ସ୍ମାର୍ଟସିଟିରେ ବଢୁଛି ଅନ୍ଲାଇନ୍ ଜୁଆଖେଳ, ୧ଟଙ୍କା ଲଗାଇଲେ ତିନିଗୁଣ ଟଙ୍କା ଜିତିବାର ପ୍ରଲୋଭନ
06 ରାଉରକେଲା,୧୮।୧(ବିପ୍ଳବ ରଞ୍ଜନ ଦାଶ): ରାଉରକେଲା ସ୍ମାର୍ଟସିଟି ସହରରେ ଅନ୍ଲାଇନ ଆପ୍ଲିକେଶନ ମାଧ୍ୟମରେ ଜୁଆଖେଳ ବୃଦ୍ଧି ପାଇବାରେ ଲାଗିଛି। ତରୁଣରୁ ବୃଦ୍ଧ ଯାଏ ତିନିଗୁଣା ଟଙ୍କା ଜିତିବା ଲୋଭରେ ମୋବାଇଲରେ ଏହି ଜୁଆ ଖେଳୁଛନ୍ତି। ବିଭିନ୍ନ ଅନ୍ଲାଇନ ଆପ୍ଲିକେଶନରେ ୧ଟଙ୍କା ଲଗାଇଲେ ତିନିଗୁଣ ଟଙ୍କା ଜିତିବା ପାଇଁ ପ୍ରଲୋଭିତ କରାଯାଉଛି। ଫଳରେ ଲୋକେ ଘରେ ବସି ଟଙ୍କା କମାଇବା ଲୋଭରେ ଦୈନିକ କୋଟି କୋଟି ଟଙ୍କା ଜୁଆ ଖେଳୁଛନ୍ତି। ଅନ୍ୟପକ୍ଷେ ସାଇବର କ୍ରାଇମ ବିଭାଗରେ ଭିତ୍ତିଭୂମି ଅଭାବ ଯୋଗୁ ଏଭଳି ଅନ୍ଲାଇନ ଜୁଆଖେଳ ବଢିଚାଲିଛି ବୋଲି ମତପ୍ରକାଶ ପାଇଛି।
ଏହି ଅନ୍ଲାଇନ ଆପ୍ଲିକେଶନରେ ଟଙ୍କା ଲଗାଇବାକୁ ଇଛୁକ ପ୍ରଥମେ ଏହି ଏହାକୁ ଇନଷ୍ଟଲ କରିବାକୁ କୁହାଯାଉଛି। ପରେ ନିଜ ବ୍ୟାଙ୍କ ଆକାଉଣ୍ଟରୁ ଟଙ୍କା ଆପ୍ଲିକେଶନ ପ୍ରୋଫାଇଲକୁ ନେଇ ଜମା କରିବା ପରେ ଇନଷ୍ଟଲ କରିଥିବା ବ୍ୟକ୍ତିଙ୍କ ହ୍ବାଟ୍ସଅପକୁ ମ୍ୟାସେଜ ଆସୁଛି। ମେସେଜରେ ବିଗ୍ ଏବଂ ସ୍ମଲ୍ ପ୍ଲାଟଫର୍ମରେ ୧ଟଙ୍କାରୁ ଖେଳ ଆରମ୍ଭ କରିବାକୁ କୁହାଯାଉଛି। ୧ଟଙ୍କା ହାରିଲା ପରେ ତିନି ଟଙ୍କା, ତିନି ଟଙ୍କା ହାରିବା ପରେ ୯ଟଙ୍କା, ୯ଟଙ୍କା ପରେ ୨୭ ଟଙ୍କା ଏଭଲି ଭାବେ କ୍ରମ ଅନୁସାରେ ଟଙ୍କା ଲଗାଇବାକୁ କୁହାଯାଉଛି। କିଛି ଲୋକ ତିନିଗୁଣା ଟଙ୍କା ବି ଜିତୁଛନ୍ତି। କିଛି ଲୋକ ଅଧିକ ଟଙ୍କା ଜିତିବା ଆଶାରେ ହଜାର ହଜାର ଟଙ୍କା ହାରୁଛନ୍ତି। ସବୁ କାରବାର ଅନ୍ଲାଇନରେ ଚାଲିଛି। କାହାକୁ ଏଭଲି ଅନ୍ଲାଇନ୍ ଜୁଆଖେଳ ଉପରେ ଖବର ହେଉନି। ଏପରିକି ପୋଲିସ ମଧ୍ୟ ଏହାର ଟେର ପାଉନି। ରାଉରକେଲାରେ ଦିନକୁ ଦିନ ଅନଲାଇନ ଜୁଆଖେଳ ବୃଦ୍ଧି ପାଉଥିଲେ ମଧ୍ୟ ଏହି ଖେଳର ମାଷ୍ଟରମାଇଣ୍ଡଙ୍କ ସୁରାଗ ମିଳିପାରୁନି। ଅନ୍ୟପକ୍ଷେ ଏହାକୁ ରୋକିବା ପାଇଁ ସହରରେ ସାଇବର ସଚେତନତା ଅଭିଯାନ ଆବଶ୍ୟକ। ଏଭଳି ଖେଳରେ ଲିପ୍ତ ବ୍ୟକ୍ତି ବିଶେଷଙ୍କୁ ଚିହ୍ନଟ କରି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦରକାର ବୋଲି ସହରର ବୁଦ୍ଧିଜୀବୀମାନେ ମତପ୍ରକାଶ କରିଛନ୍ତି।
ଏ ନେଇ ରାଉରକେଲା ଏସ୍ପି ମିତ୍ରଭାନୁ ମହାପାତ୍ର କୁହନ୍ତି, ଏଭଳି ଅନ୍ଲାଇନ ଜୁଆଖେଳକୁ ରୋକିବା ପାଇଁ ହେଲେ ଲୋକମାନେ ପୋଲିସକୁ ସହଯୋଗ କରିବା ଆବଶ୍ୟକ। ଏଭଳି ଖେଳଗୁଡିକୁ ପ୍ରଶ୍ରୟ ଦେଉଥିବା ବ୍ୟକ୍ତିଙ୍କ ବିରୋଧରେ ପ୍ରମାଣ ମିଳିଲେ ଏହାର ମାଷ୍ଟର ମାଇଣ୍ଡକୁ ସହଜରେ ଧରି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରନ୍ତା ବୋଲି ମହାପାତ୍ର କହିଥିଲେ। ସେହିପରି ବରିଷ୍ଠ ଆଇନଜୀବୀ ଗିରିଶ ମହାପାତ୍ର କହିଛନ୍ତି, ଏଭଳି ଅପରାଧ ରୋକିବା ପାଇଁ ପ୍ରଥମେ ରାଉରକେଲା ସାଇବର ବିଭାଗର ଭିତ୍ତିଭୂମି ମଜଭୁତ ହେବା ଆବଶ୍ୟକ। ସାଇବର କ୍ରାଇମ ବୈଷୟିକ ସମସ୍ତ ବ୍ୟବସ୍ଥା ସହ ଉଚ୍ଚକୋଟୀର ତାଲିମ ବ୍ୟବସ୍ଥା ଗ୍ରହଣ କରିବାକୁ ବାରମ୍ବାର ଦାବି ସତ୍ତ୍ୱେ ରାଉରକେଲା ସାଇବର ବିଭାଗର ଭିତ୍ତିଭୂମି ସଜଡା ହେଉନି। ଏହି ବିଭାଗରେ ମାତ୍ର ୪/୫ଜଣ ଅଧିକାରୀଙ୍କ ଉପରେ ସାଇବର ଅପରାଧ ନିୟନ୍ତ୍ରଣ ଦାୟିତ୍ୱ ରହିଛି। ଫଳରେ ସହରରେ ଏଭଳି ଅନ୍ଲାଇନ ଜୁଆଖେଳ ଚାଲିଛି ବୋଲି ସେ କହିଥିଲେ।