ଭୁବନେଶ୍ୱର, ୧୨।୧୧ (ବ୍ୟୁରୋ):ବାଲେଶ୍ୱର ଏବଂ ତିର୍ତ୍ତୋଲ ବିଧାନସଭା ଆସନରେ ହୋଇଥିବା ଉପନିର୍ବାଚନର ଫଳ ବିଜେଡି ସପକ୍ଷରେ ଯାଇଛି। ଦୁଇଟି ଯାକ ଆସନରେ ଶାସକ ଦଳର ବିଜୟ ପରେ ବିରୋଧୀ କଂଗ୍ରେସ ଏବଂ ଭାଜପା ପରାଜୟକୁ ସ୍ବୀକାର କରିଛନ୍ତି। କଂଗ୍ରେସ ବିଶ୍ୱାସଘାତ କଥା କହିଥିବା ବେଳେ ଭାଜପା ଜନମତକୁ ସ୍ବୀକାର କରିଛି। ଅନ୍ୟପଟେ ବିଜେଡି ନେତାମାନେ ଖୁସି ବ୍ୟକ୍ତ କରିଛନ୍ତି।
କଂଗ୍ରେସ ବରିଷ୍ଠ ନେତା ସୁରେଶ କୁମାର ରାଉତରାୟ(ସୁର) କହିଛନ୍ତି, ମହାତ୍ମା ଗାନ୍ଧୀଙ୍କ ଡାକରାରେ ଅନୁପ୍ରାଣିତ ହୋଇ ହରେକୃଷ୍ଣ ମହତାବଙ୍କ ନେତୃତ୍ୱରେ ବାଲେଶ୍ୱରବାସୀ ସ୍ବାଧୀନତା ସଂଗ୍ରାମରେ ସାମିଲ ହୋଇଥିଲେ। ସେମାନେ ଭାରି ସ୍ବାଭିମାନୀ। କିନ୍ତୁ ସେମାନେ ପଇସା ନେଲେ ଭୋଟ ଦେଲେ। ଟଙ୍କା ନେବାପରେ ଆଉ କି ପ୍ରକାର ସ୍ବାଭିମାନ ରହିଲା। ଉପନିର୍ବାଚନରେ ଭାଜପା ଭୋଟ ପିଛା ୩ ହଜାର ଏବଂ ବିଜେଡି ୫ ହଜାର ଟଙ୍କା ବାଣ୍ଟିଲା। ସେଠାରେ କଂଗ୍ରେସର ୧୦୦, ୨୦୦ ଟଙ୍କା କେମିତି କାମ ଦେବ ବୋଲି ସେ କହିଛନ୍ତି। ସୁର ଆହୁରି କହିଛନ୍ତି, କେତେଜଣ ନେତାଙ୍କ ଅନ୍ତର୍ଘାତି କାର୍ଯ୍ୟ ଯୋଗୁ ଉଭୟ ଆସନରେ କଂଗ୍ରେସ ପରାଜିତ ହୋଇଛି। ବାଲେଶ୍ୱରରେ ଠିକ୍ରେ ପ୍ରଚାର ନ କରି ହୋଟେଲରେ ଶୋଇଲେ। ସେହିପରି ତିର୍ତ୍ତୋଲରେ ଦଳ ଆହୁରି ଭଲ କରି ଥାଆନ୍ତା। ସେଠାରେ ମଧ୍ୟ କିଛି କର୍ମୀ ଠିକରେ କାମ କଲେନାହିଁ। ନିରଞ୍ଜନ ପଟ୍ଟନାୟକଙ୍କୁ ପଦରୁ ହଟାଇବାକୁ ଲାଗିଲେ, ଯେଉଁଥି ପାଇଁ ହାରିଲୁ ବୋଲି ସୁର କହିଛନ୍ତି।
ଭାଜପା ରାଜ୍ୟ ସଭାପତି ସମୀର ମହାନ୍ତି ବୁଧବାର ଏକ ଖବରଦାତା ସମ୍ମିଳନୀରେ କହିଛନ୍ତି, ଉପନର୍ବାଚନକୁ ଭାଜପା ପ୍ରସଙ୍ଗ ଭିତ୍ତିକ ଭାବେ ଲଢେଇ କରିଥିଲା। କଂଗ୍ରେସର କେବଳ ମିଥ୍ୟା ପ୍ରଚାର ଛଡା ଆଉ କିଛି କରିନାହିଁ। ରାଜ୍ୟରେ କଂଗ୍ରେସ ଶକ୍ତିହୀନ ହୋଇପଡିଥିବା ବାଲେଶ୍ୱର ଏବଂ ତିର୍ତ୍ତୋଲବାସୀ ସଙ୍କେତ ଦେଇଛନ୍ତି। ରାଜ୍ୟରେ କେବଳ ଦ୍ୱିପାକ୍ଷିକ ନିର୍ବାଚନ ଚାଲିବ। ଏଭଳି ଏକ ସଙ୍କଟ ସମୟରେ ଘରୁ ବାହାରି ନିଜ ମତ ସାବ୍ୟସ୍ତ କରିଥିବାରୁ ମତଦାତାଙ୍କୁ ଧନ୍ୟବାଦ ଦେବା ସହ ଜମମତକୁ ନମ୍ରତାର ସହ ସ୍ବୀକାର କରୁଛୁ। ସେହିପରି ଏହି ୨ ଆସନରେ କଠିନ ପରିଶ୍ରମ କରିଥିବା ଦଳୀୟ ନେତା ଏବଂ କାର୍ଯ୍ୟକର୍ତ୍ତାଙ୍କୁ ସାଧୁବାଦ ଜଣାଉଛୁ ବୋଲି ସମୀର କହିଛନ୍ତି।
ବିଜେଡି ନେତା ପ୍ରତାପ ଜେନା କହିଛନ୍ତି, ଏହି ଉପନିର୍ବାଚନ ଦଳ ପାଇଁ ଚ୍ୟାଲେଞ୍ଜ ଥିଲା। ସେଥିଲାଗି ଆମେ ସନ୍ତୁଷ୍ଠ ଅଛୁ। ବିଜେଡି ବାଲେଶ୍ୱର ଉପନିର୍ବାଚନରେ ଦେଇଥିବା ପ୍ରାର୍ଥୀ ପ୍ରତିଷ୍ଠିତ ନେତା ନ ଥିଲେ, ଜଣେ ସାଧାରଣ କର୍ମୀଙ୍କୁ ପ୍ରାର୍ଥୀ କରି ଜିତାଇଛୁ। ଗତ ନିର୍ବାଚନରେ ଭାଜପା ହାତରେ ବାଲେଶ୍ୱର ଆସନ ଥିଲା। ଭାଜପା ଗତଥର ଯେତିକି ଭୋଟ ବ୍ୟବଧାନରେ ବିଜୟୀ ହୋଇଥିଲା ଉପନିର୍ବାଚନରେ ସେତିକି ଭୋଟରେ ଜିତିଲୁ। ଭାଜପାର କେନ୍ଦ୍ରମନ୍ତ୍ରୀ ଓ ଅନ୍ୟ ନେତା ପ୍ରଚାର କଲେ, ବିଜେଡି ରାଜ୍ୟ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେବଳ ଭର୍ଚୁଆଲ ପ୍ରଚାର କଲେ। ଅର୍ଥବଳ ଓ ବାହୁବଳ କହୁଥିବା ଦଳ ମଧ୍ୟ ଖର୍ଚ୍ଚ କରିଛନ୍ତି ବୋଲି ସେ କହିଛନ୍ତି।
