ଭୁବନେଶ୍ୱର,୨୦।୧୨(ସ୍ପୋଟର୍ସ ବ୍ୟୁରୋ): ଭୁବନେଶ୍ୱର ଓ କଟକର ବିଭିନ୍ନ ଗ୍ରାଉଣ୍ଡରେ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଆନୁକୂଲ୍ୟରେ ଚାଲିଥିବା ଆନ୍ତଃ ଜିଲା ସିନିୟର ପୁରୁଷ ଟି ୨୦ କ୍ରିକେଟ ଲିଗ୍ରେ ଶନିବାର ୬ଟି ମ୍ୟାଚ ଅନୁଷ୍ଠିତ ହୋଇଛି। ନବରଙ୍ଗପୁର, ପାରାଦୀପ, ଢେଙ୍କାନାଳ, କଟକ-ବି, କେନ୍ଦ୍ରାପଡା ବିଜୟୀ ହୋଇଛନ୍ତି। କଟକ- ବି ଦୁଇଟି ମ୍ୟାଚ ଖେଳି ବିଜୟୀ ହୋଇଛି ଓ ପ୍ରଦର୍ଶନ ଭିତ୍ତିରେ ସୁପରଲିଗ୍ ପାଇଁ ଯୋଗ୍ୟତା ହାସଲ କରିଛି। ଏଥିସହିତ ସୁପର ଲିଗ୍ର ରୂପରେଖ ସ୍ପଷ୍ଟ ହୋଇଛି ଓ ଏହାର ପୁନଃ ନିର୍ଦ୍ଧାରିତ କାର୍ଯ୍ୟସୂଚୀ ପ୍ରକାଶିତ ହୋଇଛି।
ବାରବାଟୀ ଷ୍ଟାଡିୟମରେ ଖେଳାଯାଇଥିବା ପ୍ରଥମ ମ୍ୟାଚର ନବରଙ୍ଗପୁର ୪୨ ରନରେ ଅନୁଗୋଳକୁ ପରାସ୍ତ କରିଛି। ଟସ୍ ଜିତି ନବରଙ୍ଗପୁର ପ୍ରଥମେ ବ୍ୟାଟିଂ କରି ୩ ଉଇକେଟ ହରାଇ ୨୨୧ ରନ ସଂଗ୍ରହ କରିଥିଲା। ଦଳ ତରଫରୁ ସୁକେଶ କେ. ହୀରା ୧୩୦ ରନର ଶତକୀୟ ପାଳି ଖେଳିଥିଲେ। ସେହିପରି ପୂର୍ଣ୍ଣଚନ୍ଦ୍ର ମାଝି ୬୪ ରନ କରିଥିଲେ। ଜବାବରେ ଅନୁଗୋଳ ୬ ଉଇକେଟ ହରାଇ ୧୭୯ ରନରେ ସୀମିତ ରହି ପରାସ୍ତ ହୋଇଥିଲା।
ବାରବାଟୀରେ ଖେଳାଯାଇଥିବା ଦ୍ୱିତୀୟ ମ୍ୟାଚରେ ପାରାଦୀପ ୭ ଉଇକେଟରେ ଦେବଗଡ଼କୁ ପରାସ୍ତ କରିଛି। ଟସ୍ ହାରି ପ୍ରଥମେ ବ୍ୟାଟିଂ କରି ଦେବଗଡ଼ ୧୮.୫ ଓଭରରେ ୯୪ ରନକରି ଅଲଆଉଟ ହୋଇଥିଲା। ଜବାବରେ ପାରଦୀପ ୩ ଉଇକେଟ ହରାଇ ୯୫ ରନକରି ବିଜୟୀ ହୋଇଥିଲା। ଏହି ମ୍ୟାଚରେ ଅତିଥି ଭାବେ ଓସିଏ ସଦସ୍ୟ ଉପେନ୍ଦ୍ର କୁମାର ବାରିକ ଉପସ୍ଥିତ ଥିଲେ।
