ଭୁବନେଶ୍ୱର,୧୭।୯(ଅଭିଜିତ ଦାସ)ରାଜ୍ୟରେ ଗତ ୨୪ ଘଣ୍ଟା ମଧ୍ୟରେ ଆଉ ୧୮୦ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ନୂଆ ରୋଗୀଙ୍କୁ ମିଶାଇ ମୋଟ ଆକ୍ରାନ୍ତଙ୍କ ସଂଖ୍ୟା ୬୨୪୮ରେ ପହଞ୍ଚତ୍ଛି। ଖୋର୍ଦ୍ଧା ପରେ ଏବେ ପୁରୀରେ ଡେଙ୍ଗୁ ଆକ୍ରାନ୍ତ ସଂଖ୍ୟା ବୃଦ୍ଧି ପାଉଛି। ସବୁଠାରୁ ଉଦ୍ବେଗର ବିଷୟ ହେଉଛି ଏବେ ସହର ଭଳି ଗ୍ରାମାଞ୍ଚଳରେ ମଧ୍ୟ ଡେଙ୍ଗୁ ବ୍ୟାପିବାରେ ଲାଗିଛି। ବର୍ତ୍ତମାନ ରାଜ୍ୟର ଟିପିଆର୍(ଟେଷ୍ଟ ପିଜିଟିଭ୍ ରେଟ୍) ୭.୯ ପ୍ରତିଶତ ରହିଛି। ପ୍ରାୟ ୯୮ ପ୍ରତିଶତ ଆକ୍ରାନ୍ତ ଘରେ ସୁସ୍ଥ ହେଉଥିଲେ ମଧ୍ୟ ସତର୍କ ରହିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ପରାମର୍ଶ ଦିଆଯାଇଛି। ବିଶେଷକରି ଡେଙ୍ଗୁ ନିରାକରଣ ପାଇଁ ଗୋଷ୍ଠୀ ସହଭାଗିତାକୁ ଗୁରୁତ୍ୱ ଦିଆଯାଇଛି।
ରାଜ୍ୟରେ ଶୁକ୍ରବାର ସୁଦ୍ଧା ୭୮,୭୨୧ ନମୁନା ପରୀକ୍ଷା କରାଯାଇଥିବାବେଳେ ୬୨୪୮ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ଖୋର୍ଦ୍ଧା ଜିଲାରୁ ୨୬୯୪ ଚିହ୍ନଟ ହୋଇଥିବାବେଳେ ପୁରୀରୁ ୬୯୯ଜଣ ରୋଗୀ ରହିଛନ୍ତି। ସେହିପରି ବାଲେଶ୍ବରରୁ ୫୭୨, କଟକରୁ ୫୭୦, ଜଗତସିଂହପୁରରୁ ୩୧୦ ନୟାଗଡ଼ରୁ ୨୪୨ ଡେଙ୍ଗୁ ଏବଂ ସୁନ୍ଦରଗଡ଼ରୁ ୧୭୫ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ଆର୍ଏମ୍ଆର୍ସିର ନିର୍ଦ୍ଦେଶିକା ଡା. ସଂଘମିତ୍ରା ପତି କହିଛନ୍ତି, ଡେଙ୍ଗୁ ଏକ ଆରଏନ୍ଏ ଭାଇରସ୍। ପୂର୍ବରୁ ଡେଙ୍ଗୁ କେବଳ ସହରାଞ୍ଚଳରେ ଦେଖାଯାଉଥିଲା। କିନ୍ତୁ ବର୍ତ୍ତମାନ ଗ୍ରାମାଞ୍ଚଳରେ ମଧ୍ୟ ଦେଖାଯାଉଛି। ଡେଙ୍ଗୁ ଭୂତାଣୁ ରୋଗୀଙ୍କ ଶରୀରରେ ଆଇଜିଏମ୍ ତିଆରି କରିଥାଏ, ଯାହା ଫଳରେ ଶରୀରର ରୋଗପ୍ରତିରୋଧକ ଶକ୍ତି କମିଯାଇଥାଏ। ତେଣୁ ଜ୍ୱର ହେବା ମାତ୍ରେ ଏନ୍ଏସ୍୧ ପଦ୍ଧତିରେ ରକ୍ତ ପରୀକ୍ଷା କରିବା ନିହାତି ଦରକାର। ବର୍ତ୍ତମାନ ସ୍ବାସ୍ଥ୍ୟ ବିଭାଗ ପକ୍ଷରୁ ବିଭିନ୍ନ ପିଏଚ୍ସିରେ ଟେଷ୍ଟିଂର ସୁବିଧା କରାଯାଇଛି। ଚଳିତବର୍ଷ ଡେଙ୍ଗୁ୨ର ଲକ୍ଷଣ ଦେଖାଯାଉଛି। ଖୁବ୍ଶୀଘ୍ର ଡେଙ୍ଗୁ ଉପରେ ଟିକା ବାହାରିବ ବୋଲି ସେ ସୂଚନା ଦେଇଛନ୍ତି।
