ଇସଲାମାବାଦ୍,୨୬।୪:ଜମ୍ମୁ ଏବଂ କଶ୍ମୀରର ପହଲଗାମରେ ପାକିସ୍ତାନ ସମର୍ଥିତ ଆତଙ୍କବାଦୀଙ୍କ ଦ୍ୱାରା ହୋଇଥିବା ବର୍ବର ଆକ୍ରମଣରେ ୨୭ ଜଣ ନିରୀହ ନାଗରିକଙ୍କ ପ୍ରାଣହାନି ପରେ ଭାରତ ଏବଂ ପାକିସ୍ତାନ ମଧ୍ୟରେ କୂଟନୈତିକ ଉତ୍ତେଜନା ଆହୁରି ବୃଦ୍ଧି ପାଇଛି। ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ଏବଂ ପାକିସ୍ତାନ ପିପୁଲ୍ସ ପାର୍ଟି (ପିପିପି)ର ମୁଖ୍ୟ ବିଲାୱାଲ ଭୁଟ୍ଟୋ ଜର୍ଦ୍ଦାରୀ ଆକ୍ରମଣାତ୍ମକ ଏବଂ ଉତ୍ତେଜନାମୂଳକ ବୟାନ ଦେଇ ପରିସ୍ଥିତିକୁ ଅଧିକ ଗମ୍ଭୀର କରିଥିଲେ।
ଏକ ସାଧାରଣ ସଭାକୁ ସମ୍ବୋଧିତ କରିବା ସମୟରେ, ବିଲୱାଲ ଭୁଟ୍ଟୋ ସିନ୍ଧୁ ଜଳ ଚୁକ୍ତିନାମା ସମ୍ପର୍କରେ ଭାରତକୁ ସିଧାସଳଖ ଧମକ ଦେଇଥିଲେ। ସେ କହିଥିଲେ,ମୁଁ ସିନ୍ଧୁ ନଦୀ କୂଳରେ ଠିଆ ହୋଇ ଭାରତକୁ କହିବାକୁ ଚାହେଁ, ସିନ୍ଧୁ ଆମର ଏବଂ ଏହା ଆମର ରହିବ। ଆମର ପାଣି ଏହି ନଦୀ ଦେଇ ପ୍ରବାହିତ ହେବ ନଚେତ୍ ସେମାନଙ୍କ ରକ୍ତ ଏଥିରେ ପ୍ରବାହିତ ହେବ। ଏହି ବିବୃତ୍ତିକୁ ଭାରତ ବିରୋଧରେ ହିଂସା ପାଇଁ ଏକ ଖୋଲା ଉସୁକାଇବା ଭାବରେ ଦେଖାଯାଉଛି, ବିଶେଷକରି ଏପରି ଏକ ସମୟରେ ଯେତେବେଳେ ପହଲଗାମ ଆକ୍ରମଣ ସମଗ୍ର ଦେଶକୁ ଦୁଃଖ ଏବଂ କ୍ରୋଧରେ ବୁଡାଇ ଦେଇଛି।
ଭାରତ ବିଶ୍ୱ ବ୍ୟାଙ୍କର ମଧ୍ୟସ୍ଥତାରେ ୧୯୬୦ରେ ସ୍ବାକ୍ଷରିତ ସିନ୍ଧୁ ଜଳ ଚୁକ୍ତି (IWT)ର ପୁନଃବିଚାର ପ୍ରକ୍ରିୟା ଆରମ୍ଭ କରିଛି। ଏହି ଚୁକ୍ତି ଭାରତ ଏବଂ ପାକିସ୍ତାନ ମଧ୍ୟରେ ଜଳ ବଣ୍ଟନ ସମ୍ପର୍କିତ ଏକ ଐତିହାସିକ ଚୁକ୍ତି ହୋଇଛି, ଯାହା ଦୁଇଟି ଯୁଦ୍ଧ ସମୟରେ ମଧ୍ୟ ଅକ୍ଷୁର୍ଣ୍ଣ ରହିଥିଲା। କିନ୍ତୁ କ୍ରମାଗତ ଆତଙ୍କବାଦୀ କାର୍ଯ୍ୟକଳାପ ଏବଂ ପାକିସ୍ତାନର ଅସହଯୋଗ ଭୂମିକା ଯୋଗୁ ଭାରତ ଏବେ ଏହାକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି।
ପାକିସ୍ତାନୀ ନେତା ଭୁଟ୍ଟୋ ଦାବି କରିଥିଲେ, ଭାରତ ‘ସିନ୍ଧୁଙ୍କ ଉପରେ ଆକ୍ରମଣ’ କରିଛି। ସେ କହିଥିଲେ, ଭାରତର ଜନସଂଖ୍ୟା ଆମଠାରୁ ଅଧିକ ହୋଇପାରେ, କିନ୍ତୁ ପାକିସ୍ତାନର ଲୋକମାନେ ସାହସୀ। ଆମେ ସୀମାରେ ଏବଂ ପାକିସ୍ତାନ ଭିତରେ ମଧ୍ୟ ଲଢ଼ିବୁ। ଆମର ସ୍ବର ଭାରତକୁ ଉଚିତ ଜବାବ ଦେବ। ଏହି ବିବୃତ୍ତିରୁ ସ୍ପଷ୍ଟ ଯେ ଆତଙ୍କବାଦକୁ ନିନ୍ଦା କରିବା ପରିବର୍ତ୍ତେ, ପାକିସ୍ତାନର ରାଜନୈତିକ ନେତୃତ୍ୱ ଆକ୍ରମଣାତ୍ମକ ଜାତୀୟତାବାଦକୁ ପ୍ରୋତ୍ସାହିତ କରୁଛନ୍ତି, ଯାହା ଯୋଗୁ କୂଟନୈତିକ ଆଲୋଚନାର ସମ୍ଭାବନା ଆହୁରି ହ୍ରାସ ପାଉଛି।
ପହଲଗାମରେ ହୋଇଥିବା ଆକ୍ରମଣ ପରେ ଭାରତ ଅନେକ ଠୋସ ପଦକ୍ଷେପ ନେଇଛି। ଏଥିରେ କେବଳ ପାକିସ୍ତାନୀ ନାଗରିକଙ୍କ ଭିଜା ବାତିଲ ଏବଂ ସେମାନଙ୍କୁ ଦେଶାନ୍ତର ପାଇଁ ନିର୍ଦ୍ଦେଶ ନୁହେଁ, ବରଂ ସିନ୍ଧୁ ଜଳ ଚୁକ୍ତିନାମାକୁ ‘ବନ୍ଦ କରିବା ଦିଗରେ ପଦକ୍ଷେପ’ ମଧ୍ୟ ସାମିଲ ଅଛି। ଭାରତ ବିଶ୍ୱବ୍ୟାଙ୍କ ସହିତ ଏହି ଚୁକ୍ତିନାମାକୁ ନୂତନ ଭାବରେ ସମୀକ୍ଷା କରୁଛି।