ସେହିପରି ରେଭନ୍ସା ଗ୍ରାଉଣ୍ଡରେ ଢେଙ୍କାନାଳ ୭ ଉଇକେଟରେ ପାରାଦୀପକୁ ପରାସ୍ତ କରିଥିଲା। ଟସ୍ଜିତି ପ୍ରଥମେ ବ୍ୟାଟିଂ କରି ପାରାଦୀପ ୯ ଉଇକେଟ ହରାଇ ୧୦୧ ରନ ସଂଗ୍ରହ କରିଥିଲା। ଜବାବରେ ୧୨.୫ ଓଭରରେ ଢେଙ୍କାନାଳ ୩ ଉଇକେଟ ହରାଇ ୧୦୨ ରନକରି ବିଜୟୀ ହୋଇଥିଲା। ଢେଙ୍କାନାଳ ତରଫରୁ ଆରିଫ ବେଗ୍ ୫୭ ରନ କରିଥିଲେ।
ରେଭେନ୍ସା ଗ୍ରାଉଣ୍ଡରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ କଟକ- ବି ୨୫ ରନରେ ଢେଙ୍କାନାଳକୁ ପରାସ୍ତ କରି ସୁପରଲିଗ୍ ପର୍ଯ୍ୟାୟକୁ ଉଠିଛି। ଟସ୍ ଜିତି ପ୍ରଥମେ ବ୍ୟାଟିଂ କରି କଟକ ୩ ଉଇକେଟ ହରାଇ ୧୬୦ ରନ ସଂଗ୍ରହ କରିଥିଲା। ଦଳ ତରଫରୁ ଅବିନାଶ ନାୟକ ୪୬, ଗିରିଜା ଶଙ୍କର ବାରିକ ଅପରାଜିତ ୩୪ ରନ ସଂଗ୍ରହ କରିଥିଲେ। ଜବାବରେ ଢେଙ୍କାନାଳ ୭ ଉଇକେଟ ହରାଇ ୧୩୫ ରନରେ ସୀମିତ ରହି ପରାସ୍ତ ହୋଇଥିଲା। ଏହି ମ୍ୟାଚ୍ରେ ଓସିଏ ସଦସ୍ୟ ଉପେନ୍ଦ୍ର କୁମାର ଦାଶ ଅତିଥି ଭାବେ ଉପସ୍ଥିତ ଥିଲେ।
ସେହିପରି ବିଡ଼ାନାସୀ ଗ୍ରାଉଣ୍ଡରେ କଟକ- ବି ତା’ର ଦ୍ୱିତୀୟ ମ୍ୟାଚରେ ୯ ଉଇକେଟରେ କେନ୍ଦ୍ରାପଡ଼ାକୁ ପରାସ୍ତ କରିଛି। ଟସ୍ ହାରି କେନ୍ଦ୍ରାପଡ଼ା ପ୍ରଥମେ ବ୍ୟାଟିଂ କରି ୧୭ ଓଭରରେ ୮୮ ରନକରି ଅଲଆଉଟ ହୋଇଥିଲା। ଜବାବରେ କଟକ ୧୧.୩ ଓଭରରେ ୯୨ ରନକରି ବିଜୟୀ ହୋଇଥିଲା। କଟକ ତରଫରୁ ଅବିନାଶ ନାୟକ ଅପରାଜିତ ୫୭ ରନର ଅର୍ଦ୍ଧଶତକୀୟ ପାଳି ଖେଳିଥିଲେ।
ବିଡାନାସୀ ଗ୍ରାଉଣ୍ଡରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ କେନ୍ଦ୍ରାପଡା ୭ ଉଇକେଟରେ ଅନୁଗୋଳକୁ ହରାଇଛି। ଟସ୍ଜିତି ଅନୁଗୋଳ ପ୍ରଥମେ ବ୍ୟାଟିଂ କରି ୭ ଉଇକେଟ ହରାଇ ୧୪୩ ରନ କରିଥିଲା। ଜବାବରେ କେନ୍ଦ୍ରାପଡ଼ା ୧୯.୧ ଓଭରରେ ୩ ଉଇକେଟ ହରାଇ ୧୪୫ ରନକରି ବିଜୟୀ ହୋଇଥିଲା। ଏହି ମ୍ୟାଚରେ ଦେବାଶିଷ ପ୍ରଧାନ ମୁଖ୍ୟଅତିଥି ଭାବେ ଯୋଗ ଦେଇଥିଲେ।
