ଭୁବନେଶ୍ୱର, ୧୨।୧୨(କ୍ରୀଡ଼ା ପ୍ରତିନିଧି): କଳିଙ୍ଗ ଷ୍ଟାଡିୟମସ୍ଥିତ ବିଜୁ ପଟ୍ଟନାୟକ ସୁଇମିଂ ପୁଲ୍ରେ ଏସଏଫ୍ଆଇ (ସୁଇମିଂ ଫେଡେରେଶନ ଅଫ୍ ଇଣ୍ଡିଆ) ଜୋନାଲ କ୍ୱାଲିଫାୟର ଟୁର୍ନାମେଣ୍ଟ ରବିବାର ଶେଷ ହୋଇଛି। ଏଥିରେ ଓଡ଼ିଶା, ମଧ୍ୟପ୍ରଦେଶ, ଛତିଶଗଡ଼, ଝାଡ଼ଖଣ୍ଡ ଓ ବିହାର ଆଦି ୫ଟି ରାଜ୍ୟର ପ୍ରତିଯୋଗୀ ଅଂଶଗ୍ରହଣ କରିଥିଲେ। ପ୍ରଥମ ଦିବସ ପରି ଦ୍ୱିତୀୟ ଦିବସରେ ମଧ୍ୟ ଓଡ଼ିଶା ସନ୍ତରଣକାରୀମାନେ ପ୍ରଭାବୀ ପ୍ରଦର୍ଶନ କରିଛନ୍ତି। ଓଡ଼ିଶାର ଅର୍ପିତା ସାହୁ ୧୦୦ ମିଟର ବଟରଫ୍ଲାଇରେ ସ୍ବର୍ଣ୍ଣ, ମନ୍ନତା ମିଶ୍ର ୨୦୦ ମିଟର ବ୍ରେଷ୍ଟଷ୍ଟ୍ରୋକ୍ ଓ ୨୦୦ ମିଟର ବ୍ୟକ୍ତିଗତ ମିଡ୍ଲେରେ ସ୍ବର୍ଣ୍ଣ, ଅମିୟ ପ୍ରଧାନ ୨୦୦ ମିଟର ବ୍ରେଷ୍ଟଷ୍ଟ୍ରୋକ୍ରେ ସ୍ବର୍ଣ୍ଣ, ସୋନିଆ ପଟେଲ ୫୦ ମିଟର ଫ୍ରିଷ୍ଟାଇଲ, ୫୦ ମିଟର ବଟରଫ୍ଲାଇ ଓ ୧୦୦ ମିଟର ଫ୍ରିଷ୍ଟାଇଲରେ ସ୍ବର୍ଣ୍ଣ ଏବଂ ପ୍ରତ୍ୟାଶା ରାୟ ୨୦୦ ମିଟର ବ୍ୟାକ୍ଷ୍ଟ୍ରୋକ୍ରେ ସ୍ବର୍ଣ୍ଣ ପଦକ ଅର୍ଜନ କରିଛନ୍ତି। ସେହିପରି ଜାଡୁ ବୁଡେକ ୧୦୦ ମିଟର ବଟରଫ୍ଲାଇ, ୫୦ ମିଟର ବଟରଫ୍ଲାଇ ଓ ୧୦୦ ମିଟର ଫ୍ରିଷ୍ଟାଇଲରେ ରୌପ୍ୟ ଏବଂ ବିକାଶ ହରିପାଲ ୨୦୦ ମିଟର ଫ୍ରିଷ୍ଟାଇଲ ଓ ୮୦୦ ମିଟର ଫ୍ରିଷ୍ଟାଇଲରେ ରୌପ୍ୟ ପଦକ ଅର୍ଜନ କରିଛନ୍ତି।
ଛତିଶଗଡ଼ର ଆୟାନ ଅଲୀ ଖା ୧୫୦୦ ମିଟର ଓ ୮୦୦ ମିଟର ଫ୍ରିଷ୍ଟାଇଲ ଏବଂ ଛତିଶଗଡ଼ର ରୁଦ୍ରାକେଶ ସାହୁ ୨୦୦ ମିଟର ଫ୍ରିଷ୍ଟାଇଲ, ୧୦୦ ମିଟର ବଟରଫ୍ଲାଇ, ୨୦୦ ମିଟର ବ୍ୟକ୍ତିଗତ ମିଡ୍ଲେ ଓ ୧୦୦ ମିଟର ଫ୍ରିଷ୍ଟାଇଲରେ ସ୍ବର୍ଣ୍ଣ ପଦକ ପାଇଛନ୍ତି। ଉଦ୍ଯାପନୀ ଉତ୍ସବରେ ସିନିୟର ସୁଇମିଂ କୋଚ୍ ସୁରେନ୍ଦ୍ର ନାଏକ, ସୁଇମିଂ ଆସୋସିଏଶନ ସଭାପତି ପ୍ରଦୀପ କୁମାର ପାଢ଼ୀ, କାର୍ଯ୍ୟକାରୀ ସଭାପତି ସୋମା ମିଶ୍ର, ଉପସଭାପତି ଅମର ରଞ୍ଜନ ମହାନ୍ତି, ରବୀନ୍ଦ୍ର ରାଉତ, ଯୁଗ୍ମ ସମ୍ପାଦକ ଲକ୍ଷ୍ମୀଚନ୍ଦ୍ର ମହାକୁର ପ୍ରମୁଖ ଉପସ୍ଥିତ ଥିଲେ।
