ଚମ୍ପୁଆ, ୧୪।୨(ଡି.ଏନ.ଏ.)-ସମସ୍ୟା ବହୁଳ ହୁଡିସାହି ଚମ୍ପୁଆ ଏନ୍ଏସିରେ ଅନ୍ତର୍ଭୁକ୍ତ ହୋଇଥିଲେ ବି ଆଜି ବି ମୌଳିକ ସୁବିଧାରୁ ବଞ୍ଚିତ। ଏନେଇ ଖବର ପ୍ରକାଶିତ ପରେ ଏନଏସି ପ୍ରଶାସନ ତପତ୍ରତା ପ୍ରକାଶ କରିଛନ୍ତି। ଦୀର୍ଘ ୯୦ ବର୍ଷ ପରେ ବର୍ତ୍ତମାନର ଏନ୍ଏସି ନିର୍ବାହୀ ଅଧିକାରୀ ଗୌରହରି ମହାନ୍ତ ହୁଡିସାହିରେ ପହଞ୍ଚି ସ୍ଥାନୀୟ ଲୋକଙ୍କ ସୁବିଧା ଅସୁବିଧା ବିଷୟରେ ଆଲୋଚନା କରିଛନ୍ତି। ସ୍ଥାନୀୟ ଗ୍ରାମବାସୀ ୯୦ ବର୍ଷ ପରେବି ଉକ୍ତ ଗାଁକୁ ରାସ୍ତା ନଥିବା ଫଳରେ ୫ କିମି ବୁଲିବାକୁ ପଡୁଥିବା ବେଳେ ରୋଗୀ ମାନଙ୍କୁ ବର୍ଷାଦିନେ ଖଟିଆରେ ବୋହିବା, ପାନୀୟ ଜଳ ସୁବିଧା ନଥିବାରୁ ୩ କି.ମି. ଦୂର ବୈତରଣୀ ନଦୀ ଉପରେ ନିର୍ଭର କରୁଥିବା ଆଦି ଅଭିଯୋଗ କରିଥିଲେ। ନିର୍ବାହୀ ଅଧିକାରୀ ମହାନ୍ତ ସ୍ଥାନୀୟ ସ୍ବୟଂ ସହାୟକ ଗୋଷ୍ଠୀଙ୍କୁ ଡାକି ଉପୁଜୁଥିବା ସମସ୍ୟା ବିଷୟରେ ପଚାରି ବୁଝିଥିଲେ। ତୁରନ୍ତ ଉକ୍ତ ଗ୍ରାମରେ ଏକ କମ୍ୟୁନିଟି ହଲ ଓ ସ୍ବୟଂ ସହାୟକ ଗୋଷ୍ଠୀଙ୍କୁ ଋଣ ପ୍ରଦାନ କରିବାର ପ୍ରତିଶ୍ରୁତି ଦେବା ସହିତ ସ୍ବତନ୍ତ୍ର ଏକ ଟିମ ପଠାଇ ଗ୍ରାମ ବିକାଶ ଉପରେ ଗୁରୁତ୍ୱ ଦେବେ ବୋଲି କହିଛନ୍ତି।
