ନୂଆଦିଲ୍ଲୀ,୧୧।୧୧: ବିୟୁଟି ଏବଂ ପର୍ସନାଲ କେୟାର ପ୍ଲାଟ୍ଫର୍ମ ନାଇକାର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ (ସିଇଓ) ଫାଲ୍ଗୁନୀ ନାୟାର(୫୮) ଏବେ ବେଶ୍ ଚର୍ଚ୍ଚାରେ ରହିଛନ୍ତି। ସେ ଦେଶର ସବୁଠାରୁ ଧନୀ ସେଲ୍ଫ ମେଡ୍ ମହିଳା ବିଲିୟନେୟାର ଭାବେ ବିବେଚିତ ହୋଇଛନ୍ତି। ୫୦ ବର୍ଷ ବୟସରେ ସେ ନିଜର ସ୍ବପ୍ନକୁ ପୂରା କରିବା ପାଇଁ ଚାକିରି ଛାଡ଼ି ଦେଇଥିଲେ। ତାଙ୍କ କ୍ୟାରିୟରର ଶୀର୍ଷରେ ଥିବା ବେଳେ କୋଟାକ ମହିନ୍ଦ୍ରା କ୍ୟାପିଟାଲ ଭଳି ଇନ୍ଭେଷ୍ଟମେଣ୍ଟ ବ୍ୟାଙ୍କିଙ୍ଗ୍ କ୍ଷେତ୍ରକୁ ଛାଡି ନିଜର ବିୟୁଟି କମ୍ପାନୀ ସ୍ଥାପନ କରିଥିଲେ। ଏହି କମ୍ପାନୀ ଶେୟାର ବଜାରରେ ପ୍ରବେଶ କରିବା ଦିନଠାରୁ ହିଁ ମାଇଲଖୁଣ୍ଟ ଛୁଇଁ ଚାଲିଛି। କମ୍ପାନୀର ବଜାର ପୁଞ୍ଜୀକରଣ ୧ ଲକ୍ଷ କୋଟି ଟଙ୍କା ଟପିଛି।
ଜଣେ ମହିଳାଙ୍କ ନେତୃତ୍ୱାଧୀନ ଦେଶର ଏକ ପ୍ରମୁଖ ୟୁନିକର୍ନ ‘ନାଇକା’ର ମୂଳ କମ୍ପାନୀ ଏଫ୍ଏସ୍ଏନ୍ ଇ-କମର୍ସ ଭେଞ୍ଚର ଷ୍ଟକ୍ ବଜାରରେ ଆରମ୍ଭ ଦିନଠାରୁ ହିଁ ଏହାର ଷ୍ଟକ୍ ବମ୍ପର କାରବାର କରିଛି। ବୁଧବାର ନାଇକାର ଶେୟାର ୯୬% ଊର୍ଦ୍ଧ୍ୱରେ ବନ୍ଦ ହୋଇଛି, ଫଳରେ ନାୟାରଙ୍କ ସମ୍ପତ୍ତି ୬.୫ ବିଲିୟନ ଡଲାର ଛୁଇଁଛି। ନାୟାର ଦେଶର ଅନ୍ୟ ୬ ମହିଳା ବିଲିୟନେୟାରଙ୍କ ତାଲିକାରେ ଯୋଡ଼ି ହୋଇଛନ୍ତି। ନାୟାରଙ୍କ ବାଦ୍ ବାୟୋକନର ଅଧ୍ୟକ୍ଷା କିରନ ମଜୁମଦାର ସ ଏବଂ ବାୟଜୁସ୍ର ଦିବ୍ୟା ଗୋକୁଲନାଥ ମଧ୍ୟ ସେଲ୍ଫ ମେଡ୍ ବିଲିୟନେୟାର ଭାବେ ଗଣାହୁଅନ୍ତି। ନାୟାର ଏବଂ ତାଙ୍କ ପରିବାର ଏବେ ନାୟିକାର ୫୧% ଅଂଶଧନ ହାସଲ କରିଛନ୍ତି। ଆଇପିଓ ପରେ ମଧ୍ୟ ଏହି ଅଂଶଧନ ସେମାନଙ୍କ ନିକଟରେ ରହିଛି। ତାଙ୍କ ପରିବାରରେ ସ୍ବାମୀ ଏବଂ ୨ ପିଲା ରହିଛନ୍ତି।
