ପୁରୀ ଅଫିସ,୭ା୯: ମହାମାରୀ କରୋନା ପାଇଁ ଏବେ ସମସ୍ତଙ୍କୁ ଆଉ ମିଳିବନି ମହାପ୍ରସାଦ। ଶ୍ରୀମନ୍ଦିର ରୋଷଶାଳାରେ ପୂର୍ବପରି ରନ୍ଧାଯିବ ନାହିିଁ ବରାଦି ଅବଢା। କେବଳ ପୁରୀବାସୀଙ୍କୁ ମିଳିବ ବରାଦି ମହାପ୍ରସାଦ। ସମ୍ପ୍ରତି କରୋନା ସଂକ୍ରମଣକୁ ଦୃଷ୍ଟିରେ ରଖି ପୁରୀ ଜିଲା ପ୍ରଶାସନର ନିର୍ଦ୍ଦେଶ କ୍ରମେ ଏହି ନିଷ୍ପତ୍ତି ନେଇଛି ସୁଆର ମହାସୁଆର ନିଯୋଗ। ରବିବାର ନିଯୋଗ ବୈଠକ ବସି ଆଲୋଚନା ହୋଇ ମହାପ୍ରସାଦ ପ୍ରସ୍ତୁତିକୁ କାଣ୍ଟଛାଣ୍ଟ କରାଯାଇଛି।
ସୁଆର ମହାସୁଆର ନିଯୋଗ ସମ୍ପାଦକ କୃଷ୍ଣଚନ୍ଦ୍ର ପ୍ରତିହାରୀ କହିଛନ୍ତି, ଶ୍ରୀମନ୍ଦିର ପ୍ରଶାସନ ନିର୍ଦ୍ଦେଶ ଅନୁଯାୟୀ କୋଭିଡ୍-୧୯ ପରିପ୍ରେକ୍ଷୀରେ କମ୍ ମହାପ୍ରସାଦ ରନ୍ଧାଯିବ। ବରାଦି ମହାପ୍ରସାଦ ଅଧିକ ରନ୍ଧାଯିବ ନାହିିଁ। ବର୍ତ୍ତମାନ ପିତୃପକ୍ଷ ଯୋଗୁ ଶ୍ରାଦ୍ଧ କର୍ମ ଚାଲିଛି। ଏଥିଲାଗି କେବଳ ପୁରୀ ସହରବାସୀ ଏବଂ ସେବାୟତ ପରିବାରଙ୍କ ଆବଶ୍ୟକତା ଅନୁଯାୟୀ ବରାଦି ଭୋଗ ରନ୍ଧାଯିବ। ବାହାର ଲୋକଙ୍କଠାରୁ ଅର୍ଡର (ବରାଦ) ରଖାଯିବ ନାହିଁ। ଦୈନିକ ପ୍ରାୟ ହଜାରରୁ ଦେଢ ହଜାର ଲୋକଙ୍କ ପାଇଁ ମହାପ୍ରସାଦ ପ୍ରସ୍ତୁତ କରାଯିବ। ଫଳରେ ପୂର୍ବରୁ ମହାପ୍ରସାଦ ପ୍ରସ୍ତୁତିରେ ଯେତେ ଲୋକ ଲାଗୁଥିଲେ ସେମାନଙ୍କ ସଂଖ୍ୟା ବି କମିବ। ଶ୍ରୀମନ୍ଦିରରେ ଭକ୍ତଙ୍କ ପ୍ରବେଶ କଟକଣା ପରଠାରୁ ୧୦୦ ବୋଝିଆ ଆସୁଥିଲେ। ଏବେ ୩୦ ଜଣ ଆସିବେ। ପାଣିଆ ଯୋଗାଣିଆ ୫୦ ଜଣଙ୍କ ଜାଗାରେ ୨୦ ଜଣ, ପନିପରିବା କାଟିବା ପାଇଁ ୧୦୦/୧୫୦ ଜଣ ଆସୁଥିବା ବେଳେ ଏବେ ୩୦ରୁ ୪୦ ଜଣ ମନ୍ଦିରକୁ ଯିବେ। ସେହିପରି ଅଧିକ ଅର୍ଡର ମଧ୍ୟ ରଖାଯିବ ନାହିିଁ ବୋଲି ପ୍ରତିହାରୀ ସୂଚନା ଦେଇଛନ୍ତି। ପୁରୀ ଜିଲାରେ କରୋନା ସଂକ୍ରମିତଙ୍କ ସଂଖ୍ୟା ବଢୁଛି। ଏପରି କି ଶ୍ରୀମନ୍ଦିର ସେବାୟତ ଏଥିରୁ ବାଦ୍ ପଡ଼ିିନାହାନ୍ତି। ବହୁ ସେବାୟତ ଏବଂ ତାଙ୍କ ପରିବାର ସଦସ୍ୟ ଏହି ମହାମାରୀ ଦ୍ୱାରା ସଂକ୍ରମିତ ହୋଇଛନ୍ତି। ଏହାକୁ ନଜରରେ ରଖି ଶ୍ରୀମନ୍ଦିର ପ୍ରଶାସନ ବରାଦି ମହାପ୍ରସାଦ ରନ୍ଧାକୁ ବନ୍ଦ କରିବା ଲାଗି ନିଷ୍ପତ୍ତି ନେଇଥିଲା। ଏ ସମ୍ପର୍କରେ ସୁଆର ମହାସୁଆର ନିଯୋଗ ସହ ଜିଲାପାଳ ବଲଓ୍ବନ୍ତ ସିଂ ଆଲୋଚନା କରି ଏହି ପ୍ରସ୍ତାବ ଦେଇଥିଲେ। ସେହି ଅନୁଯାୟୀ ରବିବାର ନିଯୋଗ ବୈଠକ ବସି ଉପରୋକ୍ତ ନିଷ୍ପତ୍ତି ହୋଇଛି।
ସୂଚନାଥାଉ କି, ଅବଢା ପାଇଁ ଶ୍ରୀମନ୍ଦିରର ବିଭିନ୍ନ ଦ୍ୱାରରେ ଦୈନିକ ଶ୍ରଦ୍ଧାଳୁଙ୍କ ଭିଡ଼ ହେଉଛି। ପର୍ବପର୍ବାଣି ଦିନରେ ସ୍ଥିତି ଅଣାୟତ୍ତ ହୋଇପଡୁଛି। କେହି ସାମାଜିକ ଦୂରତ୍ୱ ମାନୁନାହାନ୍ତି। ଏସବୁ ଦୃଷ୍ଟିରୁ ମନ୍ଦିର ପ୍ରଶାସନ ବରାଦି ମହାପ୍ରସାଦ ବନ୍ଦ ଲାଗି ନିଷ୍ପତ୍ତି ନେଇ ସୁଆର ମହାସୁଆର ନିଯୋଗକୁ ଅବଗତ କରାଇଥିଲା।
