ବରଗଡ଼ ଅଫିସ,୧୦।୪: ବିଦ୍ୟୁତ୍ କ୍ଷେତ୍ରର ଘରୋଇକରଣ ବନ୍ଦ କରିବା ଏବଂ କେନ୍ଦ୍ର ସରକାର ଦ୍ୱାରା ପ୍ରସ୍ତାବିତ ବିଦ୍ୟୁତ୍ ସଂଶୋଧିତ ବିଲ୍-୨୦୨୨ ବାତିଲକୁ ନେଇ ଦେଶବ୍ୟାପୀ ଆନ୍ଦୋଳନ ପାଇଁ ପ୍ରସ୍ତୁତି ଚାଲିଥିବା ସୂଚନା ମିଳିଛି। ବିଦ୍ୟୁତ୍ ଦର ବୃଦ୍ଧି ସହ କମ୍ପାନୀଗୁଡିକ ଉପଭୋକ୍ତାଙ୍କ ଉପରେ ଦିନକୁ ଦିନ ଅତ୍ୟାଚାର ଚଳାଇଥିବା ଅଭିଯୋଗ ହୋଇଛି। ଏହି କ୍ରମରେ ‘ଅଲ୍ ଇଣ୍ଡିଆ ଇଲେକ୍ଟ୍ରିସିଟି କଞ୍ଜ୍ୟୁମର ଆସୋସିଏଶନ’ ନାମରେ ରାଷ୍ଟ୍ରୀୟ ସ୍ତରରେ ଏକ ସଙ୍ଗଠନ ଗଠନ କରାଯାଇଛି। ଶନିବାର ଏବଂ ରବିବାର ଭୋପାଳଠାରେ ଉକ୍ତ ସଙ୍ଗଠନର ଦୁଇ ଦିନିଆଁ କର୍ମକର୍ତ୍ତା ସମ୍ମିଳନୀ, ସାଧାରଣ ସଭା ଅନୁଷ୍ଠିତ ହୋଇଥିଲା। ଏଥିରେ ଜୟ କିଷାନ ଆନ୍ଦୋଳନର ସଭାପତି ସୁଶିଲ କୁମାର ସାହୁ ଓ ସମ୍ପାଦକ ହର ବଣିଆଁ ଅଂଶଗ୍ରହଣ କରିଥିଲେ। ସଙ୍ଗଠନର ରାଷ୍ଟ୍ରୀୟ ଅଧ୍ୟକ୍ଷ ଶୈଳେନ୍ଦ୍ର ଦୁବେ, ରାଷ୍ଟ୍ରୀୟ ସାଧାରଣ ସମ୍ପାଦକ ସମର କୁମାର ସିଂହଙ୍କ ସମେତ ସମସ୍ତ ପଦାଧିକାରୀ ବିଦ୍ୟୁତ୍ କ୍ଷେତ୍ରର ଘରୋଇକରଣ ବିରୋଧରେ ରଣହୁଙ୍କାର ଦେଇ ଦେଶବ୍ୟାପୀ ଆନ୍ଦୋଳନ ପାଇଁ ଆହ୍ବାନ ଦେଇଥିଲେ। ସଧ୍ୟାରେ ଭୋପାଳ ସ୍ଥିତ ଗାନ୍ଧୀ ଭବନରେ ତିନୋଟି ଅଧିବେଶନରେ ଏ ସମ୍ପର୍କରେ ଆଲୋଚନା ହୋଇଥିଲା। ପ୍ରଥମ ଅଧିବେଶନରେ ଜୟ କିଷାନ ଆନ୍ଦୋଳନର ସମ୍ପାଦକ ବଣିଆଁ ଓଡିଶା ସରକାର ବିଜୁଳି କ୍ଷେତ୍ରର ଘରୋଇକରଣ କରିବା ପରେ ଉକ୍ତ କମ୍ପାନୀର ଦୌରାତ୍ମ୍ୟ ବଢି ଚାଲିଥିବା ବିଷୟରେ ଆଲୋଚନା କରିଥିଲେ। ଜୟ କିଷାନ ଆନ୍ଦୋଳନ ସଭାପତି ସାହୁ ଜଳସେଚନ ସହ ବିଦ୍ୟୁତ୍ର ସମ୍ପର୍କ ରହିଥିବା ବେଳେ କୃଷିକ୍ଷେତ୍ରରେ ବ୍ୟବହୃତ ବିଦ୍ୟୁତ୍ ବିଲ୍ ଛାଡ କରିବାକୁ ଦାବି ଉପସ୍ଥାପନ କରିଥିଲେ। ଏହି ସମ୍ମିଳନୀରେ ଏକ ରାଷ୍ଟ୍ରୀୟ କମିଟି ଗଠନ କରାଯାଇଛି। କମିଟିରେ ଜୟ କିଷାନ ଆନ୍ଦୋଳନର ହର ବଣିଆଁ ଏବଂ ସୁଶୀଲ କୁମାର ସାହୁ ରହିଛନ୍ତି। ଏହି ସମ୍ମିଳନୀରେ ଓଡିଶାର ବିଭିନ୍ନ ଜିଲାରୁ ୧୭ ଜଣ ପ୍ରତିନିଧି ଯୋଗ ଦେଇଥିଲେ।
