ନୂଆଦିଲ୍ଲୀ,୮ା୭: କୁହାଯାଏ, ଭାଗ୍ୟ ଆଉ ଭଗବାନ ଯାହାକୁ ସାହା ହୁଅନ୍ତି ତା’ର କିଛି ବି ଅସୁବିଧା ହୁଏ ନାହିଁ। ଦିନେ ନା ଦିନେ ସେ ସଫଳତାର ଶୀର୍ଷରେ ପହଞ୍ଚିଥାନ୍ତି। ଦିନ ଥିଲା ପେଟ ପାଇଁ ସେ ଚା’ ବଗିଚାରେ ଶ୍ରମିକ ଭାବେ କାମ କରୁଥିଲେ। ଆଜି ମୋଦି ସରକାରଙ୍କ ମନ୍ତ୍ରୀ। ବୁଧବାର ମନ୍ତ୍ରିମଣ୍ଡଳ ସମ୍ପ୍ରସାରଣ ଅବସରରେ ଶପଥ ନେଇଥିବା ବେଳେ ଗୁରୁବାର ସେ ଦାୟିତ୍ୱ ଗ୍ରହଣ କରିଛନ୍ତି। ଆଉ କେହି ନୁହନ୍ତି, ସେ ହେଉଛନ୍ତି କେନ୍ଦ୍ର ସଂଖ୍ୟାଲଘୁ ରାଷ୍ଟ୍ରମନ୍ତ୍ରୀ ଜନ ବାର୍ଲା। ଚା’ ବଗିଚାରୁ ସଂସଦ ଭବନ, ଏବେ କେନ୍ଦ୍ର ମନ୍ତ୍ରୀ। ଜାଣନ୍ତୁ ତାଙ୍କ ସଂଘର୍ଷମୟ କାହାଣୀ ସମ୍ପର୍କରେ…
ପଶ୍ଚିମବଙ୍ଗ ଆଲିପୁରଦ୍ୱାର ଏମ୍ପି ଜନ ବାର୍ଲା । ସେ ଜଲପାଇଗୁଡ଼ିର ବନାରହାଟ ଲକ୍ଷ୍ମୀପାରା ବାସିନ୍ଦା। ମହାବୀର ହିନ୍ଦୀ ହାଇସ୍କୁଲରେ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପଢ଼ିଥିଲେ। ଅର୍ଥ ଅଭାବ ଯୋଗୁ ତାଙ୍କ ପାଠପଢ଼ାରେ ଡୋରି ବନ୍ଧା ହୋଇଥିଲା। ଫଳରେ ସେ ଚା ବଗିଚାର ଶ୍ରମିକ ଭାବେ କାମ କରିଥିଲେ।
୨୦୦୭ରେ ଚା’ ବଗିଚାରେ ଅସ୍ଥାୟୀ ଡ୍ରାଇଭର ଭାବେ କାମ କରିଥିଲେ। ମାତ୍ର ରାଜନୀତି ପ୍ରତି ତାଙ୍କର ଖୁବ୍ ଆଗ୍ରହ ଥିଲା। ସେ ଆଦିବାସୀ ସମାଜ ପାଇଁ ଅନେକ ଉନ୍ନୟନମୂଳକ କାର୍ଯ୍ୟ କରି ନାଁ କମାଇଥିଲେ। ୨୦୧୪ରେ ଦଳରେ ସାମିଲ ହୋଇଥିଲେ।୨୦୧୯ରେ ତାଙ୍କୁ ଦଳୀୟ ଟିକେଟ୍ ମିଳିଥିଲା। ଅଲିଦ୍ୱାରପୁର ଆସନରୁ ଜନ ବାର୍ଲା ବିଜୟୀ ହୋଇ ଲୋକ ସଭା ଆସିଥିଲେ।
