କଟକ ଅଫିସ, ୪।୮:ଅଲିଭ୍ ରିଡ୍ଲେ କଇଁଛ ସୁରକ୍ଷା ମାମଲାରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ଜବାବ ଦାଖଲ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ମଙ୍ଗଳବାର ହାଇକୋର୍ଟରେ ଏହି ମାମଲାର ଶୁଣାଣି ଥିବାବେଳେ ଉଭୟ ସରକାର ଜବାବ ଦାଖଲ କରିନାହାନ୍ତି। ଫଳରେ ହାଇକୋର୍ଟ କ୍ଷୁବ୍ଧ ହେବା ସହ ଉଭୟ ସରକାରଙ୍କୁ ସାନି ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ବିଚାରପତି ଏସ୍. ମୁରଲୀଧର ଓ ଜଷ୍ଟିସ ବି.ପି. ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ଏହି ଶୁଣାଣି କରିଛନ୍ତି। ସେପ୍ଟେମ୍ବର ୨୧ରେ ଏହାର ପରବର୍ତ୍ତୀ ଶୁଣାଣି ହେବ। ଏହି ସମୟ ମଧ୍ୟରେ ଉଭୟ ସରକାର କଇଁଛ ସୁରକ୍ଷା ନେଇ କି ପଦକ୍ଷେପ ନେଇଛନ୍ତି, ସେ ସମ୍ପର୍କରେ ସତ୍ୟପାଠ ଦାଖଲ କରିବେ। ସୂଚନାଯୋଗ୍ୟ, ଅଲିଭ୍ ରିଡ୍ଲେ କଇଁଛ ସୁରକ୍ଷା ପାଇଁ କ’ଣ ପଦକ୍ଷେପ ନିଆଯିବା ଦରକାର, ସେନେଇ ହାଇକୋର୍ଟଙ୍କ ତରଫରୁ ୩ ଜଣିଆ କମିଟି ଗଠନ କରାଯାଇଥିଲା। ଏହି କମିଟିରେ ବାଙ୍ଗାଲୋର ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ସାଇନ୍ସର ପ୍ରଫେସର କାର୍ତ୍ତିକ ଶଙ୍କର, ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ସିଇଓ ତଥା ନିର୍ଦ୍ଦେଶକ ସୁଶାନ୍ତ ନନ୍ଦ ଓ ଆମିକସ୍କ୍ୟୁରୀ ମୋହିତ୍ ଅଗ୍ରୱାଲ ରହିଛନ୍ତି। ଏହି କମିଟି ଗତ ମାର୍ଚ୍ଚ ୧୫ରେ ଏକ ରିପୋର୍ଟ ଦାଖଲ କରିଥିଲେ। ସେଥିରେ ଉଲ୍ଲେଖ ରହିଥିଲା ଯେ, ଅଲିଭ୍ ରିଡ୍ଲେ କଇଁଛ ସୁରକ୍ଷା ପାଇଁ ଗହୀରମଥା ଓ ଋଷିକୂଲ୍ୟା ନଦୀ ମୁହାଣକୁ ସୁରକ୍ଷିତ ରଖାଯାଉ। କିନ୍ତୁ କଇଁଛ ସୁରକ୍ଷା ନଁାରେ ମତ୍ସ୍ୟଜୀବୀଙ୍କ ଜୀବିକା ଉପରେ ପ୍ରଭାବ ନ ପଡୁ। ସେମାନଙ୍କୁ କଇଁଛ ସୁରକ୍ଷାର ଏକ ବଡ ଅଂଶୀଦାର ଭାବେ ଗ୍ରହଣ କରାଯାଉ। ଯେଉଁ ସମୟରେ ସମୁଦ୍ରରେ ମାଛମରା ଉପରେ କଟକଣା ଜାରି କରାଯାଉଛି, ସେହି ସମୟରେ ମତ୍ସ୍ୟଜୀବୀମାନଙ୍କୁ ଏମ୍ଜିଏନ୍ଆରଇଜିଏସ୍ରେ କାମ ଯୋଗାଇ ଦିଆଯାଉ। ଉଭୟ ମତ୍ସ୍ୟଜୀବୀଙ୍କ ଜୀବିକା ଓ କଇଁଛଙ୍କ ସୁରକ୍ଷା ପାଇଁ କମିଟି ରିପୋର୍ଟରେ ମତ ଦେଇଥିଲେ। ଅଲିଭ୍ ରିଡ୍ଲେ ସୁରକ୍ଷା ନେଇ ହାଇକୋର୍ଟ ନିଜ ଆଡୁ ମାମଲା ରୁଜୁ କରିଥିଲେ। ପରେ ଏହି ଘଟଣାରେ ଜବାବଦାଖଲ ପାଇଁ ହାଇକୋର୍ଟ କେନ୍ଦ୍ର ଓ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ।
