ନୟାଗଡ଼ ଅଫିସ,୮ା୬: ନୟାଗଡ଼ ମେଗା ପାନୀୟ ଜଳପ୍ରକଳ୍ପ କାର୍ଯ୍ୟରେ ନୟାଗଡ଼ ସହରର ବିଭିନ୍ନ ସ୍ଥାନରେ ନୂଆ ପାଇପ୍ ବଦଳରେ ପୂରୁଣା ପାଇପ୍ ପକା ଯାଉଥିବା ଅଭିଯୋଗ ଉଠିଛି । ସାଧାରଣତଃ ଜଙ୍କସନ ସ୍ଥାନରେ ଏପରି ଅନିୟମିତତା କରାଯାଉଛି । ନୟାଗଡ଼ ସହରର ଯଯାଙ୍ଗିସାହି ମଙ୍ଗଳା ମନ୍ଦିର, ଯଦୁମଣି ନଗର, ମଧୁସୂଦନ ନଗର ପରି ଅନେକ ସ୍ଥାନରେ ପୁରୁଣା ପାଇପ୍ ପକାଇ ଅନିୟମିତତା ଚାଲିଛି । ସେହିଭଳି ମେଗା ପାନୀୟ ଜଳ ପ୍ରକଳ୍ପ ପାଇଁ ସହରର ଗଳି କନ୍ଦି ରାସ୍ତାଠାରୁ ଆରମ୍ଭ କରି ସବୁ ସ୍ଥାନ ୩ରୁ ୪ମାସ ହେଲା ପାଇପ୍ ପଡି ସାରିଲାଣି । ପାଇପ୍ ପଡି ସାରିବା ପରେ ମାଟି ପକାଇ ଉଚ୍ଚା କରି ରଖା ଯାଇଛି । ରାସ୍ତା ଉପରେ ସିମେଣ୍ଟ ଅଥବା ମାଟି ପଡୁ ନ ଥିବାରୁ ସହରର ବିଭିନ୍ନ ରାସ୍ତା ମରଣଯନ୍ତା ପାଲଟିଛି । ପୁଣି ରାସ୍ତା ମରାମତି ଠିକ୍ରେ ହେଉ ନ ଥିବା ଅଭିଯୋଗ ଉଠିଛି । ନୟାଗଡ଼ ପୁରୁଣା ସହରର ପୁରୁଣା ରାଜବାଟି ସାହିକୁ ପଡ଼ିଥିବା ରାସ୍ତା କଡରେ ଅନେକ ସ୍ଥାନରେ ଡ୍ରେନ ଭାଙ୍ଗି ଯାଇଛି । ହେଲେ ଏହାକୁ ମରାମତି କରାଯାଉନି ା ପାଇପ୍ ବିଛାଇବା କାର୍ଯ୍ୟ, ରାସ୍ତା ଖନନ ଓ ମରାମତି କାମ ଓ ରାସ୍ତା ମରାମତି ବେଳେ ଉଚ୍ଚ କୋଟିର କାମ କରିବାକୁ ଜିଲା ପରିଷଦ ବୈଠକ, ରଥଯାତ୍ରା ପ୍ରସ୍ତୁତି ବୈଠକ, ନୟାଗଡ଼ ନିର୍ବାଚନମଣ୍ଡଳୀର ବୈଠକ ପରି ବିଭିନ୍ନ ବୈଠକରେ ଆଲୋଚନା ହେଉଥିଲେ ମଧ୍ୟ ଏହାକୁ ଅଣଦେଖା କରାଯାଉଥିବା ଅଭିଯୋଗ ଉଠିଛି । ଏଭଳିସ୍ଥଳେ କେବଳ ରାସ୍ତାକୁ କାମ ଚଳା ନୀତିରେ ମରାମତି କରାଯାଇଥିବାରୁ ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି । ସେହିପରି ଜଗନ୍ନାଥ ମନ୍ଦିରଠାରୁ ଡିଆରଡିଏ ରୋଡର ହାତିଆ ଶିଳା ମଠ ନିକଟସ୍ଥ କଲଭର୍ଟ ପାଖରେ କଂକ୍ରିଟ ରାସ୍ତାରେ ପାଇପ୍ ଯାଇଥିଲେ ମଧ୍ୟ ରାସ୍ତାକୁ ମରାମତି ନ କରି ବିପଦସଙ୍କୁଳ ଭାବେ ଛାଡି ଦିଆଯାଇଛି । ଏଠାରେ ବିଭିନ୍ନ ସମୟରେ ଦୁର୍ଘଟଣା ଘଟୁଛି । ପୁଣି ପିଚୁ ଓ ସମେଣ୍ଟ କଂକ୍ରିଟ ପରି ରାସ୍ତା ଉପରେ ପାଇପ୍ ପଡିଥିବା ଅଂଶରେ ମାଟି ଗଦା ରହିଥିଲେ ମଧ୍ୟ ଏହାକୁ ତୁରନ୍ତ ସଫେଇ ନ କରି ପିଚୁ ଅଥବା ସିମେଣ୍ଟ କରାଯାଉନି । କାମର କଚ୍ଛପ ଗତି ଯୋଗୁ ସହରବାସୀ ନର୍କ ଯନ୍ତ୍ରଣା ଭୋଗୁଛନ୍ତି । ଏପରି କି ଦୁର୍ଘଟଣା ବଢ଼ୁଛି । ଏହାର ନିରାକରଣ କରିବାକୁ ଦାବି ହେଉଛି । ଏନେଇ ନୟାଗଡ ଜନସ୍ବାସ୍ଥ୍ୟ ସବ୍ଡିଭିଜନର ସହକାରୀ ନିର୍ବାହୀଯନ୍ତ୍ରୀ ଦୁର୍ଯ୍ୟୋଧନ ସାହୁ କୁହନ୍ତି, ସବୁଆଡେ ନୂଆ ପାଇପ ପଡିବ । ଯଦି କେଉଁଠାରେ ପୁରୁଣା ପାଇପ୍ ପଡୁଛି ଅବଗତ କରାଗଲେ ଏହାର ତଦନ୍ତ କରି ନୂଆ ପାଇପ୍ ପକାଯିବ। କାମ ଶୀଘ୍ର ଶେଷ କରିବାକୁ ପ୍ରଚେଷ୍ଟା ଜାରି ରହିଛି । ସହରର ବିଭିନ୍ନ ରାସ୍ତା ମରାମତି ଚାଲିଛି । କିଛି ଦିନ ଭିତରେ ସେହି କାମ ଶେଷ ବୋଲି କହିଛନ୍ତି ।
