ଭୁବନେଶ୍ୱର,୧୩ା୧୦(ରବିନାରାୟଣ ଜେନା):ଦେଶରେ ସୂଚନା ଅଧିକାର ଆଇନ-୨୦୦୫କୁ କେଉଁ ରାଜ୍ୟ କିଭଳି ଭାବେ କାର୍ଯ୍ୟ କରୁଛନ୍ତି ସେନେଇ ସତର୍କ ନାଗରିକ ସଙ୍ଗଠନ ପକ୍ଷରୁ ଏକ ସଦ୍ୟତମ ରିପୋର୍ଟ ପ୍ରକାଶ ପାଇଛି। ରିପୋର୍ଟରେ ସୂଚନା ଅଧିକାର ଆଇନ ଅନୁଯାୟୀ, ଆପତ୍ତି-ଅଭିଯୋଗ ସମାଧାନ କରିବାରେ ମହାରାଷ୍ଟ୍ର ପ୍ରଥମ ସ୍ଥାନରେ ରହିଥିବାବେଳେ ଓଡ଼ିଶା ୯ମ ସ୍ଥାନରେ ରହିଛି ବୋଲି ସତର୍କ ନାଗରିକ ସଙ୍ଗଠନ ରିପୋର୍ଟରୁ ଜଣାଯାଇଛି।
ଦେଶରେ ସୂଚନା ଅଧିକାର ଆଇନର କାର୍ଯ୍ୟକାରିତା ନେଇ ୨୦୨୪ ଜୁଲାଇ ପହିଲାରୁ ୨୦୨୫ ଜୁନ୍ ମଧ୍ୟରେ ସଙ୍ଗଠନ ପକ୍ଷରୁ ଦେଶରେ ହୋଇଥିବା ସର୍ଭେ ଅନୁଯାୟୀ, ମହାରାଷ୍ଟ୍ରରେ ସୂଚନା ଆୟୋଗକୁ ୫୪ହଜାର ୮୬୯ ଅଭିଯୋଗ ଆସିଥିବାବେଳେ ସେଥିମଧ୍ୟରୁ ୩୮ହଜାର ୪୧୦ଟିର ସମାଧାନ ହୋଇଛି, ଯାହାକି ସର୍ବାଧିକ। ଏହାପଛକୁ ଉତ୍ତରପ୍ରଦେଶ ୩୦ହଜାର ୫୫୨ ମାମଲା ସମାଧାନ କରିଥିବାବେଳେ କର୍ନାଟକ ୨୬ହଜାର ୮୦୨, ତାମିଲନାଡୁ ୨୨ହଜାର ୩୩୬, ସେଣ୍ଟ୍ରାଲ ଇନଫରମେଶନ କମିଶନ(ସିଆଇସି) ୧୮ହଜାର ୯୩୧, ଗୁଜରାଟ ୭,୩୨୪, ବିହାର ୫, ୮୫୪, ହରିୟାଣା ୫,୫୦୪ ମାମଲା ସମାଧାନ କରିଛି। ଓଡ଼ିଶାରେ ୮ହଜାର ୪୮ଟି ମାମଲା ମଧ୍ୟରୁ ୫୨୦୦ଟି ସମାଧାନ ହୋଇପାରିଛି। ଏହି ତାଲିକାରେ ତ୍ରିପୁରା ଶେଷରେ ରହିଛି। ହେଲେ ଝାଡ଼ଖଣ୍ଡରେ ଏହି ଆଇନ ଅକାମୀ ହୋଇପଡ଼ିଥିବା ବେଳେ ରାଜସ୍ଥାନ ସୂଚନା ଆୟୋଗଙ୍କ ପକ୍ଷରୁ କୌଣସି ସୂଚନା ଦେବାକୁ ମନା କରାଯାଇଛି। ପଶ୍ଚିମବଙ୍ଗ ସରକାର ଉତ୍ତର ଦେଇ ନାହାନ୍ତି ବୋଲି ରିପୋର୍ଟରେ କୁହାଯାଇଛି।
ଅନ୍ୟପକ୍ଷରେ ମାମଲା ସମାଧାନରେ ଅବହେଳା ପ୍ରଦର୍ଶନ କରୁଥିବା ଏବଂ ଅନ୍ୟାନ୍ୟ କାରଣରୁ ଜରିମାନା ଆଦାୟ କରିବାରେ ଛତିଶଗଡ଼ ସୂଚନା ଆୟୋଗ ପ୍ରଥମରେ ରହିଛି। ଏହି ରାଜ୍ୟରେ ସୂଚନା ଆୟୋଗ ୧ବର୍ଷ ମଧ୍ୟରେ ୪୩୧ଟି ମାମଲାରେ ୧କୋଟି ୬ଲକ୍ଷ ୬୩୯ଟଙ୍କା ଆଦାୟ କରିଥିବାବେଳେ କର୍ନାଟକ ସୂଚନା ଆୟୋଗ ୧୯୨ଟି ମାମଲାରେ ୩୮ଲକ୍ଷ ୧୧ହଜାର ଆଦାୟ କରି ଦ୍ୱିତୀୟରେ ରହିଛି। ସେହିପରି ବିହାର ଆୟୋଗ ୧୮୬ଟି ମାମଲାରେ ୨୮ଲକ୍ଷ ୬୦ହଜାର ୫୦୦ଟଙ୍କା ଜରିମାନା ଆଦାୟ କରିଥିବାବେଳେ ହରିୟାଣା ଆୟୋଗ ୯୨ଟି ମାମଲାରେ ୨୨ଲକ୍ଷ ୬୭ହଜାର ୫୦୦ଟଙ୍କା ଆଦାୟ କରି ଚତୁର୍ଥରେ ରହିଥିବାବେଳେ ଓଡ଼ିଶା ସୂଚନା ଆୟୋଗ ୧୦୩ଟି ମାମଲାରେ ୯ଲକ୍ଷ ୭ହଜାର ଟଙ୍କା ଜରିମାନା କରି ୫ମ ସ୍ଥାନରେ ରହିଛି। ତେବେ ସିକ୍କିମ ଓ ତେଲଙ୍ଗାନାରେ ଗୋଟିଏ ଟଙ୍କା ଜରିମାନା ବାବଦକୁ ଆଦାୟ ହୋଇ ନ ଥିବାବେଳେ ଝାଡ଼ଖଣ୍ଡ ଆୟୋଗ ସମ୍ପୂର୍ଣ୍ଣ ଅକାମୀ ରହିଛି। ସେହିପରି ରାଜସ୍ଥାନ ଆୟୋଗ ତଥ୍ୟ ଦେବାକୁ ମନା କରିଥିବାବେଳେ ମହାରାଷ୍ଟ୍ର, ଆନ୍ଧ୍ରପ୍ରଦେଶ, ଉତ୍ତରାଖଣ୍ଡ, ପଶ୍ଚିମବଙ୍ଗ ଓ ଉତ୍ତରପ୍ରଦେଶ ସୂଚନା ଆୟୋଗ ତଥ୍ୟ ଦେଇ ନାହାନ୍ତି। ୧ବର୍ଷ ମଧ୍ୟରେ ୧୨୫୨ଟି ମାମଲାରେ ୨କୋଟି ୩୨ଲକ୍ଷ ୪୧ହଜାର ୩୮୯ଟଙ୍କା ଜରିମାନା ଆଦାୟ କରାଯାଇଥିବା ଜଣାଯାଇଛି।
