ଭୁବନେଶ୍ୱର,୨୨।୪(ବ୍ୟୁରୋ): ଓଡ଼ିଶା ଜଳ ବିଦ୍ୟୁତ୍ ନିଗମର ୨୭ତମ ପ୍ରତିଷ୍ଠା ଦିବସ ଗୁରୁବାର ରବୀନ୍ଦ୍ର ମଣ୍ଡପରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ମୁଖ୍ୟ ଅତିଥି ଭାବେ ଶିଳ୍ପ, ଶକ୍ତି, ଏମ୍ଏସ୍ଏମ୍ଇ ଓ ଗୃହ ବିଭାଗ ମନ୍ତ୍ରୀ କ୍ୟାପ୍ଟେନ ଦିବ୍ୟଶଙ୍କର ମିଶ୍ର ଯୋଗଦେଇ କହିଛନ୍ତି, ଓଡ଼ିଶାରେ ୯୫ଲକ୍ଷ ଲୋକଙ୍କୁ ବିଦ୍ୟୁତ ସେବା ଯୋଗାଇ ଦିଆଯାଉଛି। ଦିନ ଥିଲା ବାତ୍ୟା ସମୟରେ ବିଦ୍ୟୁତ ବିଚ୍ଛିନ୍ନ ହେଲେ ପୁଣି ସଂଯୋଗ ପାଇଁ ଦିନ ଦିନ ବିତିଯାଉଥିଲା। କିନ୍ତୁ ବର୍ତ୍ତମାନ ୨୪ଘଣ୍ଟା ମଧ୍ୟରେ ବିଦ୍ୟୁତ୍ ସେବା ମିଳିପାରୁଛି। ଅନ୍ଧାରରେ ରହୁଥିବା ଓଡ଼ିଶାରେ ଆଜି ଆଲୋକୀକରଣ ହୋଇଛି। ୨୦୨୧-୨୨ ପାଇଁ ୧ଲକ୍ଷ ୫୦ହଜାର କୋଟିର ବଜେଟ ଉପସ୍ଥାପନା କରାଯାଇଥିବା ବେଳେ ୨୦୨୨-୨୩ ପାଇଁ ୨ଲକ୍ଷ ହଜାର କୋଟି ହୋଇଛି। ଏହି ବଜେଟକୁ ଦେଖିଲେ ରାଜ୍ୟର ବିକାଶର ଅଭିବୃଦ୍ଧି ସ୍ପଷ୍ଟ ଅନୁମେୟ ବୋଲି ମନ୍ତ୍ରୀ ମିଶ୍ର ଆଲୋକପାତ କରିଥିଲେ। ସମ୍ମାନିତ ଅତିଥି ଶିଳ୍ପ, ଦକ୍ଷତା, ବୈଷୟିକ ଶିକ୍ଷା ବିଭାଗର ପ୍ରମୁଖ ଶାସନ ସଚିବ ହେମନ୍ତ ଶର୍ମା, ଅର୍ଥ ବିଭାଗର ପ୍ରମୁଖ ଶାସନ ସଚିବ ବିଶାଳ କୁମାର ଦେବ, ଓଡ଼ିଶା ଜଳବିଦ୍ୟୁତ୍ ନିଗମର ପରିଚାଳନା ନିର୍ଦ୍ଦେଶକ ଅମରେଶ କୁମାର ଉପସ୍ଥିତ ଥିଲେ। ସୂଚନା ଓ ଲୋକ ସମ୍ପର୍କ ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ଆୟୋଜିତ ସଭାକୁ ପୌରୋହିତ୍ୟ କରିଥିଲେ। ଶ୍ରେଷ୍ଠତା ପ୍ରତିପାଦନ କରିଥିବା ଚିପିଲିମା ହାଇଡ୍ରୋ ଇଲେକ୍ଟ୍ରିକ ପ୍ରୋଜେକ୍ଟକୁ ପ୍ରଥମ ପୁରସ୍କାର ଦିଆଯାଇଥିବା ବେଳେ ଅପର ଇନ୍ଦ୍ରାବତୀ ହାଇଡ୍ରୋ ଇଲେକ୍ଟ୍ରିକ ପ୍ରୋଜେକ୍ଟ, ମୁଖିଗୁଡ଼ା ଦ୍ୱିତୀୟ ଓ ହୀରାକୁଦ ହାଇଡ୍ରୋ ଇଲେକ୍ଟ୍ରିକ ପ୍ରୋଜେକ୍ଟ, ବୁର୍ଲା ତୃତୀୟ ସ୍ଥାନରେ ରହି ପୁରସ୍କୃତ ହୋଇଥିଲେ। ସଭାକାର୍ଯ୍ୟ ପରେ ନିଗମର ଡିଜିଏମ(ଇଲେକ୍ଟ୍ରିକାଲ) ସୁରଜିତ୍ ପଲ ଧନ୍ୟବାଦ ଅର୍ପଣ କରିବା ସହ ମଞ୍ଚାସୀନ ଅତିଥିମାନଙ୍କୁ ସମ୍ବର୍ଦ୍ଧନା ଜଣାଇଥିଲେ। ଏହା ପରେ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ ଝଙ୍କାର। ନୂପୁର ଡ୍ୟାନ୍ସ ଏକାଡେମୀ ପକ୍ଷରୁ ଓଡ଼ିଶା ମୋ ଓଡ଼ିଶାର ନୃତ୍ୟାଭିନୟ ଦର୍ଶକଙ୍କ ମନରେ ଓଡ଼ିଆପଣିଆର ସମ୍ଭାର ସୃଷ୍ଟି କରିଥିଲା। ଲାସ୍ୟକଳା ଡ୍ୟାନ୍ସ ଭିଜନ ପକ୍ଷରୁ ସମ୍ବଲପୁରୀ ନୃତ୍ୟ ଓ ଜିତେନ୍ଦ୍ର ଓଝାଙ୍କର କମେଡିରେ ଦର୍ଶକ ଖୁବ୍ ମଜା ନେଇଥିଲେ। କିଶୋର କୁମାରଙ୍କ ସଙ୍ଗୀତକୁ ଦର୍ଶକଙ୍କ ସାମ୍ନାରେ ଉପସ୍ଥାପନା କରି ଡ. ଅଚ୍ୟୁତାନନ୍ଦ ମିଶ୍ର ଓ ସାଥୀ ସାଂସ୍କୃତିକ କାର୍ଯ୍ୟକ୍ରମର ପରିସମାପ୍ତି କରିଥିଲେ।