ଭଦ୍ରକ ଅଫିସ, ୨୦।୭-ଭଦ୍ରକ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ସ୍କୁଲ, କଲେଜ, ଆଶ୍ରମ ସ୍କୁଲ ଏଭଳିକି ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି। ଫଳରେ ଛାତ୍ରୀଛାତ୍ରମାନେ ଶିକ୍ଷାଠାରୁ ଧୀରେ ଧୀରେ ଦୂରେଇ ଯାଉଛନ୍ତି। ହେଲେ ବହୁ ଶିକ୍ଷାନୁଷ୍ଠାନ ଅନ୍ଲାଇନ ଶିକ୍ଷାକୁ ଏକ ମାଧ୍ୟମ ଭାବେ ବ୍ୟବହାର କରୁଛନ୍ତି। ରାଜ୍ୟ ସରକାରଙ୍କ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ପକ୍ଷରୁ ମଧ୍ୟ ଏକ ଅନ୍ଲାଇନ୍ ଚାଟଶାଳୀର ବ୍ୟବସ୍ଥା କରାଯାଇଛି। ଏହାଦ୍ୱାରା ବହୁ ଛାତ୍ରୀଛାତ୍ର ଉପକୃତ ହେଉଛନ୍ତି। ପ୍ରଥମେ ଗାଁ ମନ୍ଦିର କିମ୍ବା ଗଛମୂଳରେ ଶିକ୍ଷାଦାନ କରାଯାଉଥିଲା। ସଂକ୍ରମଣକୁ ଦୃଷ୍ଟିରେ ରଖି ଏହି ନିୟମରେ ୫ ଦିନ ଧରି ପରିବର୍ତ୍ତନ କରାଯାଇଛି ବୋଲି ଜିଲା ମଙ୍ଗଳ ଅଧିକାରୀ ଜୟନ୍ତ କୁମାର ଜେନା ସୂଚନା ଦେଇଛନ୍ତି। ଏବେ ଅନ୍ଲାଇନ୍ ମାଧ୍ୟମରେ ପାଠ ପଢ଼ାଯାଉଛି। ଏହି ପାଠପଢ଼ା ଦ୍ୱାରା ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ଅଧୀନରେ ଥିବା ୯ଟି ସ୍କୁଲର ୯୩୬ ଜଣ ଛାତ୍ରୀଛାତ୍ର ଉପକୃତ ହେଉଛନ୍ତି।
ମନ୍ଦିର ପ୍ରାଙ୍ଗଣ ଅବା ଗାଁ ବରଗଛ ତଳେ ମାସ୍କ ପିନ୍ଧି ଛାତ୍ରୀଛାତ୍ରଙ୍କୁ ହାତ ଧୁଆଇ ଶିକ୍ଷାଦାନ ଦିଆଯାଉଥିଲା। ସାମାଜିକ ଦୂରତ୍ୱ ରଖାଯାଇ କଳାପଟାରେ ଚାଟଶାଳୀ ଭଳି ପାଠ ପଢ଼ାଯାଉଥିଲା। ଏହି ଯୋଜନା ମାଧ୍ୟମରେ ଜିଲାର ୯ଟି ସ୍କୁଲରେ କାର୍ଯ୍ୟରତ ଥିବା ୩୬ ଜଣ ଶିକ୍ଷୟିତ୍ରୀ ଶିକ୍ଷକ ଗାଁକୁ ଗାଁ ବୁଲି ପାଠ ପଢ଼ାଉଥିଲେ। ଛାତ୍ରୀଛାତ୍ରଙ୍କ ସୁରକ୍ଷା ଦୃଷ୍ଟିକୋଣରୁ ମେ’ ୧୫ରୁ ଶିକ୍ଷାଦାନ ପ୍ରକ୍ରିୟାରେ ପରିବର୍ତ୍ତନ ଅଣାଯାଇଛି। ଏବେ ଶିକ୍ଷକମାନେ ମୋବାଇଲ ଥିବା ଜଣେ ପିଲାଙ୍କ ଘରକୁ ଯାଇ ସେଠାରୁ ଅନ୍ୟ ପିଲାମାନଙ୍କୁ ହ୍ବାଟ୍ସଆପ୍ ମାଧ୍ୟମରେ ଶିକ୍ଷାଦାନ କରୁଛନ୍ତି। ଏହିଭଳି ପାଠପଢାକୁ ଅଭିଭାବକମାନେ ସ୍ବାଗତ କରିଛନ୍ତି। ସପ୍ତାହର ଶନିବାର ଓ ରବିବାର ପାଠପଢ଼ା ବନ୍ଦ ରହୁଛି। ସପ୍ତାହରେ ଗୋଟିଏ ଦିନ ଘରକୁ ଘର ବୁଲି ପିଲାଙ୍କ ଖାତା ଯାଞ୍ଚ କରାଯାଉଥିବା ଜିଲା ମଙ୍ଗଳ ଅଧିକାରୀ ଜେନା ସୂଚନା ଦେଇଛନ୍ତି।
