ଭୁବନେଶ୍ୱର, ୧୯।୫(ସୌମ୍ୟରଞ୍ଜନ ରାଉତ): ପହଲଗାମ୍ ଆତଙ୍କବାଦୀ ଆକ୍ରମଣ ପରେ ଭାରତ ପକ୍ଷରୁ ପାକିସ୍ତାନ ଉପରେ କରାଯାଇଥିବା ‘ଅପରେଶନ୍ ସିନ୍ଦୂର’କୁ ନେଇ ଦେଶସାରା ଗୋଟେ ‘ଘୋ’ ଚାଲିଛି। ଦୁଇ ଦେଶ ମଧ୍ୟରେ ଅସ୍ତ୍ରବିରତି ସ୍ଥିତି ସୃଷ୍ଟି ହୋଇଥିଲେ ମଧ୍ୟ ଅପରେଶନ ସିନ୍ଦୂର ଭାରତୀୟଙ୍କ ପାଇଁ ଶୌର୍ଯ୍ୟର ପ୍ରତୀକ ପାଲଟିଯାଇଛି। ପହଲଗାମ୍ରେ ଆତଙ୍କବାଦୀଙ୍କ ଆକ୍ରମଣରେ ପ୍ରାଣ ହରାଇଥିବା ସମସ୍ତ ୨୬ ଜଣ(ଜଣେ ନେପାଳ ନାଗରିକ) ଥିଲେ ପୁରୁଷ। ନାରୀମାନଙ୍କ ସିନ୍ଦୂର ଲିଭାଇ ଦେଇଥିବା ଆତଙ୍କବାଦୀଙ୍କୁ କଡ଼ା ଜବାବ ଦେବାକୁ ଯାଇ ଭାରତୀୟ ସେନା କରିଥିବା ଅତର୍କିତ ଆକ୍ରମଣ ପାକିସ୍ତାନ ଓ ପାକ୍ ଅଧିକୃତ କଶ୍ମୀର(ପିଓକେ)ରେ ଅନେକ ଆତଙ୍କବାଦୀଙ୍କୁ ନିପାତ କରିଦେବା ସହ ସେମାନଙ୍କ ଆଡ୍ଡା ଧ୍ୱଂସ କରିଦେଇଛି। ସେହି ବିଜୟର ସଙ୍କେତ ବହନ କରୁଥିବା ଅପରେଶନ ସିନ୍ଦୂରକୁ ଉଜ୍ଜୀବିତ କରିବା ଲାଗି ଦେଶବ୍ୟାପୀ ଚାଲିଛି ତ୍ରିରଙ୍ଗା ଯାତ୍ରା। ଏଥିରେ ସାମିଲ ହେଉଥିବା ଶୋଭାଯାତ୍ରାକାରୀଙ୍କ ମଧ୍ୟରେ କେତେକେ ସିନ୍ଦୂର ଧରିଥିବା ଦେଖିବାକୁ ମିଳିଛି। ସଂଯୋଗବଶତଃ ୨୬ ମେ’ରେ ସାବିତ୍ରୀ ବ୍ରତ ଥିବାରୁ ବଜାରରେ ସିନ୍ଦୂର ଚାହିଦା ବଢ଼ିବା ସହ ଏହି ଦରରେ ସାମାନ୍ୟ ବୃଦ୍ଧି ପାଇଥିବା ଦେଖିବାକୁ ମିଳିଛି। ସିନ୍ଦୂର ପ୍ୟାକେଟ ଉପରେ ‘ଅପରେଶନ ସିନ୍ଦୂର’ ଲେଖାଥିବା ବଜାରରେ ଦେଖିବାକୁ ମିଳିବା ପରେ ଭୁବନେଶ୍ୱରର କେତେ ଜଣଙ୍କ ମତାମତ ନେଇଥିଲୁ।
ସିନ୍ଦୂର ଦର ବଢ଼ିଛି
