ଲଣ୍ଡନ, ୧୦ା୨: ନ୍ୟୁକ୍ଲିୟର ଫ୍ୟୁଜନ ଯୋଗୁ ସୃଷ୍ଟ ଶକ୍ତିକୁ ଗ୍ରୀନ ଏନର୍ଜୀ ଉତ୍ସ ଭାବେ ବ୍ୟବହାର ଦିଗରେ ବୈଜ୍ଞାନିକଙ୍କୁ ବଡ଼ ସଫଳତା ମିଳିଛି। ସୂର୍ଯ୍ୟକୁ ଶକ୍ତି ପ୍ରଦାନ କରୁଥିବା ପ୍ରକ୍ରିୟାର ସଫଳ ନକଲ କରାଯିବା ପରେ ବ୍ରିଟେନରେ ବିକଶିତ ଏହି ଟେକ୍ନୋଲୋଜି ଯୋଗେ ଦୁନିଆର ପ୍ରଥମ ନ୍ୟୁକ୍ଲିୟର ଫ୍ୟୁଜନ ପାଓ୍ବାର ଷ୍ଟେଶନ ବାସ୍ତବ ରୂପ ନେବାକୁ ଯାଉଛି। ଆସନ୍ତା ପିଢ଼ି ଏହି ଉତ୍ସରୁ ସବୁଜ ଶକ୍ତି ପାଇପାରିବେ ବୋଲି ୟୁରୋପୀୟ ବୈଜ୍ଞାନିକମାନେ କହିଛନ୍ତି। ଦୁଇ ଉଦ୍ଯାନ(ହାଇଡ୍ରୋଜେନ) ପରମାଣୁକୁ ପରସ୍ପର ସହ ଫ୍ୟୁଜନ କରି ସର୍ବାଧିକ ପରିମାଣର ଶକ୍ତି ଉତ୍ପନ୍ନ କରିବାରେ ବ୍ରିଟେନସ୍ଥିତ ଜଏଣ୍ଟ ୟୁରୋପିଆନ ଟୋରସ୍ (ଜେଇଟି) ଲାବରେଟୋରି ନୂଆ ରେକର୍ଡ କରିଛି। ଏହି ପରୀକ୍ଷଣରେ ମାତ୍ର ୫ ସେକେଣ୍ଡରେ ୫୯ ମେଗାଜୁଲ୍ ଶକ୍ତି ଉତ୍ପନ୍ନ ହୋଇଥିଲା। ୧୯୯୭ରେ ଅନୁରୂପ ପରୀକ୍ଷଣରେ ସୃଷ୍ଟି ହୋଇଥିବା ଏନର୍ଜୀ ତୁଳନାରେ ଏହା ଦୁଇଗୁଣ ଅଧିକ। ଏହି ଏକ୍ସପେରିମେଣ୍ଟ ଠିକ୍ ଦିଗରେ ଯାଇଥିବା ପ୍ରୋଜେକ୍ଟ ମ୍ୟାନେଜର ଟୋନି ଡୋନ କହିଛନ୍ତି। ଯଦି ୫ ସେକେଣ୍ଡ ପର୍ଯ୍ୟନ୍ତ ନ୍ୟୁକ୍ଲିୟର ଫ୍ୟୁଜନକୁ ବଜାୟ ରଖାଯାଇପାରିଛି, ତେବେ ଭବିଷ୍ୟତରେ ଆହୁରି ଉନ୍ନତ ଟେକ୍ନୋଲୋଜିରେ ତାହା ୫ ମିନିଟ୍, ୫ ଘଣ୍ଟା ଏବଂ ଏହାଠାରୁ ଅଧିକ ସମୟ ପର୍ଯ୍ୟନ୍ତ ମଧ୍ୟ ଜାରି ରଖାଯାଇପାରିବ ବୋଲି ସେ ପ୍ରକାଶ କରିଛନ୍ତି। ଏହା ଦ୍ୱାରା ଆଗାମୀ ଦିନରେ ନ୍ୟୁକ୍ଲିୟର ପାଓ୍ବାର ଷ୍ଟେଶନ ବସିପାରିବ ଏବଂ ସମଗ୍ର ବିଶ୍ୱ ପ୍ରଦୂଷଣ ମୁକ୍ତ ଶକ୍ତି ବା ଗ୍ରୀନ ଏନର୍ଜୀ ପାଇପାରିବେ।