ସେ ଆଇଆଇଏମ୍ ଅହମ୍ମଦାବାଦକୁ ଶିକ୍ଷା ଗ୍ରହଣ କରିଥିବା ବେଳେ କୋଟାକ ମହିନ୍ଦ୍ରା କ୍ୟାପିଟାଲରେ ୧୮ ବର୍ଷ କାର୍ଯ୍ୟ କରିଛନ୍ତି। ୨୦୧୨ରେ ୫୦ ବର୍ଷ ବୟସରେ ତାଙ୍କ ସ୍ବପ୍ନ ପୂରଣ ଲାଗି ସେ ଚାକିରି ଛାଡିଥିଲେ। ସେହି ସମୟରେ ତାଙ୍କ ପିଲାମାନେ କଲେଜ ପଢ଼ିବା ଲାଗି ଆମେରିକା ଯାଇଥିଲେ। ଅନ୍ଲାଇନରେ ବିୟୁଟି ଏବଂ ସ୍କିନ୍ କେୟାର ପ୍ରଡକ୍ଟ ଉପଲବ୍ଧ କରାଇବା ଲାଗି ସେ ନାଇକା ସ୍ଥାପନ କରିଥିଲେ। ୨୦୧୨ରେ କମ୍ପାନୀ ବଜାରକୁ ଆସୁ ଆସୁ ନୂଆ ଟ୍ରେଣ୍ଡ ସୃଷ୍ଟି କଲା। ୨୦୧୨ ନଭେମ୍ବରରେ ଏହାର ବେଟା ଲଞ୍ଚ ହୋଇଥିବା ବେଳେ ୨୦୧୩ ଏପ୍ରିଲରେ ଏହା କମର୍ସିଆଲ ମାର୍କେଟିଂ ଆରମ୍ଭ କରିଥିଲା। ନାଇକା ଲାଭ ହାସଲ କରିଥିବା ପ୍ରଥମ ଷ୍ଟାର୍ଟଅପ୍ ଭାବେ ବିବେଚିତ ହୋଇଥାଏ। ଫାଲ୍ଗୁନୀ ନାୟାର ଦେଶର ପ୍ରମୁଖ କମ୍ପାନୀ ଯଥା- ଟାଟା ମୋଟର୍ସ, ଆଭିଭା ଲାଇଫ ଇନ୍ସ୍ୟୁରାନ୍ସ, କୋଟାକ ସିକ୍ୟୁରିଟିଜ ଲିମିଟେଡ, ଏସିସି ଲିମିଟେଡ ଏବଂ ଡାବର ଭଳି କମ୍ପାନୀଗୁଡିକର ବୋର୍ଡରେ ସଦସ୍ୟ ଭାବେ ମଧ୍ୟ କାମ କରିଛନ୍ତି। ତାଙ୍କ ସ୍ବାମୀ ସଞ୍ଜୟ ନାୟାର ଇନ୍ଭେଷ୍ଟମେଣ୍ଟ ଫାର୍ମ କେକେଆର୍ ଇଣ୍ଡିଆର ସିଇଓ ଭାବେ କାର୍ଯ୍ୟରତ। ତାଙ୍କ ପୁଅ ଅଞ୍ଚିତ କଲମ୍ବିଆ ବିଶ୍ୱବିଦ୍ୟାଳୟର ସ୍ନାତକ ପରେ ବିୟୁଟି ଇ-କମର୍ସ ବିଜ୍ନେସ ଏବଂ ଝିଅ ଅଦ୍ୱିତା ହାର୍ଭାର୍ଡ ବିଜ୍ନେସ ସ୍କୁଲରୁ ଏମ୍ବିଏ ପରେ କମ୍ପାନୀର ଫ୍ୟାଶନ ଭର୍ଟିକାଲ ଦାୟିତ୍ୱରେ ଅଛନ୍ତି।
