ଭୁବନେଶ୍ୱର, ୧୫।୨(ବ୍ୟୁରୋ): ପେଟ୍ରୋଲ, ଡିଜେଲ ସହ ଏଲ୍ପିଜି ଗ୍ୟାସ୍ ଦର ଅହେତୁକ ଭାବେ ବଢ଼ି ଚାଲିଛି। ଏଥିରେ ସାଧାରଣ ଲୋକେ ଅତିଷ୍ଠ ହୋଇପଡ଼ିଥିବାବେଳେ ଏହାର ପ୍ରତିବାଦରେ ସୋମବାର କଂଗ୍ରେସ ପକ୍ଷରୁ ୬ ଘଣ୍ଟିଆ ଓଡ଼ିଶା ବନ୍ଦ ଡାକରା ଦିଆଯାଇଛି। ସକାଳ ୭ଟାରୁ ଦିନ ୧ଟା ପର୍ଯ୍ୟନ୍ତ ରାଜ୍ୟରେ ସବୁକିଛି ବନ୍ଦ ରଖିବାକୁ କଂଗ୍ରେସ ପକ୍ଷରୁ ଅନୁରୋଧ କରାଯାଇଛି। ଏହି ବନ୍ଦ ପାଳନକୁ ଶାନ୍ତିପୂର୍ଣ୍ଣ କରିବା ପାଇଁ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ନିରଞ୍ଜନ ପଟ୍ଟନାୟକ ଆହ୍ବାନ ଦେଇଛନ୍ତି। ତେବେ ଆମ୍ବୁଲାନ୍ସ, ଜରୁରୀ ସେବାରେ ନିୟୋଜିତ ଥିବା ଯାନବାହନ, ଔଷଧ ଦୋକାନ, ଅତ୍ୟାବଶ୍ୟକ ସେବାରେ ନିୟୋଜିତ ଥିବା ଗାଡ଼ିକୁ ଏଥିରୁ ବାଦ୍ ଦିଆଯିବ। ସେହିପରି ଯେଉଁ ଗାଡ଼ିରେ ଫୁଲ ସଜା ହୋଇଥିବ, ତାକୁ ମଧ୍ୟ ବନ୍ଦ ଡାକରାରୁ ବାଦ୍ ଦିଆଯିବ। ଅର୍ଥାତ୍ ବିବାହ ପାଇଁ ଯାଉଥିବା ଗାଡିକୁ ଏଥିରୁ ବାଦ୍ ଦିଆଯିବ। ସାଧାରଣ ଲୋକଙ୍କ ଲାଗି ଯେପରି ଅସୁବିଧା ହେବ ନାହିଁ ତାହା ଉପରେ ଧ୍ୟାନ ଦିଆଯିବ ବୋଲି ପିସିସି ସଭାପତି କହିଛନ୍ତି। କିଛିଦିନ ତଳେ ନିରଞ୍ଜନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ତେଲ ଦର ଉପରୁ ଲିଟର ପିଛା ୧୦ ଟଙ୍କା ଦର ହ୍ରାସ କରି ଲୋକଙ୍କ ଉପରୁ ବୋଝ କମାଇବାକୁ ଅନୁରୋଧ କରିଥିଲେ ନଚେତ୍ ୧୫ରେ ରାଜ୍ୟ ବନ୍ଦ କରାଯିବ ବୋଲି କହିଥିଲେ। ତେବେ ଏବେ କେବଳ ପେଟ୍ରୋଲ, ଡିଜେଲ, ଏଲ୍ପିଜି ଗ୍ୟାସ୍ର ଦର ବୃଦ୍ଧି ନୁହେଁ, ବରଂ ବେକାରି
ସମସ୍ୟା, ରାଜ୍ୟରେ ବଢ଼ି ଚାଲିଥିବା ନାରୀ ଓ ଶିଶୁ ନିର୍ଯାତନା, ବିଗିଡିଥିବା ଆଇନ ଶୃଙ୍ଖଳା ପରିସ୍ଥିତି ଭଳି ଏକାଧିକ ପ୍ରସଙ୍ଗ ନେଇ ବନ୍ଦ ପାଳନ କରାଯାଉଥିବା କଂଗ୍ରେସ ପକ୍ଷରୁ କୁହାଯାଇଛି। ବନ୍ଦ ଡାକରାକୁ ଦୃଷ୍ଟିରେ ରଖି ସ୍କୁଲ, କଲେଜ ବନ୍ଦ ରଖାଯାଇଥିବା ବେଳେ ରାଜ୍ୟରେ ଘରୋଇ ବସ୍ ଚଳାଚଳ ମଧ୍ୟ ବନ୍ଦ ରହିବ ବୋଲି ଘୋଷଣା କରାଯାଇଛି। ରାଜ୍ୟ ବସ୍ ମାଲିକ ସଂଘ କୋଷାଧ୍ୟକ୍ଷ ବରଦା ଆଚାର୍ଯ୍ୟ କହିଛନ୍ତି, ବନ୍ଦ ଡାକରାକୁ ସମର୍ଥନ ଦେଇ କେବଳ ବନ୍ଦ ସମୟରେ ବସ୍ ଚଳାଚଳ ନ କରିବାକୁ ନିଷ୍ପତ୍ତି ନିଆଯାଇଛି। କାରଣ ବନ୍ଦ ସମୟରେ ଢେଲା ମାଡ଼ କିମ୍ବା ବସ୍ ପୋଡ଼ାଜଳାର ଆଶଙ୍କା ରହିଛି। ସେହିପରି ବନ୍ଦ ଡାକରା ପରେ ଲୋକଙ୍କ ଯାତାୟାତରେ ଯେପରି କୌଣସି ଅସୁବିଧା ନ ହେବ ସେଥିପାଇଁ ଦିନ ୧ଟା ପରେ ବସ୍ ଚଳାଚଳକୁ ସ୍ବାଭାବିକ କରାଯିବ ବୋଲି ବୋଲି ଆଚାର୍ଯ୍ୟ କହିଛନ୍ତି। ସମାନଭାବେ ସରକାରୀ କର୍ମଚାରୀଙ୍କ ଯାତାୟାତକୁ ଦୃଷ୍ଟିରେ ରଖି ରାଜ୍ୟ ଗୃହ ବିଭାଗ ପକ୍ଷରୁ ମଧ୍ୟ ଏକ ନିର୍ଦ୍ଦେଶନାମା ଜାରି କରାଯାଇଛି। ସବୁ କର୍ମଚାରୀଙ୍କୁ ସକାଳ ୯ଟା ୧୫ ସୁଦ୍ଧା ଅଫିସରେ ପହଞ୍ଚିବାକୁ କୁହାଯାଇଛି। ସେହିପରି ଲୋକସେବା ଭବନର ସମ୍ମୁଖ ଗେଟ୍ ବନ୍ଦ ରହିବା ଲାଗି ନିଷ୍ପତ୍ତି ହୋଇଛି। ସବୁ କର୍ମଚାରୀ ନିଜର ପାସ୍ ଏବଂ ଯଦି ଚାରି ଚକିଆରେ ଆସନ୍ତି ତେବେ କାର୍ ପାସ୍ ଆଣି ଆସିବେ। ରାସ୍ତାରେ କିମ୍ବା କେଉଁ ସ୍ଥାନରେ କର୍ମଚାରୀ ଯଦି କିଛି ଅସୁବିଧାର ସମ୍ମୁଖୀନ ହୁଅନ୍ତି ତେବେ ସେମାନଙ୍କ ପାଇଁ ଲୋକସେବା ଭବନ ସିକ୍ୟୁରିଟି ଅଫିସରଙ୍କ ଲ୍ୟାଣ୍ଡଲାଇନ ନମ୍ବର ଜାରି କରାଯାଇଛି। ସେମାନେ ଯୋଗାଯୋଗ କରିପାରିବେ ବୋଲି ନିର୍ଦ୍ଦେଶ ଦିଆଯାଇଛି।
ସୂଚନାଯୋଗ୍ୟ, ୨୦୨୦ ନଭେମ୍ବରଠାରୁ ଏବେ ସୁଦ୍ଧା ପେଟ୍ରୋଲ, ଡିଜେଲ ଦର ପ୍ରାୟ ୨୭ ଥର ବୃଦ୍ଧି ହୋଇସାରିଛି। ଜାନୁୟାରୀରୁ ଏବେ ସୁଦ୍ଧା ତୈଳ ଦର କେନ୍ଦ୍ର ସରକାର ୧୮ ଥର ବୃଦ୍ଧି କରିଛନ୍ତି। ୨୦୨୧-୨୨ ବଜେଟରେ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରେ ୨ ଟଙ୍କା ୫୦ ପଇସା ଏବଂ ୪ଟଙ୍କା କୃଷି ସେସ୍ ଲଗାଇବା ନେଇ ଘୋଷଣା କରିଛନ୍ତି। ଏପରି କି ଏହି ସେସ୍ ପ୍ରଭାବ ଖାଉଟିଙ୍କ ଉପରେ ସିଧାସଳଖ ପଡ଼ିବ ନାହିଁ କିମ୍ବା ତେଲ ଦର ବଢ଼ିବନି ବୋଲି କୁହାଯାଇଛି। ସେହିପରି ବର୍ଦ୍ଧିତ ସେସ୍ ତୈଳ କମ୍ପାନୀଗୁଡ଼ିକ ବହନ କରିବେ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ସ୍ପଷ୍ଟ କରିଥିଲେ। ଏହା ଭିତରେ ୮ଟି ପର୍ଯ୍ୟାୟରେ ଉପଭୋକ୍ତାଙ୍କ ମୁଣ୍ଡ ଉପରେ ଅତିରିକ୍ତ ବୋଝ ପଡ଼ିଲାଣି।
