ଆନନ୍ଦପୁର,୧ା୫(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଆନନ୍ଦପୁର ଥାନା ଅନ୍ତର୍ଗତ ପୁଟୁଝରି ଗାଁର ବିଏସ୍ଏଫ୍ ଯବାନ ଅଜୟ କୁମାର ସୋରେନ (୩୭) ପଶ୍ଚିମବଙ୍ଗ ବାଙ୍କୁଡ଼ାରେ ନିର୍ବାଚନ ଡ୍ୟୁଟି କରୁଥିବା ସମୟରେ ବ୍ରେନଷ୍ଟ୍ରୋକ୍ରେ ଗୁରୁବାର ମୃତ୍ୟୁବରଣ କରିଛନ୍ତି। ଶୁକ୍ରବାର ବିଏସ୍ଏଫ୍ର ଏକ ଟିମ୍ ମୃତ ଅଜୟଙ୍କ ମୃତଦେହକୁ ସଡ଼କ ପଥରେ ଆଣି ପୁଟୁଝରି ଗାଁରେ ରାଷ୍ଟ୍ରୀୟ ମର୍ଯ୍ୟାଦା ସହ ବିଏସ୍ଏଫ୍ ବାଟାଲିୟମର ସ୍ପେଶାଲ ଗାର୍ଡ ଅଫ୍ ଅନରରେ ଗାର୍ଡ କମାଣ୍ଡର ନରେଶ କୁମାର ଓ୍ବାର୍ଡ ଅଫ୍ କମାଣ୍ଡରେ ସଲାମୀ ଦିଆଯାଇଛି। ପାର୍ଟି କମାଣ୍ଡର ଏ ସାଇ ନାରାୟଣ ମାର୍ଥାଙ୍କ ଅଧ୍ୟକ୍ଷତାରେ ତାଙ୍କ ପରିବାରବର୍ଗଙ୍କୁ ନ୍ୟାଶନାଲ ଫ୍ଲାଗ ହସ୍ତାନ୍ତର କରାଗଲା ପରେ ୧୦/୩୦ ସମୟରେ ତାଙ୍କ ମର ଶରୀରକୁ ନିଜ ବାସ ଭାବନରେ ସତ୍କାର କରାଯାଇଛି। ଦେଶରକ୍ଷାରେ ନିୟୋଜିତ ଥିବା ଅଜୟଙ୍କ ମୃତ୍ୟୁରେ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ହଜାର ହଜାର ଲୋକ ତାଙ୍କ ଶେଷଦର୍ଶନ କରିଥିଲେ।