ଭାରତ ପରି ଅନେକ ଦେଶରେ ଅସୁବିଧା ସମୟରେ ପୋଲିସକୁ ଡାକିବାକୁ ପଡ଼ିଥାଏ। ଏଥିପାଇଁ ଜନସାଧାରଣଙ୍କୁ ସ୍ବତନ୍ତ୍ର ନମ୍ବର ପ୍ରଦାନ କରାଯାଇଥାଏ। ଯାହା ଦ୍ୱାରା ସେମାନେ ସହଜରେ ପୋଲିସକୁ ଫୋନ୍ କରି ନିଜ ସମସ୍ୟା ବିଷୟରେ କହିଥାନ୍ତି। କିନ୍ତୁ ଜାପାନର ଜଣେ ବୃଦ୍ଧ ୯ ଦିନରେ ପୋଲିସକୁ ୨୦୦୦ ଥର କଲ୍ କରିଛନ୍ତି। ଏହା ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ପୋଲିସ କଲ୍ ଡିଟେଲ୍ସରୁ ଜାଣିବାକୁ ପାଇଛି।
ଏକ ରିପୋର୍ଟ ଅନୁଯାୟୀ, ଜାପାନର ସାଇଟାମା ପ୍ରିଫେକ୍ଟର ଅଞ୍ଚଳରୁ ଏହି ଘଟଣା ସାମ୍ନାକୁ ଆସିଥିଲା। ଯାହା ସମସ୍ତଙ୍କୁ ଚକିତ କରି ଦେଇଥିଲା। ପ୍ରକୃତରେ ଏଠାରେ ରହୁଥିବା ଜଣେ ୬୭ ବର୍ଷୀୟ ବୃଦ୍ଧ ୯ ଦିନରେ ପୋଲିସକୁ ୨୦୦୦ ଥର କଲ୍ କରିଛନ୍ତି।
ସେ ପ୍ରତି ୬ ମିନିଟ୍ରେ ଥରେ ପୋଲିସକୁ ଫୋନ୍ କରିଥିଲେ। ଯଦି ସମୁଦାୟ ସମୟ ମିଶାଯାଏ ତେବେ ସେ ୯ ଦିନ ମଧ୍ୟରେ ପ୍ରାୟ ୨୭ ଘଣ୍ଟା ଧରି ପୋଲିସ ସହ କଥା ହୋଇଥିଲେ। ସେ ପୋଲିସକୁ ଫୋନ୍ କରି ଗାଳି ଦେଉଥିଲେ। ପୋଲିସକୁ ମୁର୍ଖ ଏବଂ ଛାଡ଼ ବୋଲି କହୁଥିଲେ। ପୋଲିସ ଏହି ବ୍ୟକ୍ତିଙ୍କ ଉପରେ ଭୀଷଣ ରାଗିଗଲା। ଶେଷରେ ତାଙ୍କ ଘରେ ଚଢ଼ାଉ କରି ବୃଦ୍ଧଙ୍କୁ ଗିରଫ କରିଥିଲା। ତେବେ ଉକ୍ତ ବୃଦ୍ଧ ଜଣକ ନିଜ ଅପରାଧ ସ୍ବୀକାର କରିବା ସହ କହିଥିଲେ ଯେ, ସେ ଚାହୁଁଥିଲେ ପୋଲିସ ତାଙ୍କୁ ଖୋଜିବାକୁ ଘରକୁ ଆସୁ। ଏଥିପାଇଁ କଲ୍ କରୁଥିଲେ।
ଅନ୍ୟପକ୍ଷରେ କାର୍ଯ୍ୟରେ ବାଧା ସୃଷ୍ଟି କରିବା ଏବଂ ହଇରାଣ କରିବା ଅଭିଯୋଗରେ ପୋଲିସ ଉକ୍ତ ବୃଦ୍ଧଙ୍କୁ ଗିରଫ କରିଛି। ଯେତେବେଳେ ତାଙ୍କ ଫୋନର କଲ୍ ହିଷ୍ଟ୍ରି ଦେଖାଗଲା, ପୋଲିସ ଆଶ୍ଚର୍ଯ୍ୟ ହୋଇଗଲା। ସେ ଗତ କିଛି ବର୍ଷ ଧରି ପୋଲିସକୁ ଡାକୁଥିଲେ। କିନ୍ତୁ ଏହି ୯ ଦିନରେ ସେ ପୋଲିସକୁ କଲ୍ ସଂଖ୍ୟା ବଢ଼ାଇଥିଲେ। ବୃଦ୍ଧ ଜଣକ ନିଜ ବିଷୟରେ ଅଧିକ କିଛି କହୁନାହାନ୍ତି। ତେଣୁ ସେ କାହିଁକି ଡାକିଲେ ତାହା ଏପର୍ଯ୍ୟନ୍ତ ସମ୍ପୂର୍ଣ୍ଣ ଜଣାପଡ଼ିନାହିଁ। ଘଟଣାର ଅଧିକ ଯାଞ୍ଚ ଚାଲିଛି।
