ପାଇକମାଳ,୨।୫(ବଡ ଶତପଥୀ) : ସୁପ୍ରିମକୋର୍ଟରେ ଜାତୀୟ ଆଇନଗତ ସେବା ପ୍ରାଧିକରଣ ଆନୁକୁଲ୍ୟରେ କ୍ରାନ୍ତିଜ୍ୟୋତି ସାବିତ୍ରୀବାଇ ଫୁଲେଙ୍କ ଜନ୍ମବାର୍ଷିକୀ ପାଳନ ଅବସରରେ ଜାତୀୟ ରିଲ ଏବଂ କ୍ଷୁଦ୍ର ଚଳଚ୍ଚିତ୍ର ପ୍ରତିଯୋଗିତାରେ ବରଗଡ଼ ଜିଲା ପାଇକମାଳ ବ୍ଳକ ଜାମସେଠ ଗାଁର ଝିଅ ଜାଗୃତି ମାଝୀ ସର୍ବଭାରତୀୟସ୍ତରରେ ରନର୍ସ(ଦିତୀୟ) ସ୍ଥାନ ହାସଲ କରି ପୁରସ୍କୃତ ହୋଇଛନ୍ତି। ଏହି ଅବସରରେ ଭୁବନେଶ୍ବର ଉତ୍କଳ ବିଶ୍ବବିଦ୍ୟାଳୟରେ ଆଇନ ପାଠ ପଢୁଥିବା ଜାଗୃତିଙ୍କ ସହିତ ସାନିଆ ଖାଁ, ଆଦ୍ୟା ଦେବପ୍ରଜ୍ଞା ପଟ୍ଟନାୟକ ଓ ସ୍ମୃତିଶିଖା ସାହୁଙ୍କୁ ମଧ୍ୟ ପୁରସ୍କୃତ କରାଯାଇଥିଲା।
କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ସୁପ୍ରିମକୋର୍ଟ ମୁଖ୍ୟ ବିଚାରପତି ସଞ୍ଜୀବ ଖାନ୍ନା ଓ ସମ୍ମାନିତ ଅତିଥି ଭାବରେ ସୁପ୍ରିମକୋର୍ଟ ବିଚାରପତି ତଥା ନାଲସା କାର୍ଯ୍ୟନିର୍ବାହୀ ଅଧ୍ୟକ୍ଷ ବି.ଆର୍ ଗଭାଇ (ଚୟନୀତ) ସୁପ୍ରିମ କୋର୍ଟର ପରବର୍ତ୍ତୀ ମୁଖ୍ୟ ବିଚାରପତି ତଥା ଏସ୍ସିଏଲ୍ଏସ୍ସି ଅଧ୍ୟକ୍ଷ ସୂର୍ଯ୍ୟକାନ୍ତ, ଭାରତ ସରକାରଙ୍କ ଆଟୋର୍ନୀ ଜେନେରାଲ, ଡେପୁଟି ଆଟୋର୍ନୀ ଜେନେରାଲ୍, ଲ ସେକ୍ରେଟାରୀ (ଭାରତ ସରକାର) ଓ ସୁପ୍ରିମକୋର୍ଟ ବିଚାରପତି ତଥା ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।
ସୂଚନାଯୋଗ୍ୟ, ଜାଗୃତି ପାଇକମାଳ ବ୍ଳକ ଜାମସେଠ ଗାଁର ପ୍ରଦୀପ ମାଝୀ ଓ ବାସନ୍ତୀ ମାଝୀଙ୍କ ଝିଅ ଅଟନ୍ତି। ସେ ପିଲାଦିନରୁ ଜଣେ ମେଧାବୀ ଛାତ୍ରୀ ଅଟନ୍ତି। ଭବାନୀପାଟଣା ପ୍ରଗତି ବିଦ୍ୟାଳୟରେ ମାଟ୍ରିକ ପାସ କରିବା ପରେ ବରଗଡ଼ ବିକାଶ କଲେଜରେ ଯୁକ୍ତ ଦୁଇ ପାସ କରିଥିଲେ। ଏହାପରେ ଭୁବନେଶ୍ୱର ଉତ୍କଳ ବିଶ୍ବବିଦ୍ୟାଳୟରେ ଇନଟ୍ରିଗେଟେଡ୍ ଲ’ ପାଠ ପଢୁଛନ୍ତି। ତାଙ୍କ ବାପା ଇଣ୍ଡିଆନ ବ୍ୟାଙ୍କରେ ସିନିୟର୍ ମ୍ୟାନେଜର ଥିବା ବେଳେ ମା ବାସନ୍ତୀ ଗୃହିଣୀ ଅଟନ୍ତି। ଜାଗୃତି ମାଝୀଙ୍କ ସଫଳତାକୁ ନେଇ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି।
