କୋଲକାତା,୧୧।୧୦: ପଶ୍ଚିମବଙ୍ଗର ପଶ୍ଚିମ ବର୍ଦ୍ଧମାନ ଜିଲାରେ ଅଜ୍ଞାତ ଲୋକଙ୍କ ଦ୍ୱାରା ଓଡ଼ିଶାର ଜଣେ ଡାକ୍ତରୀ ଛାତ୍ରୀଙ୍କୁ ବଳାତ୍କାର କରାଯାଇଥିବା ଅଭିଯୋଗ ହୋଇଛି ବୋଲି ପୋଲିସ ଶନିବାର କହିଛି। ଛାତ୍ରୀଙ୍କ ପରିବାର ସଦସ୍ୟ କହିଛନ୍ତି ଯେ ଘଟଣାଟି ଶୁକ୍ରବାର ରାତିରେ ଦୁର୍ଗାପୁରର ଏକ ଘରୋଇ ମେଡିକାଲ କଲେଜ କ୍ୟାମ୍ପସ ବାହାରେ ଘଟିଥିଲା। ସେମାନେ କହିଛନ୍ତି ଯେ ଦ୍ୱିତୀୟ ବର୍ଷର ଛାତ୍ରୀ ଜଣଙ୍କ ଜଣେ ବନ୍ଧୁଙ୍କ ସହ ରାତ୍ରୀଭୋଜନ ପାଇଁ ବାହାରକୁ ଯାଇଥିଲେ। ପଶ୍ଚିମବଙ୍ଗରେ ପୂର୍ବରୁ ମଧ୍ୟ ଛାତ୍ରୀଙ୍କ ସହ ବଳାତ୍କାର ଘଟଣା ଘଟିଛି। ଆର୍.ଜି କର ମେଡିକାଲ କଲେଜର ଜଣେ ଜୁନିଅର ମହିଳା ଡାକ୍ତରଙ୍କ ବଳାତ୍କାର ଏବଂ ହତ୍ୟା ଦେଶକୁ ଥରାଇ ଦେଇଥିଲା। ଏହା ପରେ, ଜଣେ ଆଇନ କଲେଜ ଛାତ୍ରୀଙ୍କ ସହ ବଳାତ୍କାର ମାମଲା ମଧ୍ୟ ସାମ୍ନାକୁ ଆସିଥିଲା।
ଏବେ, ପଶ୍ଚିମବଙ୍ଗରେ ଆଉ ଏକ ଛାତ୍ରୀଙ୍କ ସହ ବଳାତ୍କାର ଘଟଣା ସାମ୍ନାକୁ ଆସିଛି। ଜଣେ ପୋଲିସ ଅଧିକାରୀ କହିଛନ୍ତି , ଓଡ଼ିଶାର ଜଳେଶ୍ୱରର ବାସିନ୍ଦା ଡାକ୍ତରୀ ଛାତ୍ରୀ ନିକଟସ୍ଥ ଏକ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ସେ ଆହୁରି ମଧ୍ୟ କହିଛନ୍ତି, “ଛାତ୍ରୀଙ୍କ ପରିବାରର ଅଭିଯୋଗ ଆଧାରରେ ଆମେ ତଦନ୍ତ ଆରମ୍ଭ କରୁଛୁ। ଛାତ୍ରୀଙ୍କ ପିତାମାତା କହିଛନ୍ତି , ସେମାନେ ଆଜି ସକାଳେ ସେମାନଙ୍କ ଝିଅର ବନ୍ଧୁମାନଙ୍କଠାରୁ ଫୋନ ପାଇବା ପରେ ଦୁର୍ଗାପୁରରେ ପହଞ୍ଚିଥିଲେ। ଛାତ୍ରୀଙ୍କ ମାଆ ଅଭିଯୋଗ କରିଛନ୍ତି ଯେ ତାଙ୍କ ଝିଅ ଶୁକ୍ରବାର ରାତି ପ୍ରାୟ ୧୦ଟା ସମୟରେ ଜଣେ ବନ୍ଧୁଙ୍କ ସହ ରାତ୍ରୀଭୋଜନ ପାଇଁ କଲେଜ କ୍ୟାମ୍ପସରୁ ବାହାରକୁ ଯାଇଥିବା ବେଳେ ଗଣବଳାତ୍କାର ଶିକାର ହୋଇଥିଲେ। ଛାତ୍ରୀଙ୍କ ବାପା କହିଛନ୍ତି, “ଆମେ ତାଙ୍କ ବନ୍ଧୁମାନଙ୍କଠାରୁ ଫୋନ ପାଇଥିଲୁ ଏବଂ ଘଟଣା ବିଷୟରେ ଜାଣିଲୁ। ଆମେ ଆଜି ସକାଳେ ଏଠାକୁ ଆସି ପୋଲିସ ଅଭିଯୋଗ କରିଥିଲୁ। ମୁଁ ଶୁଣିଥିଲି ଯେ କଲେଜ ଭଲ ଶିକ୍ଷା ପ୍ରଦାନ କରେ, ତେଣୁ ଆମେ ଆମ ଝିଅକୁ ଡାକ୍ତରୀ ପାଠପଢ଼ା ପାଇଁ ଏଠାକୁ ପଠାଇଥିଲୁ।
କୋଲକାତାର ଆର୍.ଜି କର ମେଡିକାଲ କଲେଜରେ ଜଣେ ମହିଳା ଡାକ୍ତରଙ୍କୁ ବଳାତ୍କାର ଏବଂ ହତ୍ୟା କରାଯାଇଥିଲା। ଏହି ଭୟଙ୍କର ଘଟଣା ଗତ ବର୍ଷ ଘଟିଥିଲା। ଏହା ସମଗ୍ର ପଶ୍ଚିମବଙ୍ଗରେ ବ୍ୟାପକ ଆଲୋଡ଼ନ ସୃଷ୍ଟି କରିଥିଲା।
Dharitri – The Largest & Most Trusted Odia Daily
