ଖୋର୍ଦ୍ଧା ଅଫିସ,୩୦।୧୦: ଖୋର୍ଦ୍ଧା ପୌରପାଳିକା ଅଞ୍ଚଳରୁ ବାହାରୁଥିବା ଦୈନିକ ବର୍ଜ୍ୟବସ୍ତୁରୁ ଜୈବିକ ଖତ ପ୍ରସ୍ତୁତ ଲାଗି ଏକ ମାଇକ୍ରୋ କମ୍ପୋଷ୍ଟ କେନ୍ଦ୍ର ଏବଂ ପୃଥିକୀକରଣ କେନ୍ଦ୍ରକୁ ଗତ ଅଗଷ୍ଟ ୩୧ରେ ମୁଖ୍ୟମନ୍ତ୍ରୀ ଭିଡିଓ କନଫେରନ୍ସ ମାଧ୍ୟମରେ ଉଦ୍ଘାଟନ କରିଥିଲେ। ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ମୁକୁନ୍ଦପ୍ରସାଦ ଚାଚେରା ଶବର ସାହିଠାରେ ୫୬ଲକ୍ଷ ଅଟକଳରେ ଏହି ୟୁନିଟ୍ ନିର୍ମାଣ କରାଯାଇଛି। ପ୍ରାୟ ଦେଢ ମାସ ପରେ ପ୍ରଥମ ପର୍ଯ୍ୟାୟରେ ଜୈବିକ ଖତ ପ୍ରସ୍ତୁତ ହୋଇଛି। ଖୋର୍ଦ୍ଧା ପୌର ପରିଷଦ ପକ୍ଷରୁ ‘ମୋ ଖତ’ ନାମରେ ୫କେଜି ପ୍ୟାକେଟ ପ୍ରସ୍ତୁତ କରାଯାଇଛି। ଜିଲାପାଳ ସନତ୍ ମହାନ୍ତି ଏବଂ ପିଡି ଡିଆରଡିଏ ଦିଗନ୍ତ ରାଉତରାୟ ଏହି ପ୍ୟାକେଟକୁ ଗୁରୁବାର ଉଦ୍ଘାଟନ କରିଛନ୍ତି। ବଜାରରେ ବିକ୍ରି କରାଯିବା ନେଇ ଯୋଜନା ରହିଛି। ଏହାର ମୂଲ୍ୟ ଧାର୍ଯ୍ୟ ହୋଇନି। ପ୍ରଥମ ପର୍ଯ୍ୟାୟରେ ଶହେ କେଜି ଖତ ବାହାରିଛି। ଏହାର ଉପଲବ୍ଧତାକୁ ଅନୁଧ୍ୟାନ ପରେ ଆଗକୁ ଏହାକୁ ବ୍ୟାପକ କରାଯିବ। ଦ୍ୱିତୀୟ ପର୍ଯ୍ୟାୟରେ ଗୁରୁଜଙ୍ଗ ନବୋଦୟ ସ୍କୁଲ ନିକଟରେ ଆଉ ଏକ ୟୁନିଟ୍ ସ୍ଥାପନ କରାଯିବା ନେଇ ଯୋଜନା ରହିଛି ବୋଲି ପୌର ନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀ କହିଛନ୍ତି। ସୂଚନା ଅନୁଯାୟୀ, ଖୋର୍ଦ୍ଧା ପୌରାଞ୍ଚଳରେ ୪୬ହଜାରରୁ ଊର୍ଦ୍ଧ୍ୱ ଜନସଂଖ୍ୟା ରହିଛି। ଦୈନିକ ସହରରୁ ୧୪ରୁ ୧୬ଟନ ଅଳିଆ ଆବର୍ଜନା ବାହାରିଥାଏ। ସେଥିରୁ ୪୦ପ୍ରତିଶତ ଶୁଖିଲା ଏବଂ ୬୦ପ୍ରତିଶତ ଓଦା ବର୍ଜ୍ୟବସ୍ତୁ ରହିଥାଏ। ୫୦ଲକ୍ଷ ଅଟକଳରେ ୨୫ମିଟର ଲମ୍ବ, ୧୭ମିଟର ଚଉଡ଼ାରେ ନିର୍ମିତ ହୋଇଥିବା ଜୈବିକ ଖତ ପ୍ରସ୍ତୁତି କେନ୍ଦ୍ର(ଏମସିସି)ରେ ୧୪ଟି କୁଣ୍ଡ ନିର୍ମାଣ କରାଯାଇଛି। ପ୍ରତ୍ୟେକ ଲମ୍ବ କୁଣ୍ଡର ୩.୩ମି, ପ୍ରସ୍ଥ ୨.୩ମି ଏବଂ ଏକ ମିଟର ଉଚ୍ଚତା ରହିଛି। ଗୋଟିଏ କୁଣ୍ଡରେ ୫ଟନ ପର୍ଯ୍ୟନ୍ତ ବର୍ଜ୍ୟବସ୍ତୁ ପକାଯିବ। ସେଥିରୁ ୫ଶହ କେଜି ପର୍ଯ୍ୟନ୍ତ ଖତ ବାହାରିବ। ଦୁଇଟି ପର୍ଯ୍ୟାୟରେ ଖତ ପ୍ରସ୍ତୁତ ହୋଇଥାଏ। ବାହାରୁ ଆସିଥିବା ଓଦା ବର୍ଜ୍ୟବସ୍ତୁକୁ ପ୍ରଣାଳୀ ଅନୁସାରେ ତିନି ଥାକରେ ଏହି କୁଣ୍ଡ ପୂର୍ଣ୍ଣ କରାଯାଏ। କୁଣ୍ଡ ପୂର୍ଣ୍ଣ ହେବାକୁ ୨୧ଦିନ ଲାଗିଥାଏ। ପରବର୍ତ୍ତୀ ୨୧ଦିନରେ ଏହା ଖତରେ ପରିଣତ ହୋଇଥାଏ। ମୋଟ୍ ୪୨ଦିନରେ ଖତ ପ୍ରସ୍ତୁତ ହୋଇଥାଏ ବୋଲି ପୌର ପରିଷଦର ସାନିଟାଇଜ ଏକ୍ସପର୍ଟ ଦେବାଶିଷ ବରାଳ କହିଛନ୍ତି।
