ଭୁବନେଶ୍ୱର, ୧୪।୭(ବ୍ୟୁରୋ): କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ)ର ଦ୍ୱାଦଶ ପରୀକ୍ଷା ଫଳ ସୋମବାର ପ୍ରକାଶ ପାଇଛି। ଏଥର ସର୍ବଭାରତୀୟ ସ୍ତରରେ ପାସ୍ ହାର ୮୮.୭୮% ରହିଛି। ଗତବର୍ଷ ପାସ୍ ହାର ୮୩.୪୦% ରହିଥିଲାବେଳେ ଚଳିତବର୍ଷ ଅଧିକ ୫.୩୮% ଭଲ ରେଜଲ୍ଟ ହୋଇଛି। ସେପଟେ ଓଡ଼ିଶା ପାସ୍ ହାର ଜାତୀୟ ହାରଠାରୁ ଅଧିକ ଅର୍ଥାତ୍ ୮୯.୦୨% ରହିଛି। ଓଡ଼ିଶାରେ ୧୮,୪୮୬ଜଣ ଛାତ୍ରୀଛାତ୍ର ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୧୬,୪୫୭ଜଣ ଉତ୍ତୀର୍ଣ୍ଣ ହୋଇଛନ୍ତି। ତେବେ କୋଭିଡ୍ ୧୯ ପାଇଁ ମେରିଟ୍ ଲିଷ୍ଟ୍ ପ୍ରକାଶ ପାଇନାହିଁ। ଏବର୍ଷ ମଧ୍ୟ ଦେଶରେ ଛାତ୍ରଙ୍କ ତୁଳନାରେ ଛାତ୍ରୀମାନେ ଭଲ ପ୍ରଦର୍ଶନ କରିଛନ୍ତି। ଛାତ୍ରୀଙ୍କ ପାସ୍ ହାର ଛାତ୍ରଙ୍କଠାରୁ ୫.୯୬% ଅଧିକ ରହିଛି। ଛାତ୍ରଙ୍କ ପାସ୍ ହାର ୮୬.୧୯% ଥିବାବେଳେ ଛାତ୍ରୀଙ୍କ ପାସ୍ ହାର ୯୨.୧୫% ରହିଛି। ସେହିପରି ତୃତୀୟ ଲିଙ୍ଗଙ୍କ ପାସ୍ ହାର ୬୬.୬୭% ରହିଛି।
ଅନ୍ୟପକ୍ଷରେ ଭୁବନେଶ୍ୱର ରିଜିଅନ (ଓଡ଼ିଶା, ଛତିଶଗଡ଼ ଓ ପଶ୍ଚିମବଙ୍ଗ)ରେ ପାସ୍ ହାର ୯୧.୪୬% ଥିବାବେଳେ ତ୍ରିଭେନ୍ଦ୍ରମ ରିଜିଅନ୍ରେ ସର୍ବାଧିକ ୯୭.୬୭% ରହିଛି। ପାଟଣା ରିଜିଅନ୍ରେ ସର୍ବନିମ୍ନ ୭୪.୫୭% ରେଜଲ୍ଟ ହୋଇଛି। ନବୋଦୟ ସ୍କୁଲରେ ସର୍ବାଧିକ ୯୮.୭୦%, କେନ୍ଦ୍ରୀୟ ବିଦ୍ୟାଳୟରେ ୯୮.୬୨% ଓ ଘରୋଇ ବିଦ୍ୟାଳୟର ୮୮.୨୨% ପିଲା ପାସ୍ କରିଛନ୍ତି।
ଚଳିତବର୍ଷ ସାରା ଦେଶରେ ୧୩,୧୦୯ ସ୍କୁଲର ୪,୯୮୪ କେନ୍ଦ୍ରରେ ଦ୍ୱାଦଶ ପରୀକ୍ଷା ଅନୁଷ୍ଠିତ ହୋଇଥିଲା। ୧୨,୦୩,୫୯୫ ଛାତ୍ରୀଛାତ୍ର ପଞ୍ଜୀକୃତ କରିଥିବାବେଳେ ୧୧ଲକ୍ଷ ୯୨ହଜାର ଛାତ୍ରୀଛାତ୍ର ପରୀକ୍ଷା ଦେଇଥିଲେ। ମୋଟ ୧୦୫୯,୦୮୦ଜଣ ଛାତ୍ରୀଛାତ୍ର ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ଏମାନଙ୍କ ମଧ୍ୟରୁ ପ୍ରାୟ ୩୮,୦୦୦ ଛାତ୍ରୀଛାତ୍ର ୯୫% ଉପରେ ନମ୍ବର ରଖିଥିବାବେଳେ ୧.