ଲହୁଣୀପଡ଼ା/ବଣାଇଁ,୪।୪(ଡ଼ି.ଏନ୍.ଏ./ସ.ପ୍ର.): ସୁନ୍ଦରଗଡ଼ ଜିଲା ବଣାଇ ଉପଖଣ୍ଡ ମହୁଲପଦା ସଂରକ୍ଷିତ ଜଙ୍ଗଲରେ ଅଫିମ ଚାଷ ହେଉଥିବା ଖବର ମିଳିବା ପରେ ସୋମବାର ପୋଲିସ, ଅବକାରୀ ବିଭାଗ ଓ ବନବିଭାଗ ସ୍କ୍ବାଡ ମିଳିତ ଭାବେ ଘଟଣଶସ୍ଥଳରେ ପହଞ୍ଚି ଥିଲା l ଅବକାରୀ ବିଭାଗ ସୁପରିଣ୍ଟେଣ୍ଡେଣ୍ଟ ଆସିଫ ଅଲ୍ଲୀଙ୍କ ନିର୍ଦ୍ଦେଶକ୍ରମେ ବିଭାଗୀୟ ଅଧିକାରୀ, ବଣାଇ ଉପଖଣ୍ଡ ପୋଲିସ ଅଧିକାରୀ ସ୍ବରାଜ ଦେବତା, ବଣାଇ ସହକାରୀ ଜିଲାପାଳ ରାଜ କିଶୋର ଜେନା, ମହୁଲପଦା ଥାନା ଅଧିକାରୀ ସୁଦର୍ଶନ ଦେହୁରୀ, ଲହୁଣିପଡା ଥାନା ଅଧିକାରୀ ଜ୍ୟୋତି ରଞ୍ଜନ ପତି, ରାଉରକେଲା ଅବକାରୀ ଡେପୁଟି ସୁପରିଣ୍ଟେଣ୍ଡେଣ୍ଟ ସ୍ନେହଲତା ମହାନ୍ତ ପ୍ରମୁଖ ସମ୍ପୃକ୍ତ ଅଞ୍ଚଳରେ ଶୁଖିଲା ଅଫିମ ଗଛ ଥିବା ଦେଖି ପୋଡି ଦେଇଥିଲେ। ସଂରକ୍ଷିତ ଜଙ୍ଗଲରେ ଅଫିମ ଚାଷ ସମ୍ପର୍କରେ ବନବିଭାଗ କିପରି ଜାଣି ନ ପାରିଲା ତାହାକୁ ନେଇ ଏବେ ପ୍ରଶ୍ନ ଉଠିଛି।
ଲହୁଣୀପଡା ବ୍ଲକ ଅନ୍ତର୍ଗତ ମହୁଲପଦା ପଞ୍ଚାୟତର ନିଘଞ୍ଚ ଜଙ୍ଗଲ ପାହାଡ଼ ଉପରେ ଥିବା କିରି, କେତ, କୁନୁ, କୁଣ୍ଡଳା ଗ୍ରାମର କିରି ଗ୍ରାମରେ ବେନିୟମ ଭାବେ ଅଫିମ ଚାଷୀ ହୋଇଥିବା ଖବର ପାଇ ପୋଲିସ, ଅବକାରୀ ବିଭାଗ, ବନ ବିଭାଗ ମିଳିତ ଭାବେ ମାଜିଷ୍ଟ୍ରେଟଙ୍କ ଉପସ୍ଥିତରେ ଚଢ଼ାଉ କରି ଅଫିମ ଗଛ ଗୁଡିକୁ କାଟି ପୋଡି ନଷ୍ଟ କରି ଦେଇଥିବା ଜଣାପଡ଼ିଛି। ନିଘଞ୍ଚ ଜଙ୍ଗଲ ଭିତରେ ଦୁଇ ଏକରରୁ ଊର୍ଦ୍ଧ୍ୱ ଜମିରେ ବେନିୟମ ଭାବେ ଅଫିମ ଚାଷ ହେଉଥିଲା। ପୋଲିସ ଓ ପ୍ରଶାସନ ପାଖରେ ସୂଚନା ପହଞ୍ଚିବା ପୂର୍ବରୁ ବେନିୟମ ଅଫିମ ଚାଷୀ ବ୍ୟବସାୟୀମାନେ ଅମଳ କରି ନେଇ ଯାଇଥିବାବେଳେ ମାତ୍ର ୨୮ ଡ଼ିସିମିଲ ଜମିର ଅଫିମ ଗଛ ଗୁଡିକୁ ଅମଳ କରି ନେଇ ପାରି ନ ଥିବାରୁ ରହି ଯାଇଥିଲା। ଯାହାକି ସୋମବାର ମିଳିତ ଚଢ଼ାଉ ବେଳେ ସେହି ୨୮ ଡ଼ିସିମିଲ ଜମିରୁ ମାତ୍ର ୪ ହଜାର ୭ଶହ ଚାଷ ହୋଇଥିବା ଅଫିମ ଗଛକୁ କାଟି ପୋଡି ନଷ୍ଟ କରି ଦେଇଥିବା ଜଣାପଡ଼ିଛି।