ଆଗକୁ ସାବିତ୍ରୀ ଓଷା। ବର୍ତ୍ତମାନ ସମୟରେ ମାର୍କେଟ୍ରେ ସିନ୍ଦୂରର ଚାହିଦା ରହିଛି। ଲୋକଙ୍କୁ ଆକର୍ଷିତ କରିବା ପାଇଁ ସିନ୍ଦୂର ପ୍ୟାକେଟ ଉପରେ ଅପରେଶନ ସିନ୍ଦୂର ଲେଖାଯାଇଥିବା ଦେଖିବାକୁ ପାଇଛୁ। ପୁଣି ଏହି ପ୍ୟାକେଟ୍ର ମୂଲ୍ୟରେ ମଧ୍ୟ ସାମାନ୍ୟ ପରିବର୍ତ୍ତନ ହୋଇଛି। ଆଗରୁ ଯାହା ୧୦ ଟଙ୍କା ରହିଥିଲା, ତାହା ଏବେ ୧୫ ଟଙ୍କା। ପ୍ରତ୍ୟେକ ପ୍ୟାକେଟ୍ରେ ୫ଟଙ୍କା ଲେଖାଏ ବଢ଼ିଛି। ଅପରେଶନ୍ ସିନ୍ଦୂର ପରେ ଲୋକେ ସିନ୍ଦୂର କିଣୁଥିବା ବିଷୟରେ ମଧ୍ୟ କଥାବାର୍ତ୍ତା ହେଉଛନ୍ତି।
-ସବିତାରାଣୀ ପୃଷ୍ଟି, ସାମାଜିକକର୍ମୀ
ନାଗରିକଙ୍କ ମନରେ ଭାବାବେଗ ସୃଷ୍ଟି ହୋଇଛି
ସିନ୍ଦୂରକୁ ନେଇ ସବୁବେଳେ ନାରୀଟିଏ ସମ୍ବେଦନଶୀଳ ଥାଏ। ମାତ୍ର ପାକିସ୍ତାନ ବିରୋଧରେ ଭାରତର ‘ଅପରେଶନ ସିନ୍ଦୂର’ ପରେ ଏହାକୁ ନେଇ ରାଜ୍ୟ ତଥା ଦେଶର ପ୍ରତି ନାଗରିକଙ୍କ ମନରେ ଏକ ଭାବାବେଗ ସୃଷ୍ଟି ହୋଇଛି। ଏପରିକି ବିଭିନ୍ନ ରାଜନୈତିକ ଦଳ ଓ ଅନ୍ୟାନ୍ୟ ଅନୁଷ୍ଠାନ ପକ୍ଷରୁ ଶୋଭାଯାତ୍ରା, ପଦଯାତ୍ରା ଆଦି ଆୟୋଜନବେଳେ ସିନ୍ଦୂର କିଣୁଛନ୍ତି। ତେଣୁ ପୂର୍ବାପେକ୍ଷା ସିନ୍ଦୂରର ବିକ୍ରି ଟିକେ ଅଧିକ ହୋଇଛି। ସେହିପରି ଆଗକୁ ସାବିତ୍ରୀ ବ୍ରତ ଥିବାରୁ ସେଥିପାଇଁ ମହିଳାମାନେ ସିନ୍ଦୂର କିଣିବା ଆରମ୍ଭ କରିଦେଲେଣି ।
-ସଞ୍ଜୟ ସାହୁ, ବ୍ୟବସାୟୀ
‘ସିନ୍ଦୂର’ ଶବ୍ଦର ଗରିମା ବଢ଼ିଯାଇଛି
‘ଅପରେଶନ୍ ସିନ୍ଦୂର’ ପରେ ‘ସିନ୍ଦୂର’ ଶବ୍ଦର ଗରିମା ବଢ଼ି ଯାଇଛି। ଏହା କେବଳ ନାଲି ରଙ୍ଗ ବା ନାରୀ ମଥାର ସିନ୍ଦୂର ନୁହେଁ, ବରଂ ଏବେ ଏହା ଦେଶପ୍ରେମର ଅନ୍ୟତମ ପ୍ରତୀକ ପାଲଟିଛି। ଘରେ ଘରେ ଅପରେଶନ୍ ସିନ୍ଦୂର ସମ୍ପର୍କରେ ଆଲୋଚନା ହେଉଛି। ପାକିସ୍ତାନକୁ ଭାରତର କଡ଼ା ଜବାବ୍ ହେଉଛି ଏହି ଅପରେସନ ସିନ୍ଦୂର। ଏବେ ବଜାରରେ ମଧ୍ୟ ନୂଆ ପ୍ୟାକେଟ୍ରେ ଅପରେଶନ୍ ସିନ୍ଦୂର ଲୋଗୋରେ ସିନ୍ଦୂର ଉପଲବ୍ଧ ହେଉଛି। ତାହାକୁ ଦେଖି ଆମ ମନରେ ଦେଶପ୍ରେମ ଜାଗ୍ରତ ହେଉଛି।
-ସୁଚିତ୍ରା ମଲ୍ଲ, ଗୃହିଣୀ