ଲାବ୍ ମୁଖ୍ୟ ଡ. ଜୋ ମିଲ୍ନେସ୍ଙ୍କ କହିବା ଅନୁଯାୟୀ, ହାଇଡ୍ରୋଜେନ ପରମାଣୁ ଫ୍ୟୁଜନବେଳେ ମେଶିନ ମଧ୍ୟରେ ଏକ ମିନି ଷ୍ଟାର୍ ବା ଛୋଟ ତାରକା ସୃଷ୍ଟି କରାଯାଇପାରିଥିଲା। ଏଥିରୁ ୩ରୁ ୫ ସେକେଣ୍ଡ ପର୍ଯ୍ୟନ୍ତ ବହୁମାତ୍ରାରେ ଶକ୍ତି ଉତ୍ପନ୍ନ ହୋଇଛି। ଏହି ସଫଳତା ପରେ ନ୍ୟୁକ୍ଲିୟର ଶକ୍ତିକୁ ଆମେ ଦୈନନ୍ଦିନ ଜୀବନରେ ବ୍ୟବହାର କରିବା ରାସ୍ତା ଫିଟିଛିି। ଏହି ଶକ୍ତି ଦ୍ୱାରା ଗ୍ରୀନ୍ ହାଉସ ଇଫେକ୍ଟ ବା ସବୁଜ ଗୃହ ପ୍ରଭାବ କମିବ ଏବଂ ଅତି ଅଳ୍ପ ମାତ୍ରାରେ ରେଡିଓଆକ୍ଟିଭ୍ ବର୍ଜ୍ୟ ବାହାରିବ ଯାହା ଦୀର୍ଘସ୍ଥାୟୀ ନୁହେଁ ବୋଲି ସେ ପ୍ରକାଶ କରିଛନ୍ତି।
ନ୍ୟୁକ୍ଲିୟର ଫ୍ୟୁଜନ କ’ଣ
ଦୁଇ ପରମାଣୁ ପରସ୍ପର ସହ ମିଶିବା ପ୍ରକ୍ରିୟାକୁ ନ୍ୟୁକ୍ଲିୟର ଫ୍ୟୁଜନ କୁହାଯାଏ। ଏହି ପ୍ରକ୍ରିୟାରେ ବିପୁଳ ମାତ୍ରାରେ ଶକ୍ତି ଉତ୍ପନ୍ନ ହୋଇଥାଏ। ସୂର୍ଯ୍ୟ ଏବଂ ଅନ୍ୟ ତାରକା ଗୁଡ଼ିକ ନ୍ୟୁକ୍ଲିୟର ଫ୍ୟୁଜନ ଯୋଗୁ ଶକ୍ତି ପାଇଥାନ୍ତି। ସୂର୍ଯ୍ୟରେ ହାଇଡ୍ରୋଜେନ ପରମାଣୁ ପରସ୍ପର ସହ ମିଶି ହିଲିୟମରେ ପରିଣତ ହୋଇଥାନ୍ତି। ଅତ୍ୟଧିକ ମାଧ୍ୟାକର୍ଷଣ ଶକ୍ତି ଯୋଗୁ ୧୦ ମିଲିୟନ ସେଲ୍ସିୟସ୍ ତାପମାତ୍ରାରେ ସୂର୍ଯ୍ୟର କୋର୍ରେ ଏହି ପ୍ରକ୍ରିୟା ଘଟିଥାଏ। କିନ୍ତୁ ପୃଥିବୀରେ ନିମ୍ନ ଚାପରେ ୧୦୦ ମିଲିୟନ ଡିଗ୍ରୀ ସେଲ୍ସିୟସରୁ ଅଧିକ ତାପମାତ୍ରା ବଜାୟ ରଖିବା