ପାରାଦୀପ,୧୦ା୯(ଶରତ ରାଉତ)ପାରାଦୀପଠାରୁ କେନ୍ଦ୍ରାପଡ଼ା ଜିଲା ଗହୀରମଥା ପର୍ଯ୍ୟନ୍ତ ବେଳାଭୂମିରେ ଶନିବାର ସମୁଦ୍ର ପାଣିରେ ତୈଳଯୁକ୍ତ ପ୍ରଦୂଷଣ ଆସ୍ତରଣ ଦେଖାଦେଇଥିବା ଅଭିଯୋଗ ହୋଇଛି। ଏହି ଘଟଣା ପ୍ରଘଟ ହେବା ପରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି) ପାରାଦୀପ ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ଏକାଧିକ ସ୍ଥାନରୁ ସମୁଦ୍ର ପାଣିର ନମୁନା ସଂଗ୍ରହ କରାଯାଇଛି। ଅପରପକ୍ଷେ ତୈଳବିଶୋଧନାଗାର ପକ୍ଷରୁ ୭ ଜଣିଆ ଟିମ୍ ଘଟଣାସ୍ଥଳରେ ପହଞ୍ଚତ୍ ଅନୁଧ୍ୟାନ କରିଛନ୍ତି। ଏପରି ତୈଳଯୁକ୍ତ ପ୍ରଦୂଷଣ ଆସ୍ତରଣ ସମ୍ପର୍କରେ ଓଡ଼ିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ (ଓମ୍ଫା)ସଭାପତି ଶ୍ରୀକାନ୍ତ ପରିଡ଼ା କହିଛନ୍ତି, ଏଭଳି ଘଟଣା ୨ମାସ ହେଲା ହେଉଛି। ଏ ସମ୍ପର୍କରେ ସେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଅଧିକାରୀଙ୍କୁ ଅବଗତ କରାଇଛନ୍ତି। ଏହାସତ୍ତ୍ୱେ କୌଣସି ପ୍ରତିକାର ହୋଇନାହିଁ। ଗତ ଶୁକ୍ରବାରଠାରୁ ଅଧିକ ମାତ୍ରାରେ ତୈଳ ଆସ୍ତରଣ ସମୁଦ୍ର ପାଣିରେ ଭାସୁଛି ବୋଲି ଅନେକ ମତ୍ସ୍ୟଜୀବୀ କହିଛନ୍ତି। ପରେ ଆମେ ମଧ୍ୟ ଏବେ ଦେଖୁଛୁ ସମୁଦ୍ର ବାଲିରେ ନୀଳ ରଙ୍ଗର ଦାଗ ରହିଛି। ଏହା ତୈଳବିଶୋଧନାଗାରରୁ ସମୁଦ୍ରରେ ଛଡ଼ାଯାଉଥିବା ପାଣିରେ ବାହାରୁଛି ବୋଲି ସେ କହିଛନ୍ତି। ଏହାଦ୍ୱାରା ମାଛ ବଂଶ ଲୋପ ପାଇବାକୁ ବସିଲାଣି। ତା’ସହ ଅନ୍ୟ ଜଳଜୀବ ମଧ୍ୟ ପ୍ରଭାବିତ ହେଉଛନ୍ତି। ପ୍ରଦୂଷଣ ବୋର୍ଡର ପରିବେଶ ଯନ୍ତ୍ରୀ ଦିବ୍ୟାଲୋଚନ ମହାପାତ୍ର ଘଟଣାସ୍ଥଳରେ ପାଣି ନମୁନା ସଂଗ୍ରହ କରିବାବେଳେ କହିଥିଲେ, ଏବେ ତେଲ ଆସ୍ତରଣ ସେତେ ଦେଖାଯାଉନାହିଁ। କେତେକ ସ୍ଥାନରେ ନୀଳ ରଙ୍ଗର ପ୍ରଦୂଷଣ ବାଲି ଓ ସମୁଦ୍ର ପାଣିର ନମୁନା ସଂଗ୍ରହ କରି ଆଣିଛୁ। ପରୀକ୍ଷା ପରେ ସ୍ପଷ୍ଟ ହେବ। ତୈଳବିଶୋଧନାଗାର ଟିମ୍ର ବରିଷ୍ଠ ଅଧିକାରୀ ଓମ୍ପ୍ରକାଶ କହିଛନ୍ତି, ଆମର କିଛି ତ୍ରୁଟି ହୋଇନାହିଁ। ଆମେ ସ୍ଲଜ ଅଏଲକୁ ଶୋଧନ କରିବା ପରେ ସେହି ପାଣି ସମୁଦ୍ରରେ ଛାଡୁଛୁ। ଯେଉଁ ଇଟିପି (ଇଫ୍ଲୁଏଣ୍ଟ ଟ୍ରିଟ୍ମେଣ୍ଟ ପ୍ଲାଣ୍ଟ)ଖରାପ ଅଛି ବୋଲି ଅଭିଯୋଗ ହେଉଛି ସେଠାକୁ ଗଲେ ଆପଣମାନେ ଦେଖିପାରିବେ। କିନ୍ତୁ ସେହି ଜାଗାକୁ ଯିବାପାଇଁ ମନା କରିଥିଲେ।
ସୂଚନାଯୋଗ୍ୟ, ତୈଳ ବିଶୋଧନାଗାର ମଧ୍ୟରେ ଇଟିପି ରହିଛି। ସେଠାରେ ସମସ୍ତ ବର୍ଜ୍ୟପାଣିକୁ ଶୋଧନ କରିବା ପରେ ସମୁଦ୍ରର ୨ କିମି ଭିତରେ ଛଡାଯାଏ। ଏହା ଆରମ୍ଭରୁ ଚାଲିଛି। ମାଟିତଳେ ଯାଇଥିବା ଏହି ପାଇପଲାଇନ ଦେଖିବା ପାଇଁ ସୁଯୋଗ ନାହିଁ। ଉକ୍ତ ଇଟିପିକୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ସମୟାନୁସାରେ ଯାଞ୍ଚ କରାଯାଇଥାଏ ବୋଲି ବୋର୍ଡ ଆଞ୍ଚଳିକ ଅଧିକାରୀ ପୁଷ୍କରଚନ୍ଦ୍ର ବେହେରା କହିଛନ୍ତି।
