ପାରଳାଖେମୁଣ୍ଡି,୩ା୧(ଡି.ଏନ୍.ଏ.): ଗଜପତି ଜିଲାକୁ ଲାଗି ରହିଥିବା ଆନ୍ଧ୍ରପ୍ରଦେଶ ଶ୍ରୀକାକୁଲମ୍ ଜିଲାର ଚାପାରା ଜିଲା ପରିଷଦ ଉଚ୍ଚ ବିଦ୍ୟାଳୟ। ସ୍ବାଧୀନତା ପରେ ସୀମା ନିର୍ଦ୍ଧାରଣ ବେଳେ ଆନ୍ଧ୍ରପ୍ରଦେଶରେ ରହିଯାଇଥିବା ବହୁ ଓଡିଆ ଛାତ୍ରୀଛାତ୍ର ଏଠାରେ ଅଧ୍ୟୟନ କରନ୍ତି। ତେବେ ଆନ୍ଧ୍ର ସରକାର ନଭେମ୍ବର ୨ରୁ ସ୍କୁଲ ଖୋଲିଥିବାବେଳେ ମେ’ରେ ପରୀକ୍ଷା ଘୋଷଣା କରିଛନ୍ତି। ଏଯାଏ ସେଠାରେ ଥିବା ଓଡ଼ିଆ ବିଦ୍ୟାଳୟରେ ଛାତ୍ରୀଛାତ୍ରଙ୍କୁ ଓଡ଼ିଆ ସାହିତ୍ୟ ବହି ମିଳି ନ ଥିବାରୁ ପରୀକ୍ଷାରେ କ’ଣ ଲେଖିବେ ସେ ନେଇ ଚିନ୍ତାରେ।
ଆନ୍ଧ୍ରପ୍ରଦେଶ ଓ ଓଡିଶା ମଧ୍ୟରେ ହୋଇଥିବା ଚୁକ୍ତି ଅନୁଯାୟୀ, ଆନ୍ଧ୍ରପ୍ରଦେଶ ସରକାରୀ ସ୍କୁଲରେ ପଢୁଥିବା ଓଡ଼ିଆ ପିଲାଙ୍କୁ ଓଡିଆ ସାହିତ୍ୟ ବହି ଓ ଓଡ଼ିଶାରେ ପଢୁଥିବା ତେଲୁଗୁ ପିଲାଙ୍କୁ ଆନ୍ଧ୍ର ସରକାର ତେଲୁଗୁ ସାହିତ୍ୟ ବହି ଶିକ୍ଷାବର୍ଷ ଆରମ୍ଭରୁ ଯୋଗାଇ ଦେବେ। କିନ୍ତୁ ଆନ୍ଧ୍ରରେ ପଢୁଥିବା ଓଡିଆ ପିଲାଙ୍କୁ ଏଯାଏ ଓଡିଆ ସାହିତ୍ୟ ବହି ମିଳିନାହିଁ। ପାଖାପାଖି ୧୨,୫୦୦ ଓଡିଆ ପିଲା ଏହା ଦ୍ୱାରା ପ୍ରଭାବିତ ହୋଇଛନ୍ତି। ପ୍ରଥମରୁ ୧୦ମ ଯାଏ ଛାତ୍ରୀଛାତ୍ରଙ୍କ ପାଇଁ ଓଡିଶା ସରକାର ଜୁନ୍ ମାସରେ ସାହିତ୍ୟ ବହି ଯୋଗାଇବା କଥା, କିନ୍ତୁ ଆଜି ଯାଏ ଯୋଗାଇ ନପାରିବାରୁ ପୁରୁଣା ବହିରେ ଶିକ୍ଷାଦାନ କରୁଛନ୍ତି ଆନ୍ଧ୍ରପ୍ରଦେଶ ସରକାରୀ ସ୍କୁଲର ଶିକ୍ଷକ ମାନେ। ଆନ୍ଧ୍ରର ଶ୍ରୀକାକୁଲମ ଜିଲାରେ ଓଡିଆରେ ୧୮୫ଟି ସ୍କୁଲରେ ବିଛିନ୍ନାଞ୍ଚଳର ଓଡିଆ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେହିପରି ଆନ୍ଧ୍ରପ୍ରଦେଶର ବିଜୟନଗରମ୍ ଓ ବିଶାଖାପାଟନାମ୍ରେ ମଧ୍ୟ ବିଛିନ୍ନାଞ୍ଚଳର ଓଡିଆ ଛାତ୍ରଛାତ୍ରୀ ପାଠ ପଢୁଛନ୍ତି। ବାରମ୍ବାର ଏପରି ଅବହେଳା ଯୋଗୁ ଆନ୍ଧ୍ରରେ ଓଡିଆ ପଢିବାକୁ ବିଛିନ୍ନାଞ୍ଚଳର ଛାତ୍ରଛାତ୍ରୀ ଅରାଜି ହେଉଛନ୍ତି। ଫଳରେ ଦିନକୁ ଦିନ ଓଡ଼ିଆ ଛାତ୍ରୀଛାତ୍ରଙ୍କ ସଂଖ୍ୟା କମୁଛି ବୋଲି କୁହନ୍ତି, ଛାତ୍ରୀ ପୁଷ୍ପା ମାଝି, ସ୍ବାତୀ ଦଳାଇ, ଛାତ୍ର ମଧୁସୁଦନ ମାଝି ପ୍ରମୁଖ। ଆନ୍ଧ୍ର ସରକାର ନିଜ ସ୍କୁଲରେ କାର୍ଯ୍ୟରତ ଓଡିଆ ଶିକ୍ଷକଙ୍କ ସହାୟତାରେ ଓଡିଆରେ ମୁଦ୍ରିତ ଗଣିତ, ଭୌତିକ ବିଜ୍ଞାନ, ଜୀବ ବିଜ୍ଞାନ, ସାମାଜିକ ଶିକ୍ଷା ଓ ପରିବେଶ ବିଜ୍ଞାନ ଭଳି ବିଷୟର ବହି ଅନୁବାଦ କରାଇ ଡିଟିପି ସହ ବହି ପ୍ରସ୍ତୁତ କରି ପ୍ରତ୍ୟେକ ବର୍ଷ ଓଡିଆ ପଢୁଥିବା ଛାତ୍ରଛାତ୍ରୀଙ୍କୁ ଯୋଗାଇ ଆସୁଛନ୍ତି। ଆନ୍ଧ୍ରପ୍ରଦେଶର ସରକାରୀ ସ୍କୁଲ ଶିକ୍ଷକ ମାନେ ଓଡିଶା କେବଳ ଗୋଟିଏ ସାହିତ୍ୟ ବହି ଠିକ୍ ଭାବେ ଯୋଗାଇ ପାରୁନଥିବାରୁ କ୍ଷୋଭ ପ୍ରକାଶ କରିଛନ୍ତି ଚାପାରା ଜିଲା ପରିଷଦ ଉଚ୍ଚ ବିଦ୍ୟାଳୟ ବିଜ୍ଞାନ ଶିକ୍ଷକ ବି.ରବିକୁମାର।
