ଭବାନୀପାଟଣା,୧୯।୯(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଭବାନୀପାଟଣା ସହରରେ ଦିନକୁ ଦିନ ବେଆଇନ ମଦ କାରବାର ବୃଦ୍ଧି ପାଇବାରେ ଲାଗିଛି। ସେହିପରି ଲାଇସେନ୍ସପ୍ରାପ୍ତ ବିଦେଶୀ ମଦ ଦୋକାନରେ ପ୍ରିଣ୍ଟ ଦରଠାରୁ ଅଧିକରେ ମଦ ମଧ୍ୟ ବିକ୍ରି ହେଉଥିବା ଅଭିଯୋଗ ହେଉଛି। ଅବକାରୀ ବିଭାଗ ପକ୍ଷରୁ ଚଢାଉ କରାଯାଉଥିବା କହୁଥିଲେ ମଧ୍ୟ ବେଆଇନ ମଦ କାରବାର ବନ୍ଦ ହେବା ପରିବର୍ତ୍ତେ ବଢିବାରେ ଲାଗିଛି। ବିଭାଗ ପକ୍ଷରୁ ଚଢାଉ ହେଉଥିବାବେଳେ ଫଳ କିନ୍ତୁ ଶୁନ୍ ବୋଲି ସାଧାରଣରେ ଆଲୋଚନା ହେଉଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହି ପରିପ୍ରେକ୍ଷୀରେ ଭବାନୀପାଟଣା ଅବକାରୀ ଥାନା ପ୍ରାୟ ସମୟରେ ତାଲା ପଡିଥିବା ଦେଖିବାକୁ ମିଳିଥାଏ। ଏହାକୁ ନେଇ ବିଭାଗୀୟ କର୍ମଚାରୀଙ୍କୁ ପଚାରିଲେ ଚଢାଉରେ ଯାଇଥିବା ପ୍ରକାଶ କରିଥାନ୍ତି। ଏପରିକି କାର୍ଯ୍ୟାଳୟ ଖୋଲି ଥିଲେ ମଧ୍ୟ ଏଠାକାର କର୍ମଚାରୀ ବେଫିକର ହୋଇ ଅଫିସ ଛାଡି ଅନ୍ୟ ସ୍ଥାନକୁ ଯାଇଥାନ୍ତି। ଫଳରେ ଅଫିସ ସେମିତି ଖୋଲା ରହିଥାଏ। ସୋମବାର ମଧ୍ୟାହ୍ନରେ ଏହି ଦୃଶ୍ୟ ଦେଖିବା ପରେ ସ୍ଥାନୀୟ ଗଣମାଧ୍ୟମ ପ୍ରତିନିଧି ଫଟୋ, ଭିଡିଓ ଉତ୍ତୋଳନ କରିବା ପରେ କର୍ମଚାରୀ ଖବର ପାଇ ଅଫିସକୁ ଆସିଥିଲେ। ଉପସ୍ଥିତ କର୍ମଚାରୀଙ୍କୁ ଅଫିସ ଖୋଲା ଥିବା ବିଷୟରେ ପଚାରିବାରୁ ଆମେ ଏବେ ଚଢାଉ କରି ଆସିଲୁ ବୋଲି ବେଫିକର ହୋଇ ପ୍ରକାଶ କରିଥିଲେ। ସବୁବେଳେ ଚଢାଉ ବାହାନା ନେଇ ବିଭାଗୀୟ ଅଧିକାରୀ କର୍ମଚାରୀ ଅଫିସରେ ଉପସ୍ଥିତ ନ ରହିବା ତାହା ତଦନ୍ତ ସାପେକ୍ଷ। ଏ ନେଇ ସ୍ଥାନୀୟ ଅବକାରୀ ଏସଆଇ ତିଲକ ରାମ ନାଏକଙ୍କୁ ପଚାରିବାରୁ ଆମେ ଚଢାଉ ପାଇଁ ଜଙ୍ଗଲ ଯାଇଥିଲୁ ଏବେ ଘରକୁ ଆସିଥିଲି। ଆମେ କଣ ମାଷ୍ଟର ଯେ ଡରିଯିବୁ ବୋଲି ଅତି ବେଫିକର ଭାବେ କହିଥିଲେ।
