ନୂଆଦିଲ୍ଲୀ,୫।୩: ଦେଶର ୯ ବିରୋଧୀଦଳ ନେତା ଇଡି ଏବଂ ସିବିଆଇର ଅପବ୍ୟବହାର ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି। ଏହି ପ୍ରସଙ୍ଗରେ ଆମ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ବିବୃତ୍ତି ମଧ୍ୟ ସାମ୍ନାକୁ ଆସିଛି। ଦେଶରେ ଏବେ ବିପଦଜନକ ପରିସ୍ଥିତି ଅଛି ବୋଲି କେଜ୍ରିୱାଲ କହିଛନ୍ତି। କେଜ୍ରିୱାଲ ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କ କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି।
କେଜ୍ରିୱାଲ କହିଛନ୍ତି, ବର୍ତ୍ତମାନ ଦେଶର ପ୍ରଧାନମନ୍ତ୍ରୀଙ୍କ କାର୍ଯ୍ୟ ଶୈଳୀ ଏପରି ହୋଇଛି ଯେ ଯଦି ଦେଶର କୌଣସି ରାଜ୍ୟରେ ଭାଜପା ବ୍ୟତୀତ ଅନ୍ୟ ଦଳର ସରକାର ଥାଏ, ତେବେ ସରକାରଙ୍କୁ କାମ କରିବାକୁ ଅନୁମତି ଦିଆଯାଇ ନ ଥାଏ। ଏହା ବହୁତ ବିପଜ୍ଜନକ। ପ୍ରଧାନମନ୍ତ୍ରୀ ଯେକୌଣସି ଦେଶର ପିତାଙ୍କ ପରି ଅଟନ୍ତି। ଆମେ ନିର୍ବାଚନରେ ପରସ୍ପର ସହ ଲଢୁ, କିନ୍ତୁ ନିର୍ବାଚନ ପରେ ଯଦି କାହାର ସରକାର ଗଠନ ହୁଏ, ତା’ହେଲେ ଆମେ ସରକାରଙ୍କୁ ସମ୍ପୂର୍ଣ୍ଣ ସମର୍ଥନ କରିବୁ ଏବଂ ତାଙ୍କ ସହ କାର୍ଯ୍ୟ କରିବୁ। ଏହା ପ୍ରଧାନମନ୍ତ୍ରୀଙ୍କ ଦାୟିତ୍ୱ। କିନ୍ତୁ ଆମ ଦେଶରେ ଏବେ ତାହା ଦେଖିବାକୁ ମିଳୁନାହିଁ।
ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କେଜ୍ରିୱାଲ ଆହୁରି ମଧ୍ୟ କହିଛନ୍ତି, ଆମ ଦେଶର ପ୍ରଧାନମନ୍ତ୍ରୀ ନିଷ୍ପତ୍ତି ନେଇଛନ୍ତି ଯେ, ଯଦି ଆପଣ ଭାଜପାକୁ ଭୋଟ ନ ଦିଅନ୍ତି ଏବଂ ଅନ୍ୟ କୌଣସି ଦଳକୁ ଭୋଟ ଦିଅନ୍ତି, ତେବେ ସରକାରଙ୍କୁ କୌଣସି ପରିସ୍ଥିତିରେ କାମ କରିବାକୁ ଦିଆଯିବ ନାହିଁ। ଯଦି ଭାଜପା ବ୍ୟତୀତ ଏକ ସରକାର ଗଠନ ହୁଏ, ତା’ପରେ ଇଡି ଏବଂ ସିବିଆଇ ଏହାର ସମସ୍ତ ନେତାଙ୍କୁ ଗିରଫ କରିବେ, ସେମାନଙ୍କୁ ବିଭିନ୍ନ ଉପାୟରେ ହଇରାଣ କରିବାକୁ ଚେଷ୍ଟା କରିବେ।