ଆବଶ୍ୟକ ପଡ଼ୁଥିବାରୁ ଏହି ପ୍ରକ୍ରିୟାରେ ଶକ୍ତି ଉତ୍ପନ୍ନ କରିବା ବେଶ୍ କଷ୍ଟକର। ଭବିଷ୍ୟତରେ ଆଣବିକ ଫ୍ୟୁଜନରୁ ସୃଷ୍ଟ ଶକ୍ତି ଦ୍ୱାରା ସୀମିତ ସମ୍ବଳର ବ୍ୟବହାର କମିବା ସହ ଶୂନ ଅଙ୍ଗାରକାମ୍ଳ ନିର୍ଗମନ ପରିବେଶ ପ୍ରଦୂଷଣକୁ ଯଥେଷ୍ଟ ରୋକିପାରିବ।
ଦୁଇ ଦଶନ୍ଧିର ପ୍ରୋଜେକ୍ଟ
ଦୀର୍ଘ ୨୦ ବର୍ଷ ହେଲା ନ୍ୟୁକ୍ଲିୟର ଫ୍ୟୁଜନ ପ୍ରୋଜେକ୍ଟ ଉପରେ କାମ ଜାରି ରହିଛି। ଏହି ଗବେଷଣାରେ ୟୁରୋ ଫ୍ୟୁଜନ କନ୍ସୋର୍ଟିୟମର ପ୍ରାୟ ୪,୮୦୦ ବୈଜ୍ଞାନିକ କାମ କରୁଛନ୍ତି। ଏଥିରେ ୟୁରୋପୀୟ ସଂଘ ସଦସ୍ୟ ଦେଶଗୁଡ଼ିକ ସମେତ ସୁଇଜରଲାଣ୍ଡ, ୟୁକ୍ରେନ ଆଦି ରାଷ୍ଟ୍ରର ଗବେଷକ ସାମିଲ ଅଛନ୍ତି। ଅକ୍ସଫୋର୍ଡରେ ସବୁଠାରୁ ବଡ଼ ଏବଂ ଶକ୍ତିଶାଳୀ ମେଶିନ୍ରେ ନ୍ୟୁକ୍ଲିୟର ଫ୍ୟୁଜନ ଜ୍ଞାନକୌଶଳ ବ୍ୟବହାର କରାଯାଇଛି। ଏହି ପରୀକ୍ଷଣଗୁଡିକର ଫଳାଫଳ ଜେଇଟିର ପରବର୍ତ୍ତୀ ସଂସ୍କରଣ ଆଇଟିଇଆର୍ରେ ଫିଡ୍ କରାଯିବ। ଆଇଟିଇଆର୍ ଏକ ପ୍ରକାର ଉପକରଣ, ଯାହା ଫ୍ୟୁଜନ ପ୍ରକ୍ରିୟାକୁ ଦୀର୍ଘ ସମୟ ପର୍ଯ୍ୟନ୍ତ ଜାରି ରଖିବ। ଏଥିରେ ଇଣ୍ଟିଗ୍ରେଟେଡ୍ ଟେକ୍ନୋଲୋଜି ଓ ମାଟେରିଆଲ ଟେଷ୍ଟ କରାଯିବ। ଫ୍ୟୁଜନ ପ୍ରକ୍ରିୟା ଦ୍ୱାରା ବ୍ୟବସାୟିକ ଭିତ୍ତିରେ ବିଦ୍ୟୁତ୍ ଉତ୍ପାଦନରେ ଆଇଟିଇଆର୍କୁ ବ୍ୟବହାର କରାଯିବ। ଫ୍ରାନ୍ସରେ ଆଇଟିଇଆର୍ ପ୍ରୋଜେକ୍ଟ ଆସିବାକୁ ଥିବାବେଳେ ଏଥିରେ ଚାଇନା, ୟୁରୋପୀୟ ସଂଘ, ଭାରତ, ଜାପାନ, କୋରିଆ, ରୁଷିଆ ଏବଂ ଆମେରିକା ସହଯୋଗୀ ରାଷ୍ଟ୍ର ଭାବେ ସାମିଲ ଅଛନ୍ତି।
