ନିଶ୍ଚିନ୍ତକୋଇଲି, ୧୭।୪: ରାଜ୍ୟ ସରକାର ଶୁକ୍ରବାରଠାରୁ କୋଭିଡ୍ କଟକଣା କଡ଼ାକଡ଼ି କରିଛନ୍ତି। ଏହି ସମୟରେ ଜନ ସମାଗମକୁ ସ୍ବୀକୃତି ନ ଦେବା ପାଇଁ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଛି। ମାତ୍ର ନିଶ୍ଚିନ୍ତକୋଇଲି ବ୍ଲକ ପ୍ରଶାସନ ପକ୍ଷରୁ ନିଦ୍ଦେର୍ଶନାମାକୁ ଉଲ୍ଲଂଘନ କରାଯାଇଛି। ପ୍ରଶାସନ ପକ୍ଷରୁ ଶୁକ୍ରବାର ଭିନ୍ନକ୍ଷମ ସାମର୍ଥ୍ୟ ଶିବିର ଆୟୋଜନ କରାଯାଇଥିଲା। ମାତ୍ର ସାମାଜିକ ଦୂରତା ଓ ମାସ୍କ ପିନ୍ଧିବା ଉପରେ ଧ୍ୟାନ ଦିଆଯାଇ ନ ଥିବା ଅଭିଯୋଗ ହୋଇଛି। ଶିବିରରେ ୩୫୮ ଜଣ ଯୋଗ ଦେଇଥିଲେ। ଅସ୍ଥିଶଲ୍ୟ ବିଭାଗର ୧୫୦, ସ୍ନାୟୁ ବିଭାଗରେ ୭, ମାନସିକ ବିଭାଗରେ ୭୦,ଚକ୍ଷୁ ବିଭାଗରେ ୭୨ ଓ ଶ୍ରବଣ ବିଭାଗରେ ୪୦ ଜଣ ଯୋଗଦେଇଥିଲେ। ସେମାନଙ୍କୁ ବିଭାଗୀୟ ଡାକ୍ତର ପରୀକ୍ଷା ନିରୀକ୍ଷା କରି ଭିନ୍ନକ୍ଷମ ଭାବେ ଚିହ୍ନଟ କରିଛନ୍ତି। କାର୍ଯ୍ୟକ୍ରମରେ ୧୫ ଜଣ ଦିବ୍ୟାଙ୍ଗଙ୍କୁ ବସ୍ ପାସ୍, ୨ ଜଣଙ୍କୁ ଟ୍ରାଇସାଇକେଲ, ୩ ଜଣଙ୍କୁ ଶ୍ରବଣ ଯନ୍ତ୍ର, ଜଣଙ୍କ ପାଇଁ ଲୋନ ବ୍ୟବସ୍ଥା କରାଯାଇଥିଲା ବେଳେ ଆଉ ଜଣକୁ ଆୟ ପ୍ରମାଣପତ୍ର ଦିଆଯାଇଛି। କାର୍ଯ୍ୟକ୍ରମରେ ଅଧ୍ୟକ୍ଷାଙ୍କ ପ୍ରତିନିଧି ଅଶୋକ ଓଝା, ବିଜେଡି ସଭାପତି ରମାକାନ୍ତ ମହାନ୍ତି, ବିଡିଓ କର୍ଣ୍ଣଦେବ ସମାଦ୍ଧାର, ଜିପିଓ ଜନ୍ମେଜୟ ରାଉତ, ସମାଜ ମଙ୍ଗଳ ଅଧିକାରିଣୀ ମଧୁସ୍ମିତା ସାହୁ ଓ ଅତିରିକ୍ତ ବିଡିଓ ସୁୁଶାନ୍ତ ରଣା ପ୍ରମୁଖ ଯୋଗ ଦେଇଥିଲେ। ତେବେ କୋଭିଡ୍ କଟକଣା ଜାରି ହେବା ସତ୍ତ୍ୱେ ପ୍ରଶାସନ ପକ୍ଷରୁ କିଭଳି ଏତେବଡ଼ ଶିବିରର ଆୟୋଜନ କରାଯାଇଥିଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ବିଡିଓ କର୍ଣ୍ଣଦେବ ସମାଦ୍ଧାର କୁହନ୍ତି, କଟକଣା ଜାରି ହେବା ପୂର୍ବରୁ ଶିବିର ନିମନ୍ତେ ଆୟୋଜନ ସରିଯାଇଥିବାରୁ କାର୍ଯ୍ୟକ୍ରମ କରାଯାଇଥିଲା। ଏଥିସହ ପ୍ରଶାସନ ପକ୍ଷରୁ ସମସ୍ତଙ୍କୁ ମାସ୍କ ବଣ୍ଟନ କରାଯାଇଛି।
