ଭୁବନେଶ୍ୱର,୨୩।୮(ବ୍ୟୁରୋ):ରାଜଧାନୀରେ ରାଜସ୍ବ ଆଦାୟ କ୍ଷେତ୍ରରେ ପଛରେ ପଡ଼ିଯାଇଛି ବିଏମ୍ସି। ହୋଲ୍ଡିଂ ଟିକସ ଏବଂ ଅନ୍ୟାନ୍ୟ କର ଆଦାୟ କରିବାରେ ୱାର୍ଡ ଅଧିକାରୀମାନେ ଆଖିଦୃଶିଆ କାର୍ଯ୍ୟ କରିପାରୁ ନାହାନ୍ତି। ତେଣୁ ଆଗକୁ କିଭଳି ଠିକ୍ ଭାବେ ଏବଂ ଅଧିକ ରାଜସ୍ବ ଆଦାୟ କରିହେବ ସେନେଇ ବିଏମ୍ସି ନୂଆ ପଦକ୍ଷେପ ନେବାକୁ ଯୋଜନା କରିଛି। ଏହି ପରିପ୍ରେକ୍ଷୀରେ ସୋମବାର ଟିକସ ଆଦାୟ ସମ୍ପର୍କିତ ଏକ ସମୀକ୍ଷା ବୈଠକ ବିଏମ୍ସି କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି। ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଟ୍ରେଡ୍ ଲାଇସେନ୍ସ ଓ ହୋଲ୍ଡିଂ ଟିକସ ଆଦାୟ ସମ୍ପର୍କରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଲା। ‘ଭୁବନେଶ୍ୱର ଡଟ୍ ମି’ ଆପ୍ ମାଧ୍ୟମରେ ଟିକସ ପୈଠ କରିବାକୁ ସହରବାସୀଙ୍କୁ କିପରି ସଚେତନ କରାଯିବ ସେ ସମ୍ପର୍କରେ ଆଲୋଚନା କରାଯାଇଥିଲା। ଅଫ୍ଲାଇନ୍ ପରିବର୍ତ୍ତେ ଅନ୍ଲାଇନ୍ ଯୋଗେ ନାଗରିକମାନେ କିପରି ସହଜରେ ଟିକସ ପୈଠ କରିପାରିବେ, ସେନେଇ ୱାର୍ଡ ଅଫିସର କାର୍ଯ୍ୟ କରିବେ। ଯେଉଁମାନେ ଟିକସ ଦେଉ ନାହାନ୍ତି, ସେମାନଙ୍କଠାରୁ ଟିକସ ଆଦାୟ ପାଇଁ ପଦକ୍ଷେପ ନିଆଯିବ। ଏଥିସହ ବେଆଇନ ବିଜ୍ଞାପନ, ହୋର୍ଡିଂ, ପାର୍କିଂ ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା।
ଅପରପକ୍ଷେ ମହାନଗର ନିଗମ ଅଞ୍ଚଳରେ ପାର୍କିଂ ଏବଂ ନୋ ପାର୍କିଂ ଅଞ୍ଚଳକୁ ନେଇ ଅନେକ ସମସ୍ୟା ରହିଛି। କେତେକ ସ୍ଥାନରେ ବେଆଇନ ପାର୍କିଂ ଫି ଆଦାୟ କରାଯାଉଥିବା ଅଭିଯୋଗ ହେଉଛି। ତେଣୁ ତାହା ଉପରେ ରୋକ ଲଗାଇବା ପାଇଁ ପଦକ୍ଷେପ ନିଆଯିବ। ନିଜ ୱାର୍ଡରେ ଥିବା ପାର୍କିଂ ସମସ୍ୟା ସମ୍ପର୍କରେ ଆସନ୍ତା ୭ଦିନ ମଧ୍ୟରେ ଜଣାଇବା ପାଇଁ ୱାର୍ଡ ଅଫିସରମାନଙ୍କୁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ମିଳିବା ପରେ ଏନେଇ ଆସନ୍ତା କର୍ପୋରେସନ ବୈଠକରେ ନିଷ୍ପତ୍ତି ନିଆଯିବ ବୋଲି କମିଶନର କୁଲାଙ୍ଗେ ସୂଚନା ଦେଇଛନ୍ତି। ସେହିପରି ଟିକସ ଖିଲାପକାରୀଙ୍କଠାରୁ ଟିକସ ଆଦାୟ କରି କିପରି ଚଳିତ ଆର୍ଥିକ ବର୍ଷରେ ବିଏମ୍ସି ଆୟ ବୃଦ୍ଧି କରିବା ସହ ଜନହିତକର କାର୍ଯ୍ୟରେ ବିନିଯୋଗ ହୋଇପାରିବ, ସେ ଦିଗରେ ଆଲୋଚନା କରାଯାଇଥିଲା।
ସୂଚନାଯୋଗ୍ୟ, ୨୦୨୧-୨୨ ଆର୍ଥିକ ବର୍ଷରେ ରାଜସ୍ବ ଆଦାୟରେ ବିଏମ୍ସି ମାଇଲଖୁଣ୍ଟ ସ୍ଥାପନ କରିଥିଲା। ଏହି ବର୍ଷ ମୋଟ ପ୍ରାୟ ୧୫୦କୋଟି ୫୧ଲକ୍ଷ ୮୫ହଜାର ୫୩ କୋଟି ଟଙ୍କା ରାଜସ୍ବ ଆଦାୟ କରାଯାଇଥିଲା। ଯାହାକି ବିଏମ୍ସିର ରାଜସ୍ବ ଆଦାୟ କ୍ଷେତ୍ରରେ ସର୍ବୋତ୍କୃଷ୍ଟ ରେକର୍ଡ। ତେଣୁ ଚଳିତ ଆର୍ଥତ୍କ ବର୍ଷ ଅର୍ଥାତ୍ ୨୦୨୨-୨୩ରେ ଏହି ରେକର୍ଡକୁ ବଜାୟ ରଖିବା ସହ ଆହୁରି ଅଧିକ ରାଜସ୍ବ ଆଦାୟ ପାଇଁ ବିଏମ୍ସି ଲକ୍ଷ୍ୟ ରଖିଛି।
