ମୁମ୍ବାଇ: ଓଟିଟି (ଓଭର ଦ ଟପ୍) ପ୍ଲାଟଫର୍ମର ଚାହିଦା ଦିନକୁ ଦିନ ବଢ଼ିବାରେ ଲାଗିଛି, ଯାହା ହିନ୍ଦୀ ସିନେମା ଜଗତ ପାଇଁ ଚିନ୍ତାର ବିଷୟ ପାଲଟିଛି। ଓଟିଟିର ଲୋକପ୍ରିୟତା ବଢ଼ିବା ଦ୍ୱାରା ଲୋକେ ସିନେମାଘର ଯାଇ ଚଳଚ୍ଚିତ୍ର ଦେଖିବାକୁ ଆଉ ପସନ୍ଦ କରୁ ନାହାନ୍ତି। ଅନ୍ୟପଟେ ହିନ୍ଦୀ ଫିଲ୍ମର ମାନ ସବୁ ଦିନକୁ ଦିନ ନିମ୍ନଧରଣରେ ହେବାରେ ଲାଗିଛି। ବଲିଉଡ୍ରେ ଯେଉଁସବୁ ଫିଲ୍ମ ନିର୍ମାଣ କରାଯାଉଛି ତା’ର ମାନ ନିକୃଷ୍ଟ କରିବା ହୁଏତ ଭୁଲ୍ ହେବ ନାହିଁ। ଅକ୍ଷୟ କୁମାରଙ୍କ ଦ୍ୱାରା ଅଭିନୀତ ଫିଲ୍ମ ‘ରକ୍ଷାବନ୍ଧନ’ ନିକଟରେ ରିଲିଜ୍ ହୋଇଥିଲା। ଫିଲ୍ମଟି ବକ୍ସ ଅଫିସରେ ଭଲ ପ୍ରଦର୍ଶନ କରିପାରି ନ ଥିବାବେଳେ ଏହା ପଛର କାରଣ ଅକ୍ଷୟ କୁମାର ନିଜକୁ ଦାୟୀ କରିଥିଲେ। ସେ କହିଥିଲେ, ଦର୍ଶକ କ’ଣ ଚାହୁଁଛନ୍ତି ତାହା ଜାଣିବା ନିହାତି ଦରକାର। କାମରେ ପରିବର୍ତ୍ତନ ଆଣିବା ନିହାତି ଦରକାର। ଭିନ୍ନ ଧରଣର ମନୋରଞ୍ଜନ କଲାଭଳି ଫିଲ୍ମ ତିଆରି କରିବା ଦରକାର ବୋଲି ଅକ୍ଷୟ କହିଥିଲେ। ମହାମାରୀ କରୋନା କରେ ବଲିଉଡ୍ରେ ଏ ପ୍ରକାର ବ୍ୟତିକ୍ରମ ଦେଖିବାକୁ ମିଳିଛି। ଚଳଚ୍ଚିତ୍ରର ମୁଖ୍ୟ ଆକର୍ଷଣ ଫିଲ୍ମର କାହାଣୀ ହୋଇଥିବାବେଳେ ଦୁର୍ବଳ ସଂଳାପ ପାଇଁ ଫିଲ୍ମ ଫ୍ଲପ୍ ହେଉଥିବା କେତେଜଣ ମତ ପ୍ରକାଶ କରିଛନ୍ତି।
କରୋନା କଟକଣା ହଟିବା ପରେ ପାଖାପାଖି ୨୬ଟି ବଲିଉଡ୍ ଫିଲ୍ମ ରିଲିଜ୍ ହୋଇଛି, ଯେଉଁଥିରୁ ୨୨ରୁ ୭୭ ପ୍ରତିଶତ ଫ୍ଲପ୍। ୨୦୧୬ରେ ନେଟଫ୍ଲିକ୍ସ ଏବଂ ଆମାଜନ ଏଣ୍ଟରଟେନ୍ମେଣ୍ଟ ମଇଦାନକୁ ଓହ୍ଲାଇଥିଲେ। ପ୍ରାରମ୍ଭିକ ସମୟରେ ଏହି ଦୁଇ ଓଟିଟି ପ୍ଲାଟଫର୍ମ ଆମେରିକା, ୟୁରୋପର କଣ୍ଟେଣ୍ଟ୍ ସବୁ ବ୍ୟବହାର କରି ଓ୍ବେବ୍ ସିରିଜ୍ମାନ ତିଆରି କରିବା ଆରମ୍ଭ କରାଯାଇଥିଲା। ଭାରତର ଏକଚତୁର୍ଥାଂଶ ଲୋକଙ୍କ କ୍ଷେତ୍ରରେ ଓଟିଟି ପ୍ଲାଟଫର୍ମ ବ୍ୟବହାରର ବୃଦ୍ଧି ଘଟିଛି। ୨୦୧୯ରେ ଏହାର ଚାହିଦା ୧୨% ବୃଦ୍ଧି ଘଟିଥିବାବେଳେ ୨୦୨୭ ବେଳକୁ ଏହା ୩୧%ରେ ପହଞ୍ଚିବ ବୋଲି କୁହାଯାଉଛି। ଟିକେଟ ବିକ୍ରି କମିଥିବାବେଳେ ବଲିଉଡ୍ ଇଣ୍ଡଷ୍ଟ୍ରିରୁ ଆଦାୟ ହେଉଥିବା ଟିକସର ପରିମାଣ ୪୫ % କମିଥିବା ଖବର ପ୍ରକାଶ ପାଇଛି। ମିଡିଆ ଆନାଲିଷ୍ଟ କରନ ତଉରାନିଙ୍କ ମତରେ, ସୁପରଷ୍ଟାର ଅଭିନୟ କରୁଥିବା ଫିଲ୍ମ ଗୁଡ଼ିକର ସ୍କ୍ରିପ୍ଟ ଓ ସିନ୍ ସବୁ ସେମାନଙ୍କ ନିୟନ୍ତ୍ରଣରେ ରହୁଛି। ଡରରେ ଏଥିରେ କୌଣସି ନିର୍ଦ୍ଦେଶକ ତଥା ପ୍ରଯୋଜକ ହସ୍ତକ୍ଷେପ କରୁ ନାହାନ୍ତି। ଚଳଚ୍ଚିତ୍ର ବ୍ୟବସାୟରୁ ଲାଭବାନ ହେବା ଲାଗି କେତେଜଣ ପ୍ରଯୋଜକ ରେଭିନ୍ୟୁ ଶେୟାରିଂ ମଡେଲମାନଙ୍କୁ ଫିଲ୍ମରେ ନେଉଛନ୍ତି। ଫିଲ୍ମକୁ ମନୋରଞ୍ଜନର ଏକ ମାଧ୍ୟମ ବଦଳରେ ରୋଜଗାରର ଏକ ମାଧ୍ୟମ ଭାବିବା କାରଣରୁ ବର୍ତ୍ତମାନ ଶହେ ବର୍ଷର ଇଣ୍ଡଷ୍ଟ୍ରିର ସ୍ଥିତି ଟଳମଳ ଅବସ୍ଥାରେ ରହିଛି।
