ଦୁବାଇ,୨୪।୧୦(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୪୩ତମ ମୁକାବିଲାରେ କିଙ୍ଗ୍ସ ଏକାଦଶ ପଞ୍ଜାବ ଓ ସନରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବେ। ସ୍ଥାନୀୟ ଦୁତ୍ବାଇ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଶନିବାର ଆୟୋଜିତ ହେବାକୁ ଥିବା ଦ୍ୱିତୀୟ ମ୍ୟାଚ୍ ଏହି ଦୁଇ ଦଳ ପାଇଁ ସମାନ ଭାବେ ଗୁରୁତ୍ୱ ବହନ କରୁଛି। କାରଣ ଉଭୟ ଦଳ ସମାନ ୮ ପଏଣ୍ଟ ହାସଲ କରିଛନ୍ତି। ଦୁଇ ଦଳ ପ୍ଲେ- ଅଫ୍ ଦୌଡ଼ରେ ସ୍ଥିତି ବଜାୟ ରଖିବାକୁ ଅସ୍ଥିତ୍ୱର ଲଢେଇରେ ମୁହଁାମୁହିଁ ହେବେ। ଦୁଇ ଦଳ ଏବେ ନିଶ୍ଚିତ ବିଜୟ ହାସଲ ପରସ୍ଥିତିର ସମ୍ମୁଖୀନ ହେବେ।
ହାଇଦ୍ରାବାଦ ଏପର୍ଯ୍ୟନ୍ତ ୧୦ଟି ମ୍ୟାଚ୍ ଖେଳି ୪ ବିଜୟ ଓ ୬ ପରାଜୟ ସହ ୮ ପଏଣ୍ଟ ହାସଲ କରି ତାଲିକାର ଷଷ୍ଠ ସ୍ଥାନରେ ରହିଛି। ସେହିପରି ରାଜସ୍ଥାନ ୧୧ଟି ମ୍ୟାଚ୍ ଖେଳି ୪ ବିଜୟ ଓ ୭ ପରାଜୟ ସହ ୮ ପଏଣ୍ଟ ହାସଲ କରି ରନ୍ ରେଟ୍ରେ ପଛକୁ ରହି ସପ୍ତମ ସ୍ଥାନରେ ରହିଛି। ପ୍ଲେ- ଅଫ୍ରେ ସ୍ଥାନ ହାସଲ ପାଇଁ ଦୁଇ ଦଳକୁ ଏବେ ସେମାନଙ୍କ ବାକି ମ୍ୟାଚ୍ଗୁଡିକରେ ବିଜୟୀ ହେବା ଜରୁରୀ ହୋଇପଡିଛି। ଫଳରେ ଉଭୟ ଦଳ ପାଇଁ କର ବା ମର ପରିସ୍ଥିତି ସୃଷ୍ଟି କରିଛି।
ମନ୍ଥର ଆରମ୍ଭ କରିଥିଲେ ମଧ୍ୟ ପଞ୍ଜାବ ପରେ ଭଲ ପ୍ରଦର୍ଶନ କରିଛି। ହ୍ୟାଟ୍ରିକ୍ ବିଜୟ ସହ ପଞ୍ଜାବ ଟ୍ରାକ୍କୁ ପ୍ରତ୍ୟାବର୍ତ୍ତନ କରିଛି। ଦିଲ୍ଲୀ କ୍ୟାପିଟାଲ୍ସ, ମୁମ୍ବାଇ ଇଣ୍ଡିଆନ୍ସ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଭଳି ଶକ୍ତିଶାଳୀ ଦଳକୁ ହରାଇବାରେ ସକ୍ଷମ ହୋଇଛି ଲୋକେଶ ରାହୁଲଙ୍କ ନେତୃତ୍ୱାଧୀନ ପଞ୍ଜାବ। ଏହି ମୁମେଣ୍ଟମ ବଜାୟ ରଖିବାକୁ ପ୍ରୟାସ କରିବ ପଞ୍ଜାବ। ରାହୁଲ, ମୟଙ୍କ ଅଗ୍ରଓ୍ବାଲ, କ୍ରିସ୍ ଗେଲ୍, ନିକୋଲାସ ପୁରନଙ୍କୁ ନେଇ ପଞ୍ଜାବ ବ୍ୟାଟିଂ ଲାଇନ୍ ବେଶ୍ ଶକ୍ତିଶାଳୀ ମନେ ହେଉଛି। ରାହୁଲ (୫୪୦) ଓ ଅଗ୍ରଓ୍ବାଲ (୩୯୮) ରନ ସଂଗ୍ରହ କରି ସର୍ବାଧିକ ରନ୍ ସ୍କୋରର ସାବ୍ୟସ୍ତ ହୋଇଛନ୍ତି। ଗେଲ୍ଙ୍କ ସଫଳ ପ୍ରତ୍ୟାବର୍ତ୍ତନ ଦଳର ପ୍ରଦର୍ଶନ ଭଲ ହୋଇପାରିଛି। ଜିମ୍ମି ନିଶାମ ସାମିଲ ହେବା ପରେ ପଞ୍ଜାବର ବ୍ୟାଟିଂ ଓ ବୋଲିଂର ଗଭୀରତା ବଢିଛି। ଅଭିଜ୍ଞ ଦ୍ରୁତ ବୋଲର ମହମ୍ମଦ ସାମି ମଧ୍ୟ ନିଜ ଦାୟିତ୍ୱ ତୁଲାଇବାରେ ସମର୍ଥ ହୋଇଛନ୍ତି।
ଅନ୍ୟପଟେ ପ୍ଲେ- ଅଫ୍ରେ ସ୍ଥାନ ହାସଲ ପାଇଁ ହାଇଦ୍ରାବାଦକୁ ତା’ର ବାକି ୪ଟି ମ୍ୟାଚ୍ ଜିତିବାକୁ ହେବ। କ୍ରମାଗତ ୩ଟି ମ୍ୟାଚ୍ର ପରାଜୟ ପରେ ହାଇଦ୍ରାବାଦ ୮ ଉଇକେଟରେ ରାଜସ୍ଥାନକୁ ପରାସ୍ତ କରି ଆତ୍ମବିଶ୍ୱାସ ଫେରିପାଇଛି। ଗତ ମ୍ୟାଚ୍ରେ ମନୀଷ ପାଣ୍ଡେ (୮୩) ଓ ବିଜୟ ଶଙ୍କର (୫୨) ଅର୍ଦ୍ଧଶତକ ହାସଲ କରି ଫର୍ମକୁ ଫେରିବା ଦଳ ପାଇଁ ଏକ ବଡ଼ ଶୁଭ ଖବର। ଅଧିନାୟକ ଡେଭିଡ ଓ୍ବାର୍ନର ଓ ଜନ୍ନି ବେୟାରଷ୍ଟୋଙ୍କୁ ଆହୁରି ଭଲ ପ୍ରଦର୍ଶନ କରିବାକୁ ହେବ। ଜାସନ ହୋଲ୍ଡର ଦଳରେ ସାମିଲ ହେବା ପରେ ହାଇଦ୍ରାବଦ୍ ବୋଲିଂରେ ସୁଧାର ଆସିଛି। ପ୍ରିୟମ ଗର୍ଗ, ଅବୁଦୁଲ ସମାଦ ଓ ଟି. ନଟରାଜନଙ୍କ ଭଳି ଯୁବ ଖେଳାଳି ଶ୍ରେଷ୍ଠ ପଦର୍ଶନ କରିବାର ସମୟ ଆସି ଉପନୀତ ହୋଇଛି। ଶନିବାର ଦୁଇଟି ମ୍ୟାଚ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।
