ଭୁବନେଶ୍ୱର, ୩।୧୧(ବ୍ୟୁରୋ): ଜାତୀୟସ୍ତରରେ ଏକ ଉତ୍କୃଷ୍ଟ ପାରମ୍ପରିକ ହସ୍ତତନ୍ତର ମାନ୍ୟତା ହାସଲ କଲାପରେ ଓଡ଼ିଶାର ବାନ୍ଧକଳା(ଇକାତ୍) ଏବେ ଏକ ବିଶ୍ୱବ୍ରାଣ୍ଡ ହେବାକୁ ଯାଉଛି। ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀଙ୍କ ଅଧ୍ୟକ୍ଷତାରେ ସୋମବାର ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଏନେଇ ଆଲୋଚନା ହୋଇଛି। ଲୋକ ସେବା ଭବନରୁ ଡ଼ିଜିଟାଲ୍ ମୋଡ୍ରେ ଅନୁଷ୍ଠିତ ବୈଠକରେ ବିଭାଗୀୟ ସଚିବ ଏସମ୍ବନ୍ଧୀୟ ପ୍ରସ୍ତାବ ଉପରେ ଆଲୋଚନା ଲାଗି ତଥ୍ୟ ଉପସ୍ଥାପିତ କରିଛନ୍ତି। ସମୀକ୍ଷାରୁ ଜଣାପଡିଛି, ଓଡ଼ିଶାର ପଶାପାଲି, ସୋନପୁରୀ, ବମକେଇ ଏବଂ କୋଟପାଡ୍ ଆଦି ଇକାତ୍ ଡିଜାଇନ୍ର ବଜାର ଚାହିଦା ରହିଛି। ଏହିସବୁ ବ୍ରାଣ୍ଡକୁ ବିଶ୍ୱସ୍ତରୀୟ କରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି। ଏ ଗୁଡିକର ବୁଣବତ୍ତା, ରଙ୍ଗ ଓ ମିଶ୍ରିତ ଡିଜାଇନ୍ ଆଦିକୁ ଉଚ୍ଚମାନର କରିବା ସହ ସେଗୁଡିକୁ ବିଶ୍ୱସ୍ତରୀୟ ବ୍ରାଣ୍ଡ, ପ୍ରଚାର ଓ ପ୍ରସାର କରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି। ବିଭାଗୀୟ ନିର୍ଦ୍ଦେଶକ ଜ୍ୟୋତିପ୍ରକାଶ ଦାସ କହିଛନ୍ତି, ବରଗଡ, ସୋନପୁର, କଳାହାଣ୍ଡି ଓ କୋରାପୁଟ ଅଞ୍ଚଳର ବୁଣାକାରମାନେ ଏହିସବୁ ଡିଜାଇନ୍ ପ୍ରସ୍ତୁତିରେ ସିଦ୍ଧହସ୍ତ। ପାରମ୍ପରିକ ବ୍ୟତୀତ ବର୍ତ୍ତମାନ ୧୬୬ ନୂଆ ଡିଜାଇନ୍ ପ୍ରସ୍ତୁତ କରାଯାଇଛି। ୨ୟ ପର୍ଯ୍ୟାୟ ‘ଡିଜାଇନ୍ ଏବଂ ରେଫରେନ୍ସ’ ସଂଗ୍ରହ ଆରମ୍ଭ ହୋଇଛି। ବିଭାଗୀୟ ଶାସନ ସଚିବ କହିଛନ୍ତି, ଓଡ଼ିଶା ବୟନ ବିପଣନୀକୁ ବାର୍ଷିକ ପ୍ରାୟ ୬୦୦ରୁ ୭୦୦ କୋଟି ଟଙ୍କାରେ ପହଞ୍ଚାଯାଇ ପାରିଛି। ଆସନ୍ତା ବର୍ଷ ଏହାକୁ ବହୁଗୁଣିତ କରିବା ପାଇଁ ନିର୍ଦ୍ଦେଶ ଦିଆଯାଇଛି। ବରଗଡ ‘ବାଲିଜୁରି’ ହାଟକୁ ଏସିଆର ବୃହତ୍ତମ ପାରମ୍ପରିକ ପୋଷାକ ବଜାରଭାବେ ବିକଶିତ କରିବାକୁ ସ୍ଥିର କରାଯାଇଛି। ଏଠାରେ ସମସ୍ତ ଆଧୁନିକ ଡିଜାଇନ୍ ଏବଂ ଅନ୍ତର୍ଜାତିକ ବଜାର ସଂଯୋଗ ସୁବିଧା ସୃଷ୍ଟି କରିବା ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି। ‘ଜେମ୍’ ପୋର୍ଟାଲ୍ ସହ ବଣାକାରଙ୍କୁ ସଂଯୋଜିତ କରାଯିବ। ଯାହାଦ୍ୱାରା ସେମାନେ ସିଧାସଳଖ ସର୍ବୋତ୍ତମ ମୂଲ୍ୟରେ ନିଜର ଉତ୍ପାଦ ବିକ୍ରି କରିପାରିବେ।
