ଗୁଆହାଟୀ,୨୩।୧(ଆଇଏଏନ୍ଏସ୍): ଆସାମ କରିମଗଞ୍ଜ ଜିଲା ବାସିନ୍ଦା ରଞ୍ଜିତ ଦାସଙ୍କ ନାଗରିକତ୍ୱକୁ ନେଇ ବିବାଦ ଦେଖାଦେଇଥିଲା। ସ୍ଥାନୀୟ ଫରେନର୍ସ ଟ୍ରିବ୍ୟୁନାଲଙ୍କ ନିକଟରେ ସେ ଦାଖଲ କରିଥିବା ଅଧିକାଂଶ ଦସ୍ତାବିଜ୍ରେ ତାଳମେଳ ନ ଥିବାରୁ ୯ ବର୍ଷ ପୂର୍ବେ କୋର୍ଟ ତାଙ୍କୁ ବିଦେଶୀ ଘୋଷଣା କରିଥିଲେ। ରଞ୍ଜିତ ଦାଖଲ କରିଥିବା ଏକାଧିକ ଦସ୍ତାବିଜ୍ରେ ତାଙ୍କ ପୂର୍ବପୁରୁଷଙ୍କ ନାମ ଭିନ୍ନ ଥିଲା। ସେଥିରେ ବାପାଙ୍କ ନାଁ ନନ୍ଦଲାଲ ଦାସ ଥିବାବେଳେ ରଞ୍ଜିତଙ୍କ ଦଶମ ଶ୍ରେଣୀ ଆଡମିଟ୍ କାର୍ଡରେ ବାପାଙ୍କ ନାମ ନନ୍ଦକୁମାର ଦାସ ରହିଥିଲା।
ସେହିପରି ତାଙ୍କ ଜେଜେବାପାଙ୍କ ନାମ ମଧ୍ୟ ବିଭିନ୍ନ କାଗଜପତ୍ରରେ ଅଲଗା ରହିଥିଲା। ଭାରତୀୟ ନାଗରିକତ୍ୱ ପ୍ରମାଣ ପାଇଁ ଆବଶ୍ୟକ ଅନ୍ୟାନ୍ୟ ଦସ୍ତାବିଜ ଦାଖଲ କରିବାରେ ରଞ୍ଜିତ୍ ବିଫଳ ହୋଇଥିଲେ। ତେଣୁ ସେ ଜଣେ ବିଦେଶୀ ଏବଂ ୧୯୭୧ ପରେ ବେଆଇନ ଭାବେ ଭାରତରେ ପ୍ରବେଶ କରିଥିବା କରିମଗଞ୍ଜ ଫରେନର ଟ୍ରିବ୍ୟୁନାଲ କୋର୍ଟ ୯ ବର୍ଷ ପୂର୍ବେ ଘୋଷଣା କରିଥିଲେ। ଏହାକୁ ଚ୍ୟାଲେଞ୍ଜ କରି ସେ ଗୁଆହାଟୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଭିନ୍ନ ଭିନ୍ନ ଭୋଟର ତାଲିକାରେ ରଞ୍ଜିତଙ୍କ ବାପାଙ୍କ ନାମ ନନ୍ଦଲାଲ ଥିବାବେଳେ କେବଳ ଆଡମିଟ୍ କାର୍ଡରେ ନନ୍ଦକୁମାର ହୋଇଛି। ତେଣୁ ନାଗରିକତ୍ୱ ପ୍ରମାଣ ଲାଗି ତାଙ୍କୁ ଆଉ ଏକ ସୁଯୋଗ ଦେବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।
