ସମ୍ବଲପୁର,୧୦ା୧୨(ବ୍ୟୁରୋ): ସମ୍ବଲପୁର ଜିଲା ଯୁଯୁମୁରା ମିନି ଷ୍ଟାଡିୟମ ନିର୍ମାଣ କାମରେ ଅନିୟମିତତା ନେଇ ଅଭିଯୋଗ ହୋଇଥିଲା। ଗୁରୁବାର ପୁରୁଣା ସୂଚନା ଫଳକରେ ରଙ୍ଗଲଗାଇ ନୂଆ ସୂଚନା ଲେଖି ଅନିୟମିତତା ଚପାଇଦେବାକୁ ଉଦ୍ୟମ କରାଯାଉଥିବା ନେଇ ଧରିତ୍ରୀରେ ଖବର ପ୍ରକାଶ ପାଇଥିଲା। ହେଲେ ଶୁକ୍ରବାର ପୁଣି ଉକ୍ତ ସୂଚନା ଫଳକରେ ପୁରୁଣା ପ୍ରକଳ୍ପର ସୂଚନା ଲେଖି ବ୍ଲକ ପ୍ରଶାସନ ହରଡ ଘଣାରେ ପଡିଛି। କେବଳ ଯୁଯୁମୁରା ପଞ୍ଚାୟତ ନୁହେଁ, ପ୍ରସ୍ତାବିତ କବରାପାଲି, କୁକୁଡାପାଲି, ଜୟନ୍ତପୁର ପଞ୍ଚାୟତରେ କାମ ହୋଇଛି କି ନାହିଁ ତଦନ୍ତ କରାଯାଉ ବୋଲି ଦାବି ହେଉଛି। ଉକ୍ତ ପଞ୍ଚାୟତରେ ଆସିଥିବା ପ୍ରାୟ ୨୬ ଲକ୍ଷ ଟଙ୍କାର ମଧ୍ୟ ଏଭଳି ଅନିୟମିତତା ହୋଇଥିବା ସନ୍ଦେହ କରାଯାଉଛି। ଏହି ଯୋଜନାରେ ଆସୁଥିବା ଅନୁଦାନକୁ ସରକାରୀ ଜମି ଜବରଦଖଲ ଆଶଙ୍କା କିମ୍ବା ଜବରଦଖଲ ହୋଇଥିବା ଜମିକୁ ଉଚ୍ଛେଦ କରି ପାଚେରି ନିର୍ମାଣ କରିବା ଭଳି ନିୟମ ରହିଛି। ହେଲେ ଏଥିରେ ବ୍ୟତିକ୍ରମ ଦେଖାଦେଇଛି। ଏ ସମ୍ପର୍କରେ ବିଡିଓ ନୀଳାମ୍ବର ମହାନନ୍ଦ କହିଛନ୍ତି, ତହସିଲ ପକ୍ଷରୁ ଦିଆଯାଇଥିବା ସ୍ଥାନର ପ୍ରସ୍ତାବ ଉପରେ ବ୍ଳକ ପ୍ରଶାସନ ପକ୍ଷରୁ କାମ ହୋଇଥାଏ। ଆଗକୁ ହକି ବିଶ୍ୱକପ ରହିଛି। ତେଣୁ ମିନି ଷ୍ଟାଡିୟମ କାମକୁ ଗୁରୁତ୍ୱ ଦିଆଯାଇଛି। କାମର ମାନକୁ ଯାଞ୍ଚ କରିବା ପାଇଁ ଜେଇଙ୍କୁ କଡା ନିର୍ଦ୍ଦେଶ ଦିଆଯାଇଛି। ପ୍ରକଳ୍ପରେ ସମସ୍ତ ସରକାରୀ ନିୟମ ମଧ୍ୟ ପାଳନ କରାଯାଇଛି। ଅଯଥାରେ ବ୍ଲକ ପ୍ରଶାସନକୁ ବଦନାମ କରିବାକୁ ଚକ୍ରାନ୍ତ କରାଯାଉଛି। ସମସ୍ତ ପଞ୍ଚାୟତରେ ବିକାଶ କାମ କରାଯିବ। ତହସିଲ ଦେଇଥିବା ଅନୁଦାନ ବାକି ରହିଛି। ଯୁଯୁମୁରାରେ ପଞ୍ଚାୟତରେ ୧୦ ଲକ୍ଷ ଟଙ୍କା ବ୍ୟୟ ଅଟକଳରେ ଫାଇଲ ଖୋଲା ଯାଇ କାମ କରାଯାଉଛି ବୋଲି କହିଥିଲେ। ସୂଚନାଯୋଗ୍ୟ, ଯୁଯୁମୁରା ପଞ୍ଚାୟତ ସମିତି ପକ୍ଷରୁ ତହସିଲ ଅଫିସ ପଛପଟେ ମିନିଷ୍ଟାଡିୟମ ନିର୍ମାଣ କାମରେ ଅନମିୟତା ନେଇ ଅଭିଯୋଗ ହୋଇଥିଲା। ଯୁଯୁମୁରା ସରପଞ୍ଚ ବାସନ୍ତି ପ୍ରଧାନ ଓ ସମିତି ସଭ୍ୟ ଜୟନ୍ତ ପ୍ରଧାନ ବିଡିଓଙ୍କୁ ଏ ନେଇ ଅଭିଯୋଗ କରିଥିଲେ।
