ଭୁବନେଶ୍ୱର, ୨୮ା୧୧(ସରୋଜ ଜେନା): ଏଏଫ୍ସି କପ୍ରେ ତୃତୀୟ ବିଜୟ ହାସଲ କରିଛି ଓଡ଼ିଶା ଏଫ୍ସି (ଓଏଫ୍ସି)। ସୋମବାର କୋଲକାତାର ସଲ୍ଟ ଲେକ୍ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ଆଇଏସ୍ଏଲ୍ ଚାମ୍ପିୟନ ମୋହନବାଗାନ୍ ସୁପରଜାଏଣ୍ଟକୁ ୫-୨ ଗୋଲରେ ପରାସ୍ତ କରିଛି ଓଏଫ୍ସି। ଓଡ଼ିଶା ପକ୍ଷରୁ ରୟ କ୍ରିଷ୍ଣା (୨୯), ଡିଏଗୋ ମରିସିଓ (୩୨), ସାଇ ଗୋଡାର୍ଡ (୪୧), ଅନିକେତ ଯାଦବ (୯୦+୨) ଓ ଆଇଜାକ୍ ଭାନ୍ଲାଲରରୁଆଟ୍ଫେଲା (୯୦+୫) ମିନିଟରେ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ଅନ୍ୟ ପକ୍ଷରେ ମୋହନ ବାଗାନ ପକ୍ଷରୁ ହ୍ୟୁଗୋ ବ୍ୟୁମୋସ୍ (୧୭) ଓ କିୟାନ୍ ନାସିରି (୬୩) ଗୋଟିଏ ଲେଖାଏ ଗୋଲ ଦେଇଥିଲେ। ଏହି ବିଜୟ ସହିତ ଏଏଫ୍ସି କପ୍ରେ ତୃତୀୟ ବିଜୟ ସହିତ ଗ୍ରୁପ୍ ଡିରେ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି ଓଏଫ୍ସି। ସେହିପରି ଦଳ ମୋହନ ବାଗାନ ବିପକ୍ଷରେ ଏହାର ପ୍ରଥମ ବିଜୟ ହାସଲ କରିଛି। ଉଭୟ ଦଳ ନବମ ଥର ପାଇଁ ମୁହାଁମୁହିଁ ହୋଇଥିବା ବେଳେ ପୂର୍ବରୁ ମୋହନ ବାଗାନ ୫ ଥର ବିଜୟୀ ହୋଇଥିଲା ଓ ୩ଟି ମ୍ୟାଚ୍ ଡ୍ରରେ ଶେଷ ହୋଇଥିଲା।
ଶିମିଳିପାଳ ବାଘଙ୍କ ପାଇଁ ନିର୍ମିତ ଗୋଲ୍ଡେନ୍ ପର୍ପଲ ଜର୍ସିରେ ନଜର ଆସିଥିବା ଓଏଫ୍ସି ମ୍ୟାଚ୍ ଆରମ୍ଭରୁ ଚମତ୍କାର ପ୍ରଦର୍ଶନ କରିଥିଲା। ପ୍ରଥମ ମିନିଟରୁ ଉଭୟ ଦଳ ଆକ୍ରମଣାତ୍ମକ ଫୁଟ୍ବଲ୍ ଖେଳିଥିଲେ। ଘରୋଇ ଦର୍ଶକଙ୍କ ସମ୍ମୁଖରେ ମୋହନବାଗାନ ମ୍ୟାଚ୍ର ୧୭ ତମ ମିନିଟରେ ପ୍ରଥମ ଗୋଲ ସ୍କୋର କରିଥିଲା। ଓଏଫ୍ସି ହାଫ୍ରୁ ବଲ୍ ଛଡାଇବା ପରେ ଲିଷ୍ଟନ କଲେକୋ ଲମ୍ବା ପାଶ୍ ଜରିଆରେ ବଲ୍ ଆଶିଷ ରାୟଙ୍କୁ ଦେଇଥିଲେ। ଆଶିଷଙ୍କ ଡାଏଗୋନାଲ ବଲ୍କୁ ଗୋଲରେ ପରିଣତ କରି ହ୍ୟୁଗୋ ବ୍ୟୁମୋସ୍ ଦଳକୁ ୧-୦ରେ ଆଗୁଆ କରିଥିଲେ। ୨୪ ତମ ମିନିଟରେ ରୟ କ୍ରିଷ୍ଣା ଓ ଡିଏଗୋ ମରିସିଓ ଏକ ସ୍କୋରିଂ ସୁଯୋଗ ସୃଷ୍ଟି କରିଥିଲେ ମଧ୍ୟ ବିଶାଲ କେଥ୍ ଏହାକୁ ରୋକି ଦେଇଥିଲେ। ୨୯ ତମ ମିନିଟରେ ରୟ କ୍ରିଷ୍ଣା ଏକ ଗୋଲ ଦେଇ ମ୍ୟାଚକୁ ୧-୧ ସ୍ଥିତିକୁ ଆଣିଥିଲେ। ଜେରୀଙ୍କ ପାଶକୁ ଏକ ଡାହାଣ ପାଦ କିକ୍ ଜରିଆରେ ସ୍କୋର କରିଥିଲେ ରୟ କ୍ରିଷ୍ଣା। ଏହାର ୩ ମିନିଟ ପରେ ଓଏଫ୍ସିର ଗୋଲ ମେସିନ୍ ଡିଏଗୋ ମରିସିଓ ଏକ ଗୋଲ ଦେଇ ଦଳକୁ ୨-୧ରେ ଆଗୁଆ କରି ଦେଇଥିଲେ। ଜାହୋହୋଙ୍କ ଫ୍ରି କିକ୍ ରୟ କ୍ରିଷ୍ଣାଙ୍କ ନିକଟକୁ ଯାଇଥିଲା। ରୟଙ୍କ କ୍ରଶ୍କୁ ଗୋଲରେ ପରିଣତ କରିଥିଲେ ମରିସିଓ। ମ୍ୟାଚ୍ର ୪୧ ତମ ମିନିଟରେ ସାଇ ଗୋଡାର୍ଡ ଦଳ ପକ୍ଷରୁ ତୃତୀୟ ଗୋଲ ସ୍କୋର କରିଥିଲେ। ଗ୍ଲାନ୍ ମାର୍ଟିନ୍ଙ୍କ ସାମନ୍ୟ ତ୍ରୁଟିର ଫାଇଦା ଉଠାଇ ଗୋଡାର୍ଡ ସ୍କୋର କରିଥିଲେ। ପ୍ରଥମ ହାଫ୍ରେ ଓଏଫ୍ସି ୩-୧ରେ ଆଗୁଆ ରହିଥିଲା।
ଦ୍ୱିତୀୟ ହାଫ୍ରେ ଘରୋଇ ଦଳ ପ୍ରତି ଆକ୍ରମଣ କରିଥିଲା। ୫୩ ମିନିଟ୍ରେ ଦଳ ଏକ ସ୍କୋରିଂ ପ୍ରୟାସ କରିଥିଲା। ତେବେ ଅମରିନ୍ଦର ସିଂ ଏହାକୁ ରୋକି ଦେଇଥିଲେ। ୬୩ ତମ ମିନିଟରେ କିୟାନ୍ ନାସିର ଏକ ହେଡର ଜରିଆରେ ଦ୍ୱିତୀୟ ଗୋଲ ସ୍କୋର କରିଥିଲେ। ୮୦ ତମ ମିନିଟରେ ଆଶିଷ ରାୟଙ୍କ ଏକ ପାଶ କିୟାନ୍ଙ୍କ ଠାରୁ ଦୂରରେ ରହି ଯାଇଥିଲା। ଇଞ୍ଜୁରୀ ଟାଇମ୍ରେ ଓଡ଼ିଶା ଖେଳାଳି ଆଉ ଦୁଇଟି ଗୋଲ ସ୍କୋର କରିଥିଲେ। ୯୦+୨ ମିନିଟରେ ମିଳିଥିବା ଫ୍ରି କିକ୍କୁ ଡାହାଣ କର୍ନରରୁ ପାଶ୍ କରିଥିଲେ ରୟ କ୍ରିଷ୍ଣା। ଏହାକୁ ଗୋଲରେ ପରିଣତ କରିଥିଲେ ଅନିକେତ ଯାଦବ। ଓଏଫ୍ସି ପାଇଁ ଏହା ଅନିକେତଙ୍କ ପ୍ରଥମ ଗୋଲ୍। ଏହାର ୩ ମିନିଟ୍ ପରେ ଆଉ ଏକ ଗୋଲ ଦେଇଥିଲେ ଆଇଜାକ୍ ଭାନ୍ଲାଲରରୁଆଟ୍ଫେଲା। ମୋହନ୍ ବାଗାନ୍ ଗୋଲକିପର ବିଶାଲ୍ କେଥ୍ ପୋଷ୍ଟ ଛାଡି ଆଗକୁ ଚାଲି ଆସିଥିବା ବେଳେ ତାଙ୍କ ମୁଣ୍ଡ ଉପରେ ବଲ୍କୁ ପାଶ୍ କରିଥିଲେ ଆଇଜାକ୍। ଡିସେମ୍ବର ୧୧ ତାରିଖରେ ଓଏଫ୍ସି ବସୁନ୍ଧରା କିଙ୍ଗ୍ସ ବିପକ୍ଷରେ ଏହାର ଅନ୍ତିମ ମ୍ୟାଚ୍ ଖେଳିବ।
