ଛତ୍ରପୁର,୧୯।୩(ଡି.ଏନ.ଏ): ଓଡିଆ ଲେଖାପଢ଼ା ଜାଣି ନ ଥିବା କାରଣରୁ ଗଞ୍ଜାମ ଜିଲା ଛତ୍ରପୁର ବ୍ଲକ ଆର୍ଯ୍ୟପଲ୍ଲୀ ପଞ୍ଚାୟତର ସରପଞ୍ଚ ଏମ୍ .ଲକ୍ଷ୍ମୀଙ୍କ ପଦବୀ ଅସିଦ୍ଧ ଘୋଷଣା ହୋଇଛି। ଛତ୍ରପୁର ସିଭିଲ ଜଜ୍ ଜୁନିୟର ଡିଭିଜନ ବିଚାରପତି ସନ୍ତୋଷ କୁମାର ପାଣିଗ୍ରାହୀ ଗୁରୁବାର ଏହି ରାୟ ପ୍ରକାଶ କରିଛନ୍ତି। ୨୦୧୭ ପଞ୍ଚାୟତ ନିର୍ବାଚନରେ ଏମ୍. ଲକ୍ଷ୍ମୀ ସରପଞ୍ଚ ଭାବେ ନିର୍ବାଚିତ ହୋଇଥିଲେ। ହେଲେ ସେ ସମୟରେ ତାଙ୍କ ପ୍ରତିଦ୍ୱନ୍ଦ୍ୱୀ ପି. ଦମୟନ୍ତୀଙ୍କ ପକ୍ଷରୁ ଲକ୍ଷ୍ମୀଙ୍କ ବିରୋଧରେ ୨୦୧୭ ମାର୍ଚ୍ଚ ୧ରେ ଛତ୍ରପୁର ସିଭିଲ କୋର୍ଟରେ ଏକ ପିଟିଶନ (ନଂ.୧/୧୭) ଦାଖଲ କରାଯାଇଥିଲା। ଲକ୍ଷ୍ମୀ ଆନ୍ଧ୍ରର ଝିଅ, ସେ ଓଡିଆ ଲେଖିପଢି ଜାଣି ନାହାନ୍ତି ଏବଂ ନାମାଙ୍କନ ଦାଖଲ ବେଳେ ଜାଲ୍ ଓବିସି ପ୍ରମାଣପତ୍ର ଦେଇଥିବା ନେଇ ଉକ୍ତ ପିଟିଶନରେ ଦର୍ଶାଯାଇଥିଲା। ଏହି ମାମଲାର ଶୁଣାଣି କରି ଲକ୍ଷ୍ମୀ ଓଡିଆ ଲେଖିପଢି ଜାଣି ନ ଥିବା ଏବଂ ଜାଲ ପ୍ରମାଣପତ୍ର ଦାଖଲ କରିଥିବାରୁ ତାଙ୍କ ସରପଞ୍ଚ ପଦବୀକୁ ବିଚାରପତି ଅସିଦ୍ଧ ଘୋଷଣା କରିଛନ୍ତି। ଏହା ଉପରେ ବିହିତ କାର୍ଯ୍ୟାନୁଷ୍ଠାନ ନେବା ପାଇଁ ଗଞ୍ଜାମ ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି।ଦମୟନ୍ତୀଙ୍କ ପକ୍ଷରୁ ଓକିଲ ପଦ୍ମଚରଣ ସାହୁ, ସରକାରଙ୍କ ପକ୍ଷରୁ ମନୋଜ ପାଢୀ ମାମଲା ପରିଚାଳନା କରୁଥିଲେ। ସୂଚନାଯୋଗ୍ୟ, ଗତ ୫ ତାରିଖରେ ମଧ୍ୟ ଓଡିଆ ଲେଖାପଢା ଜାଣି ନ ଥିବା ନେଇ ଛତ୍ରପୁର ବ୍ଲକ ଅଗସ୍ତିନୂଆଗାଁ ସରପଞ୍ଚ ପି. ସୀମାଦ୍ରିଙ୍କ ପଦବୀ ରଦ୍ଦ ହୋଇଥିଲା।