୫୭ଲକ୍ଷରୁ ଊର୍ଦ୍ଧ୍ୱ ଛାତ୍ରୀଛାତ୍ର ୯୦% ଉପରେ ରଖିଛନ୍ତି। ଛାତ୍ରୀଛାତ୍ରମାନେ cbseresults.nic.in ଓ୍ବେବ୍ସାଇଟ୍ରେ ନିଜର ପରୀକ୍ଷା ଫଳ ଦେଖିପାରିବେ ବୋଲି ବୋର୍ଡ ପକ୍ଷରୁ କୁହାଯାଇଛି।
ତେବେ ସିବିଏସ୍ଇ ଦ୍ୱାଦଶ ରେଜଲ୍ଟ ପ୍ରକାଶ ପାଇବା ନେଇ ମାନବ ସମ୍ବଳ ମନ୍ତ୍ରୀ ରମେଶ ପୋଖରିୟାଲ ଟୁଇଟ୍ କରି ସୂଚନା ଦେଇଥିଲେ। ଏଥିସହ ରେଜଲ୍ଟ ପ୍ରକାଶ କରିବା ପ୍ରକ୍ରିୟାରେ ସାମିଲ ଥିବା ସମସ୍ତ ସଦସ୍ୟଙ୍କୁ ଶୁଭେଚ୍ଛା
ଜଣାଇଛନ୍ତି। ସୂଚନାଯୋଗ୍ୟ, ଚଳିତବର୍ଷ କରୋନା ଯୋଗୁ ଅନେକ ପରୀକ୍ଷା ବାତିଲ କରାଯାଇଥିଲା। ଛାତ୍ରୀଛାତ୍ରମାନେ ସବୁଠୁ ଭଲ କରିଥିବା ବିଷୟର ନମ୍ବରକୁ ଆଧାର କରି ବାକି ଥିବା ବିଷୟଗୁଡ଼ିକରେ ମୂଲ୍ୟାୟନ କରାଯାଇଛି। ତେବେ ଏହି ରେଜଲ୍ଟରେ ଯେଉଁ ଛାତ୍ରୀଛାତ୍ରମାନେ ଖୁସି ନ ଥିବେ କିମ୍ବା କେହି ନିଜ ନମ୍ବର ବଢ଼ାଇବାକୁ ଚାହୁଁଥିବେ, ସେମାନଙ୍କ ପାଇଁ ଆଉ ଏକ ସୁଯୋଗ ରହିଛି। ଜୁଲାଇ ୧ରୁ ୧୫ ମଧ୍ୟରେ ଯେଉଁ ବିଷୟବସ୍ତୁଗୁଡ଼ିକର ପରୀକ୍ଷା ହୋଇଥାଆନ୍ତା, ସେହି ବିଷୟରେ ଛାତ୍ରୀଛାତ୍ରମାନେ ଚାହିଁଲେ ପରୀକ୍ଷା ଦେଇପାରିବେ। ତେବେ ଯେଉଁମାନେ ଏହି ବିଷୟରେ ଇଚ୍ଛାଧୀନ ଭାବେ ପରୀକ୍ଷା ଦେବେ ସେମାନଙ୍କ ପରୀକ୍ଷା ଫଳକୁ ଫାଇନାଲ ବୋଲି ଧରାଯିବ। ସେପଟେ ନୂଆ ଆଧାରରେ ମୂଲ୍ୟାଙ୍କନ ହୋଇଥିବାରୁ ୪୦୦ଛାତ୍ରୀଛାତ୍ରଙ୍କ ମୂଲ୍ୟାଙ୍କନ ହୋଇପାରି ନାହିଁ। ତେବେ ସେମାନଙ୍କ ରେଜଲ୍ଟ ପରେ ପ୍ରକାଶ ପାଇବ ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି।
