ଭୁବନେଶ୍ୱର, ୧୬।୧(କ୍ରୀଡ଼ା ପ୍ରତିନିଧି)-
ଓଡ଼ିଶା କ୍ରିକେଟ ଆସୋସିଏଶନ (ଓସିଏ)ର ଭିଜନ-୨୦୨୪ ଅନ୍ତର୍ଗତ ଦିନିକିଆ ମହିଳା କ୍ରିକେଟ ଲିଗ୍ ଶୁକ୍ରବାରଠାରୁ ବିଭିନ୍ନ ଗ୍ରାଉଣ୍ଡରେ ଆରମ୍ଭ ହୋଇଛି। ପ୍ରଥମ ଦିବସରେ ଅନୁଷ୍ଠିତ ୩ ମ୍ୟାଚରେ ଓଡ଼ିଶା ଗ୍ରୀନ୍, ଓଡ଼ିଶା ୟେଲୋ ଓ ଓଡ଼ିଶା ଅରେଞ୍ଜ ବିଜୟ ହାସଲ କରିଛି।
ସ୍ଥାନୀୟ କିଟ୍ ଷ୍ଟାଡିୟମରେ ଅନୁଷ୍ଠିତ ଉଦ୍ଘାଟନୀ ମ୍ୟାଚରେ ଗ୍ରୀନ୍ ୬ ଉଇକେଟରେ ଓଡ଼ିଶା ରେଡ୍କୁ ପରାସ୍ତ କରିଛି। ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ରେଡ୍ ଦଳ ନିର୍ଦ୍ଧାରିତ ୫୦ ଓଭରରେ ୯ ଉଇକେଟ ହରାଇ ୧୭୨ ରନ କରିଥିଲା। ଦଳ ପକ୍ଷରୁ ଅଧିନାୟିକା ମାଧୁରୀ ମେହେଟା ସର୍ବାଧିକ ୫୧, ଅଦ୍ୱିତି ଦେଓ ୪୩ ଓ ଶିଳ୍ପା ସ୍ବାଇଁ ୨୭ ରନ କରିଥିଲେ। ବିପକ୍ଷ ଦଳର କଳ୍ପନା ନାୟକ ୧୦ ଓଭରରେ ୨ ମେଡେନ ନେବାସହ ମାତ୍ର ୧୬ ରନ ଦେଇ ୪ଟି ଏବଂ ଡି.ରେଡ୍ଡୀ ୨ଟି ଉଇକେଟ ନେଇଥିଲେ। ୧୭୩ ରନ ବିଜୟ ଲକ୍ଷ୍ୟକୁ ଓଡ଼ିଶା ଗ୍ରୀନ୍ ୪୩.୧ ଓଭରରେ ୪ ଉଇକେଟ ହରାଇ ହାସଲ କରିନେଇଥିଲା। ଅଧିନାୟିକା ପ୍ରଜ୍ଞା ପାରମିତା ମହାନ୍ତି ୬୧ ରନ କରି ଅପରାଜିତ ରହି ଦଳକୁ ଜିତାଇଥିଲେ। ପରାଜିତ ଦଳର ସୁଶ୍ରୀ ସିଂ ଓ ବନଲତା ମଲିକ ଗୋଟିଏ ଲେଖାଏ ଉଇକେଟ ନେଇଥିଲେ। ମୂଳାପଡ଼ିଆରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ ୟେଲୋ ୧୩ ରନରେ ଓଡ଼ିଶା ଭାଓଲେଟକୁ ହରାଇଛି। ପ୍ରଥମେ ବ୍ୟାଟିଂ କରିଥିବା ୟେଲୋ ୫୦ ଓଭରରେ ୮ ଉଇକେଟ ହରାଇ ୧୫୭ ରନ କରିଥିଲା। ଅର୍ଦ୍ଧଶତକ ହାସଲକାରୀ ଅଞ୍ଜଳି ସିଂ ସର୍ବାଧିକ ୫୧ ରନ କରିଥିବାବେଳେ ପ୍ରତିପକ୍ଷ ଦଳର ସୁଶ୍ରୀ ଦିବ୍ୟଦର୍ଶିନୀ ଓ ପ୍ରୀତି ପ୍ରିୟଦର୍ଶିନୀ ୨ଟି ଲେଖାଏ ଉଇକେଟ ନେଇଥିଲେ। ଜବାବରେ ଭାଓଲେଟ ୫୦ ଓଭରରେ ୯ ଉଇକେଟ ହରାଇ ୧୪୪ ରନ କରି ପାରିଥିଲା। ସଙ୍ଗୀତା ଖାଡିଆ ସର୍ବାଧିକ ୫୫ ରନ କରିଥିଲେ। ବିଜୟୀ ଦଳର ପ୍ରିୟଙ୍କା ସାହୁ ସର୍ବାଧିକ ୨ଟି ଉଇକେଟ ନେଇଥିଲେ। ବିକାଶ କ୍ରିକେଟ ପଡ଼ିଆରେ ଅନୁଷ୍ଠିତ ମ୍ୟାଚରେ ଅରେଞ୍ଜ୍ ୬ ଉଇକେଟରେ ପର୍ପଲକୁ ପରାସ୍ତ କରିଛି। ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ପର୍ପଲ ୫୦ ଓଭରରେ ୫ ଉଇକେଟ ହରାଇ ୨୧୫ ରନ କରିଥିଲା। ଅଧିନାୟିକା ମଧୁସ୍ମିତା ବେହେରା (୧୨୫) ଶତକ ହାସଲ କରିଥିଲେ। ବିପକ୍ଷ ବୋଲର ଭବାନୀ ଧଡ଼ା ଓ ରାମେଶ୍ୱରୀ ନାଏକ ୨ଟି ଲେଖାଏ ଉଇକେଟ ନେଇଥିଲେ। ଜବାବରେ ଅରେଞ୍ଜ୍ ୫୦ ଓଭରରେ ୪ ଉଇକେଟ ହରାଇ ୨୧୮ ରନ ସଂଗ୍ରହ କରି ନେଇଥିଲା। ସରିତା ମେହେର ୯୨ ଓ କୁସୁମ ତିରିୟା ୪୯ ରନକରି ଦଳକୁ ଜିତାଇଥିଲେ। ବିପକ୍ଷ ଦଳର ଲକ୍ଷ୍ମୀପ୍ରିୟା ନାଏକ ସର୍ବାଧିକ ୨ଟି ଉଇକେଟ ନେଇଥିଲେ।
