ପାରାଦୀପ,୨୭ା୩ (ସ୍ବ.ପ୍ର.): ୨୦୧୧-୧୨ ମସିହାରେ ସମଗ୍ର ଦେଶରେ ଜନ ଲୋକପାଳ ଆଇନ୍ ପାଇଁ ଆନ୍ଦୋଳନ ହୋଇଥିଲା। ସେତେବେଳେ ଆନ୍ନା ହଜାରେ ଅନଶନ ମଧ୍ୟ କରିଥିଲେ। ଯେଉଁଥିପାଇଁ ୟୁପିଏ ସରକାର ପରବର୍ତ୍ତୀ ସମୟରେ ଶାସନରୁ ଯାଇଥିଲା ବୋଲି ଚର୍ଚ୍ଚା ହୁଏ। ସେହି ସମୟରେ ଓଡ଼ିଶା ସରକାର ରାଜ୍ୟରେ ଆଣିଥିଲେ ଓଡ଼ିଶା ଲୋକସେବା ଅଧିକାର ଆଇନ ୨୦୧୨। ୨୦୧୨ ସେପ୍ଟେମ୍ବର ୮ରେ ସରକାର ବିଭିନ୍ନ ଗଣମାଧ୍ୟମରେ ଏ ନେଇ ବିଜ୍ଞପ୍ତି ପ୍ରକାଶ କରିଥିଲେ। ଏହି ଆଇନ୍ ଏବେ ମଧ୍ୟ ବଳବତ୍ତର ଥିବା ଜଣାଯାଏ। ଏହି ଆଇନର ଉପାଦେୟତା ହେଲା ଜଣେ ସାଧାରଣ ନାଗରିକ ପ୍ରତ୍ୟେକ ସରକାରୀ ଦପ୍ତରରେ କେତେଦିନ ମଧ୍ୟରେ ସୁବିଧା ସୁଯୋଗ ପାଇପାରିବେ। ଉଦାହରଣସ୍ବରୂପ, ଜଣଙ୍କର ସନ୍ତାନ ଜନ୍ମ ନେବାର ୨୧ ଦିନ ମଧ୍ୟରେ ତାଙ୍କୁ ଜନ୍ମ ପ୍ରମାଣପତ୍ର ମିଳିବା କଥା। ଏଥିରେ ଯଦି ଖିଲାପ ହୁଏ ସମ୍ପୃକ୍ତ ବ୍ୟକ୍ତି ସେହି ଦପ୍ତରର ଉପରିସ୍ଥ ଅଧିକାରୀଙ୍କୁ ଏହି ଆଇନ ବଳରେ ଅଭିଯୋଗ କରି ପାରିବେ। ସେତେବେଳେ ସମ୍ପୃକ୍ତ ଜନ୍ମ ମୃତ୍ୟୁ ପଞ୍ଜୀକରଣ ଅଧିକାରୀଙ୍କୁ ଉପସ୍ଥିତ ଅଧିକାରୀ ଦଣ୍ଡିତ କରିବାର କ୍ଷମତା ରହିଛି। ଏମିତି ପ୍ରତ୍ୟେକ ବିଭାଗର ଲୋକଙ୍କ ସେବାପାଇଁ ନିୟମ ଓ ସମୟ ସାରଣୀ ରହିଛି। ପରିତାପର ବିଷୟ ହେଲା ଏବେ ସୁଦ୍ଧା ଏହି ଆଇନ୍ ସମ୍ପର୍କରେ ପ୍ରାୟ ଅଧିକାଂଶ ଲୋକ ଅବଗତ ନାହାନ୍ତି ବୋଲି ଆଇନଜୀବୀ ଗତିକୃଷ୍ଣ ଶତପଥୀ କହିଛନ୍ତି। ଏପରି କି ଏହି ଆଇନ୍ ଜରିଆରେ କୌଣସି ସରକାରୀ କର୍ମଚାରୀ ଦଣ୍ଡିତ ହେଲାଭଳି ଦୃଷ୍ଟାନ୍ତ ନାହିଁ ବୋଲି ସେ ମତ ପ୍ରକାଶ କରିଛନ୍ତି। ଏ ସମ୍ପର୍କରେ ଲୋଇସିଂହା ବିଧାୟକ ମୁକେଶ ମହାଲିଙ୍ଗ କୁହନ୍ତି, ଏହି ଆଇନ୍ ସମ୍ପର୍କରେ ଆଲୋଚନା କରିବା ପାଇଁ ବିଧାନସଭା ବାଚସ୍ପତିଙ୍କୁ ନୋଟିସ ଦେଇଛନ୍ତି।
