ଖୋର୍ଦ୍ଧା,୧୪ା୩ (ପ୍ରଭାତ ପାଣିଗ୍ରାହୀ): ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ବିଜେଡିରୁ ବହିଷ୍କୃତ ହେବା ପରେ ପୁଣି ଦଳକୁ ଫେରିବେ ବୋଲି ଆଶା ବାନ୍ଧିଥିଲେ। ଦଳୀୟ କର୍ମୀ, ନେତାଙ୍କ ସହ ସୁସମ୍ପର୍କ ସତ୍ତ୍ୱେ ଚେଷ୍ଟା କରି ମଧ୍ୟ ଦଳକୁ ଫେରିପାରି ନ ଥିଲେ। ଶେଷରେ ବାଧ୍ୟ ହୋଇ ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀଙ୍କ ସହ କଥା ହୋଇ ଶୀର୍ଷ ନେତୃତ୍ୱଙ୍କ ସହ ଆଲୋଚନା ପରେ ବିଧିବଦ୍ଧ ଭାବେ ଭାଜପା ରାଜ୍ୟ କାର୍ଯ୍ୟାଳୟରେ ସମର୍ଥକଙ୍କ ସହ ସାମିଲ ହୋଇଥିଲେ। ହେଲେ ଚିଲିକା ନିର୍ବାଚନମଣ୍ଡଳୀରେ ଭାଜପା କର୍ମୀଙ୍କ ମଧ୍ୟରେ ତାଙ୍କୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଫଳରେ ଭାଜପା ଭିତରୁ ତାଙ୍କୁ ବିରୋଧ ହେଉଥିବା ଓ ଆଗକୁ ଦଳ ଅଖାଡ଼ୁଆ ସ୍ଥିତିରେ ପଡ଼ିପାରେ ବୋଲି ଆଲୋଚନା ହେଲାଣି।
ପ୍ରଶାନ୍ତ ବାଲୁଗାଁ ମଣ୍ଡଳ ସଭାପତି ନିରଞ୍ଜନ ସେଠୀଙ୍କୁ ଗାଳିଗୁଲଜ, ଆକ୍ରମଣ କରିବା ସହ ପଞ୍ଚାୟତ ଓ ଏନ୍ଏସି ନିର୍ବାଚନ ପ୍ରଚାର ବେଳେ ଭାଜପା କର୍ମୀଙ୍କୁ ଦୁର୍ବ୍ୟବହାର କରିଥିଲେ। ଏଥିସହିତ ବାଣପୁର ପଲଟନ ପଡ଼ିଆରେ ଲୋକଙ୍କ ଉପରକୁ ଗାଡ଼ି ମଡ଼ାଇଦେବା ଘଟଣା ଚାରିଆଡ଼େ ବ୍ୟାପୀ ଯାଇଥିଲା। ଏପରିକି ବିଜେଡି ମଧ୍ୟ ସେହି ସମୟରେ ଏହାକୁ ନିନ୍ଦା କରିଥିଲା। ପ୍ରଶାନ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ତୃଣମୂଳ ସ୍ତରରୁ ରାଜ୍ୟସ୍ତରରେ ଭାଜପା ତୁମ୍ବିତୋଫାନ କରିବା ସହ ଜିଲା ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟକୁ ବହୁ ସଂଖ୍ୟାରେ ଘେରାଉ ମଧ୍ୟ କରିଥିଲେ। ୨୦୧୯ ନିର୍ବାଚନରେ ବିଜେଡି ଟିକଟରେ ପ୍ରଶାନ୍ତ ଲଢ଼ି ବିଜୟ ଲାଭ କରିବା ଠାରୁ ପରବର୍ତ୍ତୀ ସମୟରେ ଏକାଧିକ ଘଟଣାରେ ଭାଜପା କର୍ମୀ ଏବଂ ପ୍ରଶାନ୍ତ ମୁହାଁମୁହିଁ ହୋଇଥିଲେ। ଏଥିପାଇଁ ଚିଲିକା ବିଧାନସଭା ନିର୍ବାଚନମଣ୍ଡଳୀ ସର୍ବଭାରତୀୟସ୍ତରରେ ନିନ୍ଦିତ ହେଲା ବୋଲି ଭାଜପାର ନେତୃବୃନ୍ଦ ଗଣମାଧ୍ୟମ ଆଗରେ ଭାଷଣ ଦେଉଥିଲେ। ପ୍ରଶାନ୍ତ ଭାଜପାରେ ସାମିଲ ହେବା ପରେ ଚିଲିକା ନିର୍ବାଚନମଣ୍ଡଳୀର ଦଳୀୟ କର୍ମୀ ଏହାକୁ ସହଜରେ ହଜମ କରିପାରୁନାହାନ୍ତି। ଏପରିକି ଏକାଧିକ କର୍ମୀ ଶାସକ ଦଳର ଜଣେ ପ୍ରଭାବଶାଳୀ ନେତାଙ୍କ ସହ ଯୋଗାଯୋଗରେ ରହିଥିବା ଏବଂ ଖୁବ୍ଶୀଘ୍ର ଦଳ ପରିବର୍ତ୍ତନ କରିପାରନ୍ତି ବୋଲି ଚର୍ଚ୍ଚା ହେଲାଣି ।
ପ୍ରକାଶ ଯେ, ଲୋକଙ୍କ ଉପରକୁ ଗାଡ଼ି ମଡ଼ାଇଦେବା ଘଟଣାରେ ସୁପ୍ରିମକୋର୍ଟ ପ୍ରଶାନ୍ତଙ୍କୁ ଏକ ବର୍ଷ ଚିଲିକା ନିର୍ବାଚନମଣ୍ଡଳୀ ଗସ୍ତ ଓ ସଭାସମିତି ଉପରେ କଟକଣା ଜାରି କରିଥିଲେ। ଯଦିଓ ଏହି ଆଦେଶନାମାକୁ ଏକ ବର୍ଷ ପୂରିଲାଣି, ପ୍ରଶାନ୍ତ ଏଯାବତ୍ ଚିଲିକା ଅଞ୍ଚଳରେ ବଡ଼ ସମାବେଶ, ଶୋଭାଯାତ୍ରା କରି ନ ଥିଲେ। ଏବେ ଭାଜପାରେ ମିଶିବା ପରେ ଖୋର୍ଦ୍ଧା ଏବଂ ଚିଲିକାରେ ଏକ ବଡ଼ ସମାବେଶ ପାଇଁ ଯୋଜନା କରୁଥିବା ଜଣାପଡ଼ିଛି। ସେ ଏକପ୍ରକାର ନିଜ ଶକ୍ତି ପ୍ରଦର୍ଶନ ପାଇଁ ପ୍ରସ୍ତୁତି ଜାରି ରଖିଥିବା ବେଳେ ଦଳରେ ଏକ ଗୋଷ୍ଠୀ ପ୍ରଶାନ୍ତଙ୍କ ନେତୃତ୍ୱକୁ ମାନିନେଇ ପାରୁନାହାନ୍ତି। ଫଳରେ ଆଗାମୀ ନିର୍ବାଚନରେ ଏହାର ପ୍ରତିଫଳନ ଦେଖିବାକୁ ମିଳିପାରେ ବୋଲି ଆଲୋଚନା ହେଉଛି।
ପ୍ରଶାନ୍ତ ଜିଲା ପରିଷଦ ଚେୟାରମ୍ୟାନ ପରେ ଯୋଜନା କମିଟି ସଭାପତି, ୨୦୧୪ରେ ବେଗୁନିଆ ବିଧାୟକ ହୋଇଥିବା ବେଳେ ୨୦୧୯ରୁ ଚିଲିକା ବିଧାୟକ ଅଛନ୍ତି। ଫଳରେ ଚିଲିକା ସମେତ ଖୋର୍ଦ୍ଧା ଓ ବେଗୁନିଆରେ ତାଙ୍କର ଲୋକପ୍ରିୟତା ରହିଛି। ସବୁଠି ପ୍ରଶାନ୍ତଙ୍କ ଦଖଲ ରହିଥିଲେ ମଧ୍ୟ ତାଙ୍କ ମନମୁଖି କାର୍ଯ୍ୟ ଭାଜପାର କେତେଜଣ କର୍ମୀଙ୍କ ମହଲରେ ଅସନ୍ତୋଷ ସୃଷ୍ଟି କରିଛି। ଏ ଦିଗରେ କିଛି ଉନ୍ନତି ନ ଘଟିଲେ, ସେ ଭାଜପା ପାଇଁ ଅଡ଼ୁଆ ହେବେ ବୋଲି ଆଲୋଚନା ହେଉଛି।
