍ରମଣ ଆଶଙ୍କା ଥିବାରୁ ଆଥଲେଟମାନଙ୍କୁ ଅଲିମ୍ପିକ ବବଲ ଛାଡ଼ି ବାହାରକୁ ନ ଯିବା ଏବଂ ଜାପାନ ବାସିନ୍ଦାଙ୍କ ସହ ମିଳାମିଶା ନ କରିବା ଲାଗି କଡ଼ା ଚେତାବନୀ ଦିଆଯାଇଛି। ସୂଚନାଯୋଗ୍ୟ, ଅଲିମ୍ପିିକ୍ସ ବେଳେ ଟୋକିଓ ଏବଂ ଜାପାନର ଅବଶିଷ୍ଟ ଅଞ୍ଚଳରେ କରୋନା ପଜିଟିଭଙ୍କ ସଂଖ୍ୟା ବୃଦ୍ଧି ପାଉଥିବା ପରିଲକ୍ଷିତ ହେଉଛି। ସ୍ଥାନୀୟ ସରକାରଙ୍କ ପାଇଁ ଏହା ଚିନ୍ତାର କାରଣ ହୋଇଛି।
