ଭୁବନେଶ୍ୱର,୨୪।୬(ଶର୍ମିଷ୍ଠା ପାଣିଗ୍ରାହୀ): କେନ୍ଦ୍ର ସାହିତ୍ୟ ଏକାଡେମୀ ପକ୍ଷରୁ ଶୁକ୍ରବାର ବାଲ୍ ସାହିତ୍ୟ ପୁରସ୍କାର ଓ ଯୁବ ପୁରସ୍କାର ୨୦୨୩ ଘୋଷଣା କରାଯାଇଛି। ୨୦ଜଣ ଯୁବ ଓ ୨୨ଜଣ ବାଲ୍ ସାହିତ୍ୟ ପୁରସ୍କାର ପାଇବେ। ତେବେ ଯୁବ ପୁରସ୍କାରରେ ଓଡ଼ିଶାରୁ କେହି ସ୍ଥାନ ପାଇ ନ ଥିବାବେଳେ ବାଲ୍ ପୁରସ୍କାର ପାଇବାକୁ ଶିଶୁ ସାହିତି୍ୟକ ଡ. ଯୁଗଳ କିଶୋର ଷଡ଼ଙ୍ଗୀ ମନୋନୀତ ହୋଇଛନ୍ତି। ସେ କ୍ଷୁଦ୍ର ଗଳ୍ପ ପୁସ୍ତକ ‘ଜେଜେଙ୍କ ଗପ ଗଣ୍ଠିଲି’ ପାଇଁ ଏହି ଜାତୀୟ ପୁରସ୍କାର ପାଇବେ। କେନ୍ଦ୍ର ସାହିତ୍ୟ ଏକାଡେମୀ ଅଧ୍ୟକ୍ଷ ମାଧବ କୌଶିକଙ୍କ ଅଧ୍ୟକ୍ଷତାରେ ଏକାଡେମୀର କାର୍ଯ୍ୟକାରୀ ମଣ୍ଡଳ ଏନେଇ ଘୋଷଣା କରିଥିଲେ। ପୁରସ୍କାର ବାବଦକୁ ଲେଖକ ଷଡ଼ଙ୍ଗୀଙ୍କୁ ଏକ ତାମ୍ରଫଳକ ସହ ୫୦ ହଜାର ଟଙ୍କାର ଅର୍ଥରାଶି ଦିଆଯିବ ବୋଲି ସୂଚନା ଦିଆଯାଇଛି। ୧୯୪୬ ଡିସେମ୍ବର ୯ରେ ବଲାଙ୍ଗୀର ଜିଲା ସିନ୍ଧେକେଲା ଗ୍ରାମରେ ଜନ୍ମ ଗ୍ରହଣ କରିଛନ୍ତି। ସେ ଜଣେ ଶିଶୁ ସାହିତି୍ୟକ, ସଂସ୍କୃତି ଗବେଷକ ଭାବେ ସୁପରିଚିତ। ସାରସ୍ବତ ସାଧନା, ଆକାଶବାଣୀ ନିମନ୍ତେ ଗୀତ ରଚନା, ପୁସ୍ତକ ପଠନ, ପାଠକ ସୃଷ୍ଟି କରିବା, ଶିଶୁ-ସାହିତ୍ୟ ସୃଜନ, ଆଲୋଚନା, ଗବେଷଣା ଆଦିରେ ସେ ରୁଚି ରଖନ୍ତି। ଶିଶୁ ସାହିତ୍ୟ କ୍ଷେତ୍ରରେ ତାଙ୍କର ୭ଟି ପୁସ୍ତକ ପ୍ରକାଶ ହୋଇସାରିଛି। ସେଗୁଡ଼ିକ ହେଲା ଆସରେ ପିଲା ଆସ, ତୁମପାଇଁ ଏକାଙ୍କିକା, ଉଦ୍ଯୋଗୀ ଜନଲକ୍ଷ୍ମୀନନ୍ଦନ, ଚିଠି, ତୁମପାଇଁ କବିତା, ଦଳପତି ଚୟନ ଓ ମୁର୍ଖାନନ୍ଦ। ଓଡ଼ିଆ ଭାଷା ସାହିତ୍ୟ କ୍ଷେତ୍ରରେ ଗବେଷଣାତ୍ମକ ପୁସ୍ତକ ଜୁହାରଗୋ ମା’ ଦୁଆରସନୀ, ଗୀତି ସୁରଭି, ଅନ୍ଧାରରୁ ଆଲୁଅ, ନିର୍ଝରଣୀ, ଦୟାମୟୀ ମା’ ଦ୍ୱାରସନୀ ଆଦି ରଚନା କରିଛନ୍ତି। କୋଶଳୀ ଭାଷା ସାହିତ୍ୟ କ୍ଷେତ୍ରରେ ତାଙ୍କ ଦ୍ୱାରା ରଚିତ ଦୁଆରସନୀ ଭଜନ୍, ରସ୍କଦମ୍, ଉଜନ୍ବୁଜୁଲି, ଡୁରି, ଛି, ଜନ୍ ଉଦ୍ଲାନା ପୁସ୍ତକ ପ୍ରକାଶିତ ହୋଇଛି। ଶିକ୍ଷକତା ବୃତ୍ତିରୁ ପ୍ରଶିକ୍ଷକ ଓ ପରେ ପରିଦର୍ଶକ ଭାବେ ୨୦୦୪ରେ ଅବସର ନେଇଛନ୍ତି। ପୁରସ୍କାର ପାଇବା ପରେ ସେ ଖୁସିବ୍ୟକ୍ତ କରିବା ସହ ଦୀର୍ଘଦିନର ତପସ୍ୟା ସୁଫଳ ହୋଇଛି ବୋଲି କହିଛନ୍ତି।
