ଭୁବନେଶ୍ୱର, ୧୧।୧(ବ୍ୟୁରୋ): ଦେଶରେ ଏବେ କରୋନାର ନୂଆ ଭାରିଆଣ୍ଟ ଓମିକ୍ରନ୍ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହି ଭୂତାଣୁ ଚିହ୍ନଟ ପାଇଁ କରୋନା ଆକ୍ରାନ୍ତଙ୍କ ନମୁନାକୁ ଜିନୋମ ସିକ୍ୱେନ୍ସିଂ ପାଇଁ ଲାବ୍କୁ ପଠାଯାଉଛି। ରିପୋର୍ଟ ଆସିବାକୁ କିଛିଦିନ ସମୟ ଲାଗୁଥିବାରୁ ସଂକ୍ରମଣ ବଢ଼ିଯାଉଛି। କିନ୍ତୁ ଏହି ଭୂତାଣୁକୁ ଏବେ ସହଜରେ ଓ ଶୀଘ୍ର ଚିହ୍ନଟ କରିବ ‘ଓମିସିଓର’। କିଛିଦିନ ତଳେ ଟାଟା ପ୍ରସ୍ତୁତ କରିଥିବା ଏହି ଟେଷ୍ଟିଂ କିଟ୍କୁ ଇଣ୍ଡିଆନ କାଉନ୍ସିଲ୍ ଅଫ୍ ମେଡିକାଲ ରିସର୍ଚ୍ଚ(ଆଇସିଏମ୍ଆର୍) ମଞ୍ଜୁରୀ ପ୍ରଦାନ କରିଛି। ତେବେ ଓଡ଼ିଶା ପ୍ରଥମ ରାଜ୍ୟ ଭାବେ ‘ଓମିସିଓର’ କିଟ୍ କିଣିବାକୁ ଯାଉଛି। ସୋମବାର ଓଡ଼ିଶା ଷ୍ଟେଟ୍ ମେଡିକାଲ କର୍ପୋରେଶନ ଲିମିଟେଡ୍ (ଓଏସ୍ଏମ୍ସିଏଲ୍) ୫ ଲକ୍ଷ କିଟ୍ ପାଇଁ ଟାଟା ମେଡିକାଲ ଆଣ୍ଡ୍ ଡାଇଗ୍ନୋଷ୍ଟିକ୍ସ ଲିମିଟେଡ୍ (ଟାଟା ଏମ୍ଡି)କୁ ଅର୍ଡର ଦେଇଥିବା ଜଣାପଡ଼ିଛି। ଏହି କିଟ୍ ଆସିବା ପରେ ରାଜ୍ୟକୁ ଆଉ ଆକ୍ରାନ୍ତ ଲୋକଙ୍କ ନମୁନାର ଜିନୋମ ସିକ୍ୱେନ୍ସିଂ ପାଇଁ ଲାବ୍କୁ ପଠାଇ ଅପେକ୍ଷା କରିବାକୁ ପଡ଼ିବ ନାହିଁ। ଏହି କିଟ୍ ଦ୍ବାରା ଲୋକେ ଓମିକ୍ରନରେ ଆକ୍ରାନ୍ତ ହୋଇଛନ୍ତି କି ନାହିଁ ତାହା ଜଣାପଡ଼ିଯିବ।
ଟାଟା ଏମ୍ଡିର ସିଇଓ ତଥା ପରିଚାଳନା ନିର୍ଦ୍ଦେଶକ ଗିରୀଶ କ୍ରିଷ୍ଣମୂର୍ତ୍ତି କହିଛନ୍ତି, ଓମିସିଓର ହେଉଛି ଏକମାତ୍ର ଟେଷ୍ଟ କିଟ୍, ଯାହା ଓମିକ୍ରନ୍ ଭାରିଆଣ୍ଟକୁ ସହଜରେ ଚିହ୍ନଟ କରିପାରିବ। ଏହା ଉପରେ ଭରସା କରି ପ୍ରଥମ ରାଜ୍ୟ ଭାବେ ଓଡ଼ିଶା ଏହାକୁ ଅର୍ଡର କରିଥିବାରୁ ଓଡ଼ିଶା ସରକାରଙ୍କୁ ଧନ୍ୟବାଦ ଦେବାକୁ ଚାହୁଁଛୁ। ଏବେ ଓମିକ୍ରନ ଭୂତାଣୁ ଚିହ୍ନଟ ନିମନ୍ତେ ଅନ୍ୟ କିଟ୍ ବ୍ୟବହାର କରାଯାଉଛି। ଭାରତରେ ଓମିକ୍ରନ୍ ଭାରିଆଣ୍ଟକୁ ଚିହ୍ନଟ କରିବା ପାଇଁ ବ୍ୟବହୃତ ହେଉଥିବା କିଟ୍ ଆମେରିକାର ଥର୍ମୋ ଫିସର କମ୍ପାନୀ ବିକଶିତ କରିଛି। ଭାରିଆଣ୍ଟକୁ ଚିହ୍ନିବା ପାଇଁ ଏହା ଏସ୍ ଜିନ୍ ଟାର୍ଗେଟ୍ ଫେଲିୟୋର ଷ୍ଟ୍ରାଟେଜି (ଏସ୍ଜିଟିଏଫ୍) କୌଶଳ ବ୍ୟବହାର କରୁଛି। ଏବେ ଆଇସିଏମ୍ଆର୍ ଟାଟାର ଯେଉଁ କିଟ୍କୁ ମଞ୍ଜୁରୀ ପ୍ରଦାନ କରିଛନ୍ତି, ତାହାର ନାମ ଟାଟା ଏମ୍ଡି ଚେକ୍ ଆର୍ଟି-ପିସିଆର୍ ଓମିସିଓର ରହିଛି ବୋଲି କ୍ରିଷ୍ଣମୂର୍ତ୍ତି କହିଛନ୍ତି।
