ଦାରିଙ୍ଗବାଡ଼ି,୫ା୮(ଅରୁଣ ସାହୁ): ଦେଶରେ ଖାଇବା ତେଲର ଚାହିଦା ରହିଛି। ତେବେ ଖାଇବା ତେଲକୁ ଅନେକ ସମୟରେ ବାହାର ଦେଶରୁ ଆମଦାନୀ କରାଯାଉଛି। ଦେଶରେ ଚାହିଦା ରହିଥିଲେ ମଧ୍ୟ ଦେଶରେ ତୈଳର ଆବଶ୍ୟକତା ତୁଳନାରେ ଅମଳ ବହୁତ କମ୍ ରହୁଛି ଏହାର ଅଭାବ ପୂରଣ କରିବାକୁ ଏବେ ଭାରତ ଓ ରାଜ୍ୟ ସରକାର ବଡ଼ ପଦକ୍ଷେପ ନେବା ଆରମ୍ଭ କରିଦେଇଛନ୍ତି। ଦାରିଙ୍ଗବାଡ଼ି ଅଞ୍ଚଳରେ ଏବେ ଖାଇବା ତେଲ ଅମଳ ପାଇଁ ଅଏଲ ପାମ୍ (OIL PALM ) ପ୍ଲାଣ୍ଟେସନ କରାଯାଉଛି। ଯାହାକି ୨୦୨୬/୨୭ ଆର୍ଥିକ ବର୍ଷ ପାଇଁ ଉକ୍ତ ବ୍ଲକ ଅଞ୍ଚଳରେ ୪୦ ହେକ୍ଟର ଜମିରେ ଏହି ଚାଷ ପାଇଁ ଲକ୍ଷ୍ୟ ରଖାଯାଇଥିବା ବେଳେ ବୁଧବାର ଉକ୍ତ ବ୍ଲକ ଶ୍ରାନିକେତା ପଞ୍ଚାୟତ ଦଣ୍ଡିମା ଗ୍ରାମରେ ଏହି ଚାଷର ଶୁଭାରମ୍ଭ ହୋଇଛି। ଦାରିଙ୍ଗବାଡ଼ି ବ୍ଲକ ଅଧ୍ୟକ୍ଷ ସୁଶାନ୍ତ କୁମାର ପ୍ରଧାନ,ବିଡିଓ ପ୍ରୀତିରଞ୍ଜନ ରଥ, ବନାଞ୍ଚଳ ଅଧିକାରୀ ଲଷ୍ମୀନାରାୟଣ ପଣ୍ଡା ପ୍ରମୁଖ ଅତିଥି ଭାବେ ଯୋଗଦେଇ ଅଏଲ ପାମ୍ ଚାରା ରୋପଣ କରିଥିଲେ।
ଅନ୍ୟମାନଙ୍କ ମଧ୍ୟରେ କନ୍ଧମାଳ କୃଷି ଉଦ୍ୟାନ ବିଭାଗର ସହନିର୍ଦ୍ଦେଶକ ସ୍ମିତା ମହାନ୍ତି, ଦାରିଙ୍ଗବାଡ଼ି ସହକାରୀ କୃଷି ଉଦ୍ୟାନ ଅଧିକାରୀ ଲିପ୍ସାରାଣୀ ଦଳବେହେରା, ପ୍ରିୟୁନିକ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ର ଏଜିଏମ୍ ଦେବବ୍ରତ ସାହୁ, ଦାରିଙ୍ଗବାଡ଼ି ଉଦ୍ୟାନ ବିଭାଗର ଏଜିଏମ୍ ବିକ୍ରମ ସିଂ ପରିଡ଼ା ପ୍ରମୁଖ ଯୋଗଦେଇ ଚାରା ରୋପଣର ଶୁଭାରମ୍ଭ କରିଥିଲେ। ଦଣ୍ଡିମାର ଚାଷୀ ରବିତ ପ୍ରଧାନ ତାଙ୍କ ଗୋଟିଏ ହେକ୍ଟର କ୍ଷେତରେ ୧୪୩ଟି ଚାରା ରୋପଣ କରିଛନ୍ତି। ବିଭାଗ ତାଙ୍କୁ ମାଗଣା ଚାରା ଯୋଗାଇଦେଇଥିବା ସହ ତା’ର ରକ୍ଷଣବେକ୍ଷଣ ପାଇଁ ଆସନ୍ତା ୪ ବର୍ଷ ପର୍ଯ୍ୟନ୍ତ ବର୍ଷକୁ ୫ ହଜାର ୨ ଶହ ୫୦ଟଙ୍କା ପର୍ଯ୍ୟନ୍ତ ସହାୟତା କରାଯିବ ବୋଲି କୁହାଯାଇଛି। କନ୍ଧମାଳ ଜିଲାରେ ମୋଟ୍ ୪୫୦ହେକ୍ଟର ଜମିରେ ଏହି ଚାଷ କରିବାକୁ ଲକ୍ଷ୍ୟ ରଖାଯାଇଥିବା କନ୍ଧମାଳ କୃଷି ଉଦ୍ୟାନ ବିଭାଗର ସହନିର୍ଦ୍ଦେଶକ ସ୍ମିତା ମହାନ୍ତି କହିଛନ୍ତି ଆଗାମୀ ଦିନରେ ଏଠାରେ ଅମଳ ପରେ ତେଲ ପ୍ରସ୍ତୁତ ପାଇଁ ମଧ୍ୟ ଯନ୍ତ୍ରପାତି ଲଗାଯିବ। ଯାହାକି ଚାଷୀ ସିଧା ଅମଳ ପରେ ତେଲକୁ ବାହାରକୁ ଏଠାରୁ ବିକ୍ରି କରିପାରିବେ।
